HM sawi angin Krismas vuakveta rui man te thla khat tang vek lo

Krismas Urlawk ni atanga kumthar tirha MLPC Act bawhchhia man mi 86 zinga eng emaw zat chu kar hnih chauh tang an awm rualin ni khat chauh tang pawh an awm a ni

 

Home Minister R Lalzirliana’n December 19, 2016-a Krismas thuchah a sawiah Krismas vuakvêta thil sual ti mante chu a rei lo berah thla khat tal jail-ah tantir an ni dawn tih sawi mahse, The Frontier Despatch (TFD) in Mizorama Police Station zawng zawnga RTI dan hmanga Krismas vuakvêta man te man an nih chhan leh an tan rei zawng a zawhna chhanna atanga a lan danin Home Minister thusawi ang hian ruih vanga man te thla khat an tang vek lo a ni.

Vanglaini chanchinbu in December 20, 2016-a Home Minister thusawi a ziah dan chuan, Krismas vuakvêta thil sual ti mante chu a rei lo berah thla khat tal jail-ah tantir an nih dawn tih sawiin, “Khawtlang a thianghlim zawk a, mipuite’n hlim tlang taka he hunpui hi an hman theihna turin tunah hian YMA branch tinte uluk takin an duty a, ruihhloa buai te, zu rûia buaina siamte Krismas vuakveta mante chu a rei lo berah thla khat chhung jail-ah tantir tur an ni dawn a, mi tin fimkhur turin ka ngen a ni,” a ti.

RTI channa atanga a lan danin, December ni 24, 2016 atanga January ni 2, 2017 inkar khan Aizawl District ah Mizoram Liquor (Prohibition & Control) Act, 2014 bawhchhia mi 44 man an ni a, an zinga 22 chu thla khat lung in an tang a, a bâk 22 zinga 17 te chu ni 15 an tang a, mi pahnih te chu ni 10 an tang a, mi 16 te chu ni thum chhung vantlang hna thawh tir an ni.

Lunglei District ah chuan hemi hun chhung hian MLPC dan bawhchhia mi 23 an man a, mahse, heng mi 23 te tan hun chhung zawhna chu chhan a ni lo.

Mamit District ah chuan  December ni 24, 2016 atanga January ni 2, 2017 inkar khan MLPC dan bawhchhia mi panga an man a, heng mi panga te hi ni khat theuh an tan hnu ah  PR bond hmangin chhuah vek an ni.

Kolasib District ah chuan hemi hun chhung vek hian MLPC dan bawhchhia mi pasarih man an ni a, heng mite tan hun chhung RTI zawhna chu chhan a ni lo.

Kolasib District-a Bairabi Police Station chuan hemi chhung hian damdawi rui avanga man an nei a, Court ah pawh hruai ni mahse, a boral zui.

Serchhip District ah chuan hemi hun chhung tho hian MLPC dan bawhchhia avangin mi paruk an man a, heng mi paruk te tan chhung hi chhan a ni lo.

Siaha leh Lawngtlai District ah chuan hemi hun chhung hian rui buai man an awm lo a, man hrim hrim erawh Siaha District ah 12 leh Lawngtlai District ah 13 an awm a.

Champhai District ah chuan December ni 24, 2016 atanga January ni 2, 2017 inkar khan MLPC Act bawhchhia man an awm lo.

Hetih lai hian, PRISM chuan Home Minister R Lalzirliana thusawi hi chhang letin Krismas vuakveka man te jail tan chen tur a sawi avangin Separation of Judiciary chu rinhlelhawm an tih thu February 21, 2017 khan an sawi a.

PRISM hian eirukna thubuai ah Mizoramah tumah man an la awm mang loh laia Court-a an inlan loh avanga man an ni chu an hrethiam lo hle a. Hemi chungchang an sawina ah hian Home Minister in Krismas vuakveta man te tan hun chhung a sawi mai chuan a hranpa-a Court inrelbawlna chu an rinhlelh thu an sawi.

 

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s