Chêt dawngdah vangin P&E Dept-in electric man ramtuileilo cheng nuai 7 chuang pek ngai

Gauhati High Court (Aizawl Bench) chuan court hniam zawk thutlukna siam danglam hret in electric man vanga a ban vei lam tan ngai ta hnenah zangnadawmna hlan turin P&E a ti

 

Aizawl Chhinga Venga chêng Rangchhunga te chhungkua chuan an choka bula Power and Electricity (P&E) Dept-in 11 KV electric hrui an zam chu a uai fual mah mah tiin vawi engemaw zat siamthat an lo dil tawh thin a. An choka atangin feet khat emaw vel leka hla ah hrui hi a uai nghe nghe.

P&E Dept chuan hrui sawn nan cheng 15,000 a ngai an tih avang hian an ngenna chu a hlawhtling hleithei lova. Chutih lai chuan kum 2002 October thla tawp khan kar khat emaw chauh awmpui anga an chhawr, nu leh pa nei tawh lo Lalramenga, khatih laia kum 20 mi chu hrui uai fual vang chuan electric in a man ta hlauh mai.

Damdawi inah hruai a nih hnu in chhuah tir leh nghal deuh mai a ni a, mahse, hun a kal zel a, a dam hleihtheih loh avangin kum 2006 khan damdawi in ah lut lehin chutah chuan doctor te’n Lalramenga ban veilam chu an tan sak ta a ni.

Hetianga electric in a man avanga ramtuileilo (a taksa za-a sawmsarih che tha thei lo) a nih tâk ah chuan Lalramenga hian P&E Dept chu court ah Money Suit kaltlangin November 2010 khan zangnadawmna cheng nuai 30 pe turin a khing ta a.

A khinna chu Aizawl District Court-a Senior Civil Judge in a ngaihtuah hnu ah kum 2013 June thla khan P&E Dept chu a che dawngdah a ni tiin court chuan Lalramenga hnenah hian cheng nuai 7.44 pe turin thutlukna a siam a. Mahse, Mizoram sorkar chuan Senior Civil Judge thutlukna chu pawm harsa tiin Gauhati High Court (Aizawl Bench) ah a khinglêt ta a.

Mizoram sorkar chuan a khinlêtna ah hian thu hrang hrang a sawi a. A hmasa berah chuan Lalramenga hi electric in a man tih finfiahna engmah a awm lo a ti a. A chhan chu khatia electric in a man khan FIR thehluh a awm lova.

Tin, Dept kalphungah chuan hetianga electric man an awm reng reng chuan SDO in darkar 48 chhungin report a thehlut tur a ni a, khatih hunlai khan SDO in report engmah a thehlut lo thung.

Chu bakah, Lalramenga’n electric in a man vangin hliam a tuar a ni ti-a lehkha pawimawh a chhawpchhuah te chu electric in a man hlimchhawn ami ni lo in a hnu, kum 2006 ami vek an nih thu sorkar chuan a sawi bawk a.

Senior Civil Judge in Lalramenga zangnadawmna dawn tur a chhûtna, tawhsual a tawh laia thla khata cheng 3,500 hlawh thin a tih chu finfiahna awm lo tiin sorkar chuan a sawi bawk.

Hetih lai hian, Lalramenga chuan FIR hi thehluh a ngai tih te a hriat loh avangin a ban tan a nih hnu, kum 2006 November thla khân Aizawl Police Station ah a kal a, ziakin a thehlut a, chu chu lo pawmin police chuan Civil Hospital ah Lalramenga damloh dan hrang hrang lehkha pawimawh te an la chhuak a, an endik vek bawk a. Hengte hi court ah hian phawrh vek a ni a.

Lalramenga ukil LH Lianhrima chuan Gauhati High Court (Aizawl Bench) tho in kum 2009-a mipa naupang pakhat electric man vanga a ban leh ke zawng zawng tan ngai hnenah cheng nuai 9.35 zangnadawmna a lo hlan tawh dan thutlukna chu a phawrh bawk a. Court ah hian Labour and Employment Dept in khatih laia thiamthil nei lo kuthnathawkte chuan ni khatah cheng 84 aia tlem lo an hlawh tur a ni ti-a a thu chhuah te pawh phawrh a ni bawk a.

High Court chuan a ngaihtuah chian hnu ah Lalramenga chuan tawhsual a tawh laiin thlatin cheng 3,500 a hlawh thin reng a ni tih finfiahna a awm loh vangin Senior Civil Judge in hemi behchhana Lalramenga zangnadawm tur a chhût dan chu a dik lo tiin a hnawl a.

Mahse, thiamthil nei lo kuthnathawte ni khat hlawh bituk atang chuan thla khatah cheng 2,520 aia tlem lo a hlawh tur a ni hrim hrim a ti thung. Hetia a ngaihtuahna ah pawh hian Lalramenga awm thinna a nu ber Huapliani, electric in a mana mita hmutu ni bawk thusawi te pawh a ngaihtuah a. Hetiang a nih vang hian electric in a man vanga ramtuileilo ta mai Lalramenga chuan zangnadawmna cheng nuai 7.29 chu a phu tiin P&E Dept hi heti zat hi pe turin February 15 khan HC in a ti ta ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s