SIPMIU-in Dihmunzawla building pakhat thiah nan cheng nuai 63.08 a sen laiin building 108 thiah vangin sorkar-in cheng nuai 44.97 a hlep

ADB loan hmanga hnathawk SIPMIU chuan building pakhat thiat turin contractor hnenah pawisa a pe a, mahse, sorkar hnuaia works department chuan building thiah tur te chu tender chhuahin tender chhangtu mimal emaw, firm emaw man chawiin an thiah tir thin zawk

IMG-20170223-WA0005.jpg
PHOTO: Dihmunzawla WTP thiahna hmunhma

Tun tum Congress sorkarin thuneih na a lak tirh atanga nikum kum tawp (2008-2016) thleng khan sorkar building chi hrang hrang 108 thiah a ni tawh a. Heng building thiah nan hian tender chhuah vek a ni a, mimal leh firm hrang hrang zinga a chhang sang ber te chu building hi thiah tir zel an ni a. Building thiat tura tender chhuah zawng zawng atang hian sorkarin cheng nuai 44.97 (Rs 44.97 lakhs) a hmu tawh.

The Frontier Despatch (TFD) chuan Mizoram sorkar hnuaia works department chi hrang hrang lehkha pawimawh a zirchianna ah sorkar building thiat tur hian Public Works Department tih loh chuan tender an chhuah lova, Power & Electricity Dept. leh Public Health Engineer Dept. te chuan building thiah nan hian tender chhuah an la nei lo thung.

Amaherawhchu, PWD hian anmahni department building thiah nan chauh tender hi an chhuah ngai chuang lova. Larsap chenna leh office te, court hman lai building te, college te, police station te leh damdawi in te bakah sorkar hnathawk hrang hrang te quarter thiah a ngaihin tender a chhuah thin.

 

PWD division pali (4) in building thiah nan tender chhuah tawh, Aizawl Building Division in Rs 31.84 lakhs hmu

PWD hnuaia division pali in sorkar building thiahna tender an chhuah tawh a, chungte chu Aizawl Building Division, Lunglei Building Division, Project Division II leh Project Division III te an ni.

Aizawl Building Division hnuaiah building chi hrang hrang 83 chu tender chhuah hnu ah mimal leh frim te thiah tir an ni hlawm a. Heng thiah nan hian a thiattu te hian PWD hnenah a vain cheng nuai 31.84 (Rs 31.84 lakhs) an chhunglut a.

Laipuitlanga sorkar hnathawk quarter (Quarter No. L-3/IV, Laipuitlang) thiah nana PWD in sum a hmuh chu building dang zawng thiahna atanga sum a hmuh aiin a tam a. He building thiat tur hian Aizawl Saron Veng ami C Lalhmasawna chuan cheng nuai 3.23 (Rs 3.23 lakhs) in tender a chhang a ni.

Building mal thiah nana PWD in sum a hmuh tam ber dawttu chu Governor’s Residence Building thiah hna ah a ni a. He building thiatna tur tender hi North-East Consultancy Services (NECS) chuan cheng nuai 3.09 (Rs 3.09 lakhs) in a chhang a. NECS vek hian hemi building bula Governor’s Ceremonial Wing Building thiat turin cheng nuai 2.75 (Rs 2.75 lakhs) chuangin tender a chhang bawk a, Governor’s Office and Secretariat Building thiat turin cheng nuai 1.47 (Rs 1.47 lakhs) in tender a chhang bawk.

 

Lunglei Building Division in building thiah vangin Rs 10.59 a hmu

Aizawl Building Division bakah hian Lunglei Building Division pawhin sorkar building thiahna tender a chhuah atangin cheng nuai 10.59 (Rs 10.59 lakhs) a hmu a. He division hnuaiah hian tender chhuah atangin building 18 thiah a ni.

Lunglei Building Division hnuaiah hian tender chhuaha building thiahna hlawk ber chu Lawngtlai Civil Hospital thiah atangin a ni a. Civil Hospital thiahna tender hi Zahnuna, Aizawl Zemabawk ami chuan cheng nuai 2.33 (Rs 2.33 lakhs)-a chhangin a thiah hna hi a chang zui ta a ni.

 

Aizawl Project Division II & III in Rs 11.99 hmu ve bawk

PWD Building Division pahnih bakah hian PWD Aizawl Project Division II leh Aizawl Project Division III te pawhin sorkar building thiah nan hian tender an chhuah ve bawk a. Heng division pahnih te hian an inkarah building pasarih thiah nan tender tichhuakin a vaiin cheng nuai 11.99 (Rs 11.99 lakhs) an hmu ve bawk.

Hetianga sorkar building thiah a nih reng reng hian tender chhangtute hian an tender chhanna aia tam kha an in thiah ch^k hlui atangin an hmu chhuak leh thin a ni.

 

Dihmunzawla in pakhat thiah nan SIPMIU-in Rs 63.08 lakhs seng ve thung

Asian Development Bank sum p<ka hmasawnna hna hrang hrang thawk State Investment Program Management and Implementing Unit (SIPMIU) chuan Aizawl tl^k lam, Tlawng lui bula Dihmunzawla Water Treatment Plant thiah nan chuan cheng nuai 63.08 a seng thung a.

He thu hi Vanglaini chanchinbu chuan nikum August 10 khan Mizoram Assembly hnuaia Estimates Committee member te’n Dihmunzawla 132 KV sub-station sakna hnathawh an endik chanchin a ziahna ah a chhuah a.

 

MLA te’n building thiah man a to uchuak ah an ngai: Vanglaini

Estimates Committee in hnathawh an endik tum hian “RCC building thiah nan cheng nuai 63 hman a ni chu to uchuak an tih thu an sawi a; SIPMIU officer-te sawifiahna ah an hmin loh thu an sawi,” tiin Vanglaini chuan a ziak a, khatih laia “Committee Chairman Lalrinliana Sailo chuan, ‘Power sub-station dinna hmun tur tihzâwlna (earth work) atan a hranpain cheng nuai 35 hman a ni tho a. Min hmin lo a nia. Fimkhur rawh u,’ a ti,” tiin a ziak bawk.

“MLA Vanlalzawma leh R Vanlalvena te chuan, in thiahna atana cheng nuai 63 sen a ni chu tam lutuka an hriat thu an sawi. T Sangkunga chuan, PHE building aia lian daih leh tha zawk Dinthar Presbyterian Kohhran Biak In thiattuin Rs. 2,00,000-a a thiah ngam thu a sawi bawk,” tiin Vanglaini hian a ziak bawk a ni.

Hetianga chanchinbua a chhuah tak hnu hian opposition party te pawhin sorkar an bei zui a, eptu pawl hruaitut te chuan hetianga pawisa senna tam tak hi chhui chian an ph<t thu an sawi a.

 

PHE in thiahna auction tichhuak lovin min hlan a, thiah hna contractor kan pe ta mai: SIPMIU

Hetihlai hian, SIPMIU Program Director Valbuanga chu Estimates Committee in an hnathawh a enfiahna chungchangah sorkar hmaah a insawifiah ve nghe nghe a.

TFD in a hriat dan chuan SIPMIU hian sorkar hnenah building pakhat thiah anga sawi hi rambuai hmalam a Water Treatment Plant sak tawh a ni tiin a sawi a. 132 KV substation sak nan hian he treatment plant hi thiah ngei a ngaih si vang leh a ram neitu thin PHE chuan SIPMIU hnena helai hmun an pek chhawn hma hian a thiahna auction an chhuah si loh avang hian contractor hnena pe ta mai angin an insawi.

SIPMIU in sorkar a hrilh dan chuan RCC building thiah tak hian leihnuaia khawl hrang hrang a tel vek a ti a. ‘Water Treatement Plant Filter House’, ‘sedimentation tank’, ‘clariflocullators’ leh ‘backwash tank’ chi hrang hrang chu lei chungah a awm laiin leihnuai ah ‘rectangular tank’, ‘bottom part of trapezoidal tank’ leh ‘circular sump’ te a awm bawk a. Heng zawng zawng thiah nan hian cheng nuai 13.02 sen a ni a.

Hei bakah hian WTP thiahna hnuhma paih fai nan cheng nuai 6.42 leh filter house hlui atanga Tlawng luia chinai paih nan cheng 69,764.4 sen a nih thu te a hrilh bawk a.

Mahse, hetia insak thiah nana pawisa sen tam berna chu sub-station hmun laih zawlna leivung paih fai nan cheng nuai 42.94 sen a ni thung.

Hetih rual hian, engvangin nge SIPMIU hian thiahna auction hi an tihchhuah loh chhan Valbuanga hian a sawi lo thung.

 

Valbuanga’n eng nge a sawi?

The Frontier Despatch chuan SIPMIU Project Director Valbuanga chu lenchilhin Dihmunzawla building thiah chungchangah hian a kawm a. Eng vangin nge sorkar department ten insak thiah tur te chu tender chhuaha an auction zel laiin SIPMIU hian an auction ve loh tih a zawt a, heti hian a chhang (Chhiar a rem zawk nan kaih tawi hlek lai tlem a awm – Ed)

“SIPMIU chu department in ram ruak min pe tur a ni a, ram ruak min pek bang zawng chu kan contractor in a thianfai mai dawn a, a hmunhma khu sorkar ram a nih avangin PHE chuan an duh zawng chu lilam a. Tuna WTP hlui an tih erawh hi chu a hma pawhin Department in thiah an lo tum tawh thin a, an thiah hleihtheih loh takah chuan PHE department chuan a hluihlawn ta a. Thiah min phalsak mai rawh u kan tih angin thiah min phalsak a, keini (SIPMIU) chuan contractor kan nei tawh tho avangin thiat turin tender chhuaha contractor dang kan rawih a ngai tawh lo a.

“Kan hnathawhna min dal chuan sorkar bungrua pawh ni mahse, phalna min pe a nih chuan kan thiat mai a, chu chu kan kalphung a ni. Department (PHE) in phalna min pek tawh chuan keini (SIPMIU) in auction leh kha a ngai tawh lo.

“Bungrua in hlutna a la nei a nih erawh chuan kan tih dan a dang leh deuh a. Tunah pawh hian PHE building pakhat chu anmahni in thiahna tur sum an nei lo an ti a, mahse, building ka en khan a la tha angreng si a, auction phawt rawh u kan ti mek a, a chhan chu keini tan mi dang bungrua auction ngawt kha a chi bik lo a.

“Mahse, thiah a ngaih erawh chuan kan contractor khan a thiat tur a ni mai a, a thiah nana a sum sen chu kan pe ve thung.

“Dihmunzawla building thiah chungchangah khalai te kha min hrethiam lova. PHE in an duh lai kha chu an la vek a, an duh lo chin kha chu keini chuan kan thiat darh a, tuizem dang kha kan sa mai a ni. Amaherawhchu, kan (SIPMIU) bungraw pangngai chu ni se kan auction leh thei ta. A nih loh pawhin a la thar ni-a kan hriat chuan contractor thiah tira engemaw zat chan tir ve a theih a. Mimal bungrua kan thiah erawh chuan zangnadawmna kan pe thei thung.

“[Dihmunzawla Water Treatment Plant] kha chu a hlui tawh a. Kum 1966 bawr vela siam daih tawh a ni a, seven stage pumping kan tih thin kha a ni ta a, in mai ni lovin tuizem ang a ni zawk a. PHE pawh khan thiah an lo tum tawh thin tho a, an thiat thei lova, keini khan kan nawr hmanhmawh ve tawh bawk si a min pe ta mai a. An hman lohna pawh a rei tawh. [Aizawl Greater Water Supply Phase I] kha 1988 kumah kan commission a, phase I commission hnu kha chuan an hmang tawh lo.

“[WTP] chungah khan overhead tanky a awm a, a hnuaiah khan pump te an dah a, underground tanky a awm leh bawk a. In anga sawi tur chu a ni tho a, concrete building chu a ni a, mahse, mihring chenna in kan tih ang hi a ni lo.

“A thiah man nuai 63 an tih pawh kha a dik lova, khulaia thawhna zawng zawng belhkhawm kha a ni ta a, ama building ringawt zuk thiah na kha chu tlemte, nuai 13 vel chauh a ni a. A dang te kha chu earthwork tih te, earthwork removal tih te, retaining wall kan sak te, khami belhkhawm zawk kha a ni a.

“[Estimate committee kha chu kan] hrilhfiah tho a, amaherawhchu, ka hre lo le, a ni lo zawnga en hrim hrima zuk kal thenkhat an awm ve bawk si a.

“Khati rual khan lehlampangah khan lo fuihpawrhtu dang kha an awm ve bawk a, member thenkhat te chun ‘a nih hi a!’ te pawh an ti ve a. Eng emaw politics chirhthehna rawng kha a kai deuh hlek a.”

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s