NI RUK SECRETARY

A aia officer senior in a pian kum a thlak hnuhnawh vanga Additional Secretary-a pension tura inngai MCS officer chu sorkar-in ngaihtuahna thar a sen hnuah Secretary ah a kai hlauh a, ni ruk chhung sorkar-a post sang ber a chelh

FB-20170214_153947
PHOTO: H Laizika

Kum 35 chhung sorkar hna a lo thawh tawh hnu-a a pension ni tak mai chuan H Laizika chu a damlo hlauh a, a officer pui te’n an thlahna hun siam ah pawh a tel thei ta lo.

Falkland Venga an chhungkua-a an chenna inah a kut veilam a venflon vuah chungin ni a hmang a, mahse, a phone erawh a ri zauh zauh a, office lama a naute’n a bungrua sawn dan tur an zawhna chu a chhang zel a. A hnu lawkah office lama an nau pakhat chuan lehkha a rawn pe a, a en vang vang hnu ah chuan nuihza deuh takin, “Hei ka Secretary chhunga ka pay slip a lo thleng a nih hi,” a ti a.

February 23 (Ningani)-a Addl. Secretary atanga Secretary-a kaisang H Laizika, Mizoram Civil Service officer chuan a hna thar chu ni 6 chauh a chelh hman a, a pension zui nghal a. Mahse, an service chungchanga a hmalakna avangin MCS officer 10 te chu an kaisan phah dawn niin a lang.

Kum 1991-a MCS-a lut hi MCS officer te kaisan theihna sang ber Supertime A (MCS officer te tana Secretary post) hi nikum October 1 atanga chelh thei ni mahse, amah aia senior pakhat B Lalhmingthanga’n  a pian kum siam that a dilna chu kum 2014 khan sorkar in a pawmsak a, kum thum laia a service pawhsei a nih tak avangin H Laizika chuan Addl. Secretary ah hian a hun tawp a hmang dawn niin a inhre hman.

Amaherawhchu, B Lalhmingthanga kum thlak chungchang hi The Frontier Despatch (TFD) chanchinbu ah a lan hnu leh H Laizika hian ennawn a dil hnu in, B Lalhmingthanga kum thlakna a lo pawm tawh chu sorkar in pawm leh lo hnuhnawh a, a pension tir thut tak avangin rin loh laiin H Laizika hi a Secretary ta a ni.

H Laizika hi kar khat tling lo deuh (sorkar hnathawh ni anga chhut phei chuan ni li chauh) Secretary post chelh mahse, New Secretariat lamah a insawn lem lo a, a chanpual department tur pawh sorkarin a siamsak lem lo bawk.

Thawtanni zing tina sorkara Secretary rual Chief Secretary hova an inhmuhkhawm naah pawh a tel ve ta lova, a Secretary tak hnu-a hetiang inhmuhkhawm hmasa ber, awmchhun leh hnuhnug ber ni nghal vek, February 27 ami ah pawh a hming chu lam nimahsela a tel ve lo.

 

Service kum thlak danglam

TFD in a lo ziah thin tawh angin MCS officer zinga senior ber B Lalhmingthanga chuan kum 1986-a MCS a zawm tirha  a pian kum, June 6, 1956 chu thlak danglam a dil angin kum 2014 khan June 6, 1959 tiin sorkar chuan a pawmsak a. Mahse, TFD in November 18, 2016 khan PWD CE pakhatin a service kum thlak danglam a tum dan leh Mizoram sorkar hnathawk meka service kum thlak danglam chungchang a ziak a, an zingah hian B Lalhmingthanga a tel ve thu te, sorkar hnathawkin an service kum thlak danglam an duh chuan service-a an luh atanga kum nga chhungin dilna thehluh theih a nih thu te, B Lalhmingthanga’n a service kum thlak danglam a hlawhtlin chu service-a a luh (1986) atanga kum 28 hnu a nih thu leh hei hi Supreme Court leh sorkar laipui dan kalh a nih thu ziah lan a ni.

 

H Laizika’n a pu kum ennawn turin sorkar ngen

MCS Supertime B officer zinga senior ber H Laizika chuan MCS officer-a an senior B Lalhmingthanga’n a kum a thlak danglam chungchangah TFD chanchinbu behchhanin (TFD in Supreme Court leh sorkar laipui dan a ziah nen) DP&AR Secretary hnenah an pu kum thlak danglam chungchang ennawn turin a ngen a, a ngenna hi sorkar chuan pawmin February 6 khan  Horticulture Secretary B Lalhmingthanga chu pension in a chhuah tir ta a.

MCS in Secretary post pali an neih zinga post khat a ruah tak avangin DP&AR chuan post ruak hnawhkhat turin Mizoram Public Service Commission ah thil tul tihfel ngai a thawn a, February 23 khan MPSC chu thu khawmin H Laizika chu Secretary-a kaisang turin sorkar ah a rawt a, hemi ni tlai hian sorkar chuan Secretary-a H Laizika kaisan theihna order a tichhuak nghal a ni.

 

Kan service tana ti ka ni: Laizika

H Laizika chuan kum 1982 khan Administrative Office (AO) ah a lut niin TFD a hrilh a, kum 1991 khan MCS ah kaisangin Addl. Secretary ah pension tawh tura a inngaih laiin TFD chanchinbu thuziak avangin an service tan a pu kum ennawn chu a dil ta ni-a sawiin, “Kan pu kha ka hek lo a, a kum ennawn ka dil mai a ni a, a titu ber nih a nawm loh avangin kei kha a tuartu ber ka lo ni bawk nen, kan Service (MCS) tana ti ka ni. Hetianga Secretary-a ka kaisang hi ka lawm a, ni ruk chhung chauh ni mah sela, ka thil tih avangin MCS officer 10 lai an kaisang thei tur hi ka lawm a, TFD chanchinbu chungah ka lawm hle bawk a, khatiang thu kha ziak lo ta se tuna ka thil tih hi ka ti ngam dawn lo a, MCS officer 10 te pawh hi tuna an kaisanna ah hian an kaisan theih rih loh phah ang,” a ti a ni.

 

Ombudsman ni nghal

Tualchhung sorkar kan tih – Municipal, Local leh Village Council – te’n buaina an tawh changa thuremtu tur Local Body Ombudsman hna chu H Laizika hian March 1 atang khan a thawk nghal a, sorkar-a a pension hma pawh khan he hna hi thla 7 lai a lo thawk tawh a, a thawh chhung hian Village Council pariat thubuai a chinfel sak tawh nghe nghe.

 

MCS officer-te’n an lawmpui rualin an ui

Addl. Secretary-a pension tawh tura an ngaih leh MCS officer 10 lai kaisan theihna tura kawng sialtu H Laizika hi MCS-a a officer puite chuan Secretary-a a kaisan chu an lawmpui thu an sawi a, “Pa thluak fim leh nem tak, hna thiam tak leh dikna duh mi a ni a, Secretary-a  a kaisang hi kan lawmpui hle rualin ni ruk chauh thawka a pension a hun ta mai hi kan ui hle a ni,” an ti a, chutih rual chuan a pension ruala hna dang thawh tur a nei nghal chu an lawmpui thu an sawi.

 

MCS officer 10 kaisang

H Laizika’n an pu kum ennawn a dil hlawhtlin hnu leh, amah Secretary-a a kaisan hnu, February 28-a pension-a a chhuah hnu khan MCS officer 10 te chu an kaisang ve nghal a, Supertime B atangin R Lalramnghaka leh Lalzirmawia Chhangte te chu Supertime A (Secretary) ah an kaisang a, Selection Grade atangin mi pahnih chu Supertime B ah an kaisang dawn a, hetiang  zel hian JAG, Senior Grade leh Junior Grade atangin mi pahnih zel chu kaisang tura ngaih a ni.

 

IPS officer pahnih pension bawk

IGP LT Hrangchal leh Mizoram Home Guard Commandant General Lalhruaia te pawh February 28 khan pension in an chhuak a, heng officer pahnih te hi senior police officer-te’n an thlah a ni.

Engvangin nge March 1 ah sorkar hnathawk tam tak an pension thup?!

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s