Sorkar leh court rin lohna thukhawchang

PRISM chuan eiru hrem kawngah sorkar leh court ah rinna an nghat ngam tawh lo ni-a sawiin thuhretu an nihna thubuai ah inlan loh an rel a, hei vang hian man tawkin sorkar ukil te’n thubuai ah inlan lohna an nei fo tawh thin an ti. Mahse, thuhretu an nihna thubuai ngaihtuah lai hi a tam tawh lo hle a, sorkar in thubuai thenkhata a hmalak dan ah thilmak a tam rualin HC ah ngei pawh PRISM hian inlan lohna an lo nei ve tawh bawk a, anni chuan kohna hi an dawng mumal lo fo niin an sawi thung

Pre & GS.JPG
PRISM hruaitute court a inlan that loh vanga man te

Kum sarih kalta khan PRISM chuan Health Department hmalakna hrang hrangah sum leh pai hman dik loh a tam ni-a an hriat avangin Anti Corruption Bureau (ACB) ah complaint an thehlut a.

Chu complaint chhuina kal zel ah chuan khatih laia Health Director Dr N Palai lakah ACB chuan thubuai siamin ani hi sorkar hna chelh laia dan lova mi rinna bawhchhia ah te, mi bum ah te, lehkha pawimawh tichhia ah te, mahni hlawkna tura sorkar hmunhma hmang ah te leh dan lova hlawkna tel ah te a puh a.

Hetianga puh a nih hnu hian Dr N Palai-a thubuai chu court ah kumin kum tir thleng khan ngaihtuah chhunzawm zel a ni a, complaint file tute chu thuhretu an nihna ang leh an hriat te court hmaa sawi tura tih an nih laiin an inlan ta lova.

Hetia an lan tak loh ah chuan court hian complainant, PRISM President Vanlalruata leh General Secretary pakhat RL Liantluanga te chu man turin police thu a pe a. February 13 khan police chuan man in bail-a chhuah leh nghal an ni a, February 16 khan thuhretu angin court-a inlan turin thupek an ni nghal bawk.

February 16 a lo thlen chuan court hian chawhnu dar 2:30 thleng a nghak a, mahse, an inlan loh zel avang chuan sorkar ukil RC Thanga leh H Lalmuankima te chuan an lakah hian non-bailable warrant of arrest chhuah leh mai an dil nghe nghe a. Mahse, court chuan an dilna hi a hnawl a.

 

PRISM inlan loh vangin Dr Palaia ukil ten thubuai tihtawp ngen

Dr Palai-a ukil W Sam Joseph chuan thuhretu ber an inlan miau loh chuan thubuai hi engah mah a chhuak dawn lo ni-a sawiin thubuai chu titawp turin court an ngen a. Mahse, hetia an dil takah chuan sorkar ukil te chuan thla thar ah thubuai hi ngaihtuah that leh ni se an ti a, PC Act Special Judge Lucy Lalrinthari chuan chu dilna chu a pawm ta zawk a ni.

 

Buaina bulpui Kau-Tlabung leh Tuipanglui HP

PRISM lam chuan hetianga an inlan duh loh chhan hi sorkar leh court an rin tawh loh vang niin tum engemaw zat an lo sawi tawh a, an sawi chhan bulpui ber chu court in Kau-Tlabung leh Tuipanglui mini-hydel project-a eirukna thubuai awm a ngaihtuah (trial) tan hma-a thubuai a tihtawp vang kha a ni a.

PRISM chuan he thubuai tihtawp a nih vang hian eirukna an do dan chu thlakin mipui hmaah eiru ni-a an hriatte leh an eiruk dan puanzar lama hmalak an tum tawh tih an lo sawi lawk tawh a.

Tunhnaia court-a an inlan loh vanga man an nih, February 13 pawh khan hei hi an sawi nawn leh a, court chu eiru “man ngam lo” ah an puh a, an dinna ngai ah an ding dawn niin an sawi bawk.

 

Court rin loh thu tlangaupui court officer ten helh

Hetianga man an nih hnu lawka thu chhuah an siam leh hian court lama roreltu te a ti lungawi lo ni-a thu dawn a ni a, kartina court officers’ meeting neih thin ah pawh February 17 khan sawi chhuah a ni nghe nghe tih The Frontier Despatch (TFD) chuan thu a dawng. Court officer te chauh lo pawh PRISM te chet dan ngaimawh tute chu ukil te niin court atanga thu dawnna te chuan an sawi.

Hemi ni vek hian PC Act Special Court-a ding thin Addl. Public Prosecutor H Lalmuankima chuan thu chhuah siamin PRISM hruaitute hi he thubuai bikah hian tum 10 court ah thuhretu anga inlan tura koh an ni tawh a ti a, “Mahse, an inlan loh zel avangin” court chuan man turin thutlukna a siam angin a sawi bawk. He thu chhuah ah vek hian court sang zawk rorelna angin court chuan thuhretu inlan duh lo chu bail theih loha manna tur thupek te pawh a chhuah thei niin a sawi zui nghal a.

 

Addl PP thu chhuak dik tawk lo ti

Hemi tuk hian PRISM chuan chhang l>t in thu chhuah an siam ve nghal a. Addl. PP thu chhuah chu thudik lo niin an sawi a, “Kan hruaitute hi court-ah hian vawi thum an inlan zawk a. Chumai bakah vawi sawm lai koh ni anga a sawiah hian PRISM chuan vawi nga chiah kohna kan hmu a, kohna kan hmuh hmasak vawi thumah te hian kal vek a, a hnuhnung vawi hnih erawh chu committee-in kal lo tura a tih avangin kan kal lo ngei a ni,” a ti thung.

 

Case dangah pawh thuhretu nih angin lan lohna awm tawh

Dr N Palai-a eirukna thubuai chauh lo ah pawh hian PRISM hruaitute hi court ah inlan loh an lo nei tawh thin a, an inlan loh avanga thubuai tihtawp thelh a nih tum dang chu Kau Tlabung leh Tuipanglui mini-hydel project thubuai ah khan a ni.

Khami thubuai ah pawh khan PRISM hi complainant tho an ni a, an complaint hi ACB hnenah October 2008 khan an thehlut a. ACB chuan chhui zui in mi pakua (9) chu eiru ah a puh a.

 

Kau-Tlabung leh Tuipanglui thubuai ah kual kawi a tam

Mahse, Vigilance Department in a duh angin he thubuai hi ennawm leh a ni a, chutah chuan ACB in a chhui nawn leh a. Account books leh insak awm loh dan te a en in a tira mi pakua eiru-a a puh bakah hian mi dang paruk chu eiru an ni tih a hmuchhuak a.

Vigilance Department chuan hemi hnu hian chhui nawn leh turin a ti a, ACB chuan a chhui nawn leh ngei a, a vawithum chhui nawn hnu ah chuan mi 17 chu eiru ah a puh leh thung a.

Hemi hnu hian Vigilance Department chuan ACB hnenah chuan May 13, 2010 khan heng mite lakah hian thubuai siamsak turin a ti a, mahse, a hnu lawk, July 2, 2010 khan Vigilance Department hian thubuai hi kalpui leh lo turin ACB a hrilh leh thung a.

 

HC ah zualko, inlan loh vangin thubuai titawp

Hetianga sorkar in hma a lak tak thutah chuan PRISM chu High Court ah an zualko a, an zualko na hi Gauhati High Court Aizawl Bench in a ngaihtuah zui a, hetah hian inhnial a chhuak ta a ni.

GHC Aizawl Bench chuan hemi chungchangah hian October 10, 2010 khan final order a tichhuak a. Chutah chuan Chief Justice Madan B Lokur leh Justice H Baruah chuan heti hian an hmuh dan an sawi a. Petition hi September 13-a ngaihtuah tur a ni a, mahse, ukil ten hun a dil belh avangin an tukah ngaihtuah a ni a. Hetah hian petitioner te chu an inlan lova, chuvang chuan a hnu-a ngaihtuah leh turin tih a ni a. October 4 ah ngaihtuah a nih in petitioner te chu an inlan lo leh a, October 5 ah chuan an inlan loh leh avangin judge pahnih chuan, “Petitioner hian he thubuai hi bawhzui tlakah a ngai lo a ang,” an ti a.

PRISM chuan hetianga an inlan loh hi heti hian an sawi thung: September 13-a ngaihtuahna kha an hre lova, a tuk September 14-a ngaihtuah tur a nih kha chawpchilh taka an hriat avangin ukil ruai hman lovin an inlan ta lova. A hnu-a thu ngaihtuah tur tih pawh kha an hre lo leh a, chumi hnu chuan an petition chu hnawl a ni ta a ni.

 

HC in sorkar hmalak dan mak ti, chhui chiang turin thutlukna siam

Hetiang a nih tak avang hian thu ngaihtuah that leh dilna chu HC ah tho hian PIRISM chuan November 2010 khan an file leh ta a. GHC Principal Bench chuan an dilna hi pawmsakin thu hi a ngaihtuah zui leh a.

Mizoram Advocate General chuan HC hmaah hian thubuai hi chhuizui tlak a ni lo tiin nasa takin a sawi a, sorkar chuan CAG te, Public Accounts Committee te leh departmental enquiry te a chhui tir tawh hnu ah eirukna a awm lo tiin a sawi a.

Mahse HC chuan hei hi pawm lovin ACB in vawi thum lai a chhui hnu ah eirukna a awm a tih si avangin chhuina hrang hrang thu inhmu lo a tam a ti a. Tin, Vigilance Department in thubuai siam a phalna a hnukdawk leh pawh chu thilmak a tling a ti bawk a. Heng vang hian he thil hi uluk takin chhui tura tih ACB chuan a chhui a ngai a ni tiin March 17, 2015 khan thutlukna a siam ta a ni.

HC thutlukna hi Mizoram sorkar chuan Supreme Court ah a khing l>t a, amaherawhcu engineer engemawzat suspend an nih chuan sorkar in hna a thawk thei lovang ti mahse, SC chuan Mizoram khin l>tna chu a hnawl ve leh a. ACB in chhui tha lehin nikum kum tawp khan thubuai hi PC Act Special Judge Lucy Lalrinthari hmaah thlen a ni leh a, mahse, ziah tawh angin, trial puitling a awm hma in thubuai hi tihtawp a ni a.

 

Thubuai tih tawp duhtu in tih nun duh leh lawi si

Hemi vang hian PRISM lam pawhin court ah inlan tawh lo an rel thlu kha a ni a, sorkar chuan chanchinbu hrang hrangah he thubuai tihtawp dan hi an sawisel avangin PC Act Special Judge thutlukna hi High Court ah ngaihtuah that an dil leh ta lawi si a ni.

Hetia ngaihtuah that tura thlen a nih rual hian PRISM chuan court-a inlan leh zai an rel ta lo zel a. Hemi chungchanga TFD in PRISM President Vanlalruata a biaknaah ani chuan ex-CM Zoramthanga eirukna thubuai tih loh ah chuan complainant/thuhretu an nihna a awm a hriat mai tawh loh thu a sawi a, kha thubuai ah pawh khan koh an la ngaih leh ngaih loh a chiang lo tih a sawi a.  Thubuai an thehluh dang te chu a tawp tlangpui tawh ni-a a hriat thu a sawi bawk. Court a sorkar aiawha eirukna thubuai a ding thin ukil te pawhin hetiang tho hian an sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s