NIAS buaina dai tawh mahse a kaihhnawiha thil dik lo dangin sawi hlawh chhunzawm

Nitin chanchinbu lian te’n NIAS buaina in a phawrhchhuah thil felhlel te an ziah chhunzawm zel laiin eptu party leh pawl dang te’n mawhphurtu ni-a an rin te an dem, hrem ve phut

nias

NIAS, Kolkata-a Mizo zirlai tirh chungchanga buaina nawlpui chu reh ta deuh mah se, Mizoram a nitin chanchinbu lian pahnih, Vanglaini leh The Aizawl Post chuan hemi kaihhnawiha sorkar kalphung chu an zirchiang zui zel a, eptu party leh pawl thenkhat pawhin an la sawi hmaih bik lo.

Tarlan tawh angin NIAS, Kolkata-a zirlai te tirh chungchangah hian thu thuang hnih a awm a. Pakhat chu zirlaite’n nawrh an huaihawt nachhan, zirna in thawk tha lo-a sawi a zirlai engemaw zat Mizoram Building and Other Construction Workers’ Welfare Board (MBOCWWB) leh Mizoram Youth Commission in an thawn chungchang a ni a.

Hemi piah lamah hian zirlaite an thawnna pawisa cheng vaibelchhe engemawzat hman chu insak lama hnathawk leh inhlawhfa te tan chauha hman tur a ni zawk a. Hetianga MBOCWWB pawisa hman dik loh bakah hian Welfare Board chhunga thil awmdan leh a hmalak dana thil rinhlehawm te nitin chanchinbu te hian an ziak tlangpui a.

 

Welfare Board ah pawisa tam tulh tulh, hnathawk inziak l<t leh hamthatna dawn tur tlem tulh tulh

February 27 chhuak Vanglaini chuan Welfare Board ah hian hnathawk pawl chi hrang hrang hruaitute chu member ni ve mahse, an hriat lohin hemi board kalphung/dan chu assembly ah put luh niin passed a ni tiin a ziak a, hemi pawh hi an sawisel avangin siamthat an tum mek niin a ziak bawk.

Hemi piah lamah hian Vanglaini vek hian RTI chhana behchhanin Welfare Board pawisa hmuh dan leh hman dan ah thil felhlel niawm a ziak a, “MBOCWWB ah hian member zat a tlahniam zel a…. scheme tharah member-te hamthatna tam tak chu tihhniam a ni a, contractor te sum chhun luh erawh a tam tulh tulh,” a ti.

Kum 2012-14 chhungin kuthnathawk 19,000 chuang ziah luh an nih laiin a kum leh ah chuan mi 2,300 tling lo chauh ziah luh an ni a, kum 2015-16 ah phei chuan 342 chauh an inziak lut a, a kumleh ah phei chuan inziak lut hi 154 ah a tla tawh nghe nghe. Welfare Board ah hian kuthnathawk te hi inziak lut mahse, kumtin an registration hi renew a ngai a, chuvang chuan hetianga a tlakhniam nachhan hi a tira in register an tam avanga in register belh tur an awm tawh mang lo tia sawi theih a ni lo.

Amaherawhchu hetianga hnathawk in register an tlem zel lai hian Welfare Board ah contractor ten an hnathawhna sum atanga 1% an thehluh chu an thehlut chhunzawm mai ni lovin a pung zel zawk a, 2010-11 a cheng nuai 1.61 an chhun luh kha pung zel in kumin chhung hian cheng nuai 11.57 a tling tawh thung.

Pawisa hi tam tulh tulh mahsela, hnathawke hamthatna chu tihhniam a ni daih thung a, death benefit tih te, marriage assistance te leh medical assistance te chu a tlahniam nasa hle thung tiin Vanglaini chuan a ziak.

 

Welfare Board hnathawk lak dan kalh vekin

Hemi ni vek hian The Aizawl Post chuan Welfare Board hna lak dan a ziak thung a, he chanchinbu sawi dan chuan post 20 lai chu board hriatpuina tel lovin siam a nih mai bakah a thawk turte lak an ni a. Tin, Welfare Board-a post 32-a hnathawk zawng zawng te chu dan zawm lova lak vek an ni a, a latute hi hnalakna-a thuneihna nei lo vek an ni bawk tiin a ziak. Tin, Welfare Board-a Muster Roll-a thawk driver te pawh kumtin an hna hi tihnun thar leh tur a nih laiin tihnun awm lovin an thawk chhunzawm vek mai a ni a ti bawk.

Hemi hma hian The Aizawl Post leh Vanglaini chuan February 24 khan Chief Minister Lal Thanhawla thusawi ziak in NIAS hian Mizoram sorkar hnenah cheng nuai 42 a pek kir tawh thu an sawi.

 

C Laltlanmawia damlohna senso rul

Mizoram sorkar chuan February ni 24 tlai lam khan NIAS, Kolkata zirlai ni thin C Laltlanmawia hnenah a zirlaia a damloh inenkawlna senso cheng nuai 1.21 chu a rul. Hetia a rulh takah chuan C Laltlanmawia’n a ukil JC Lalnunsanga kaltlanga a thil phût pahnih zinga pakhat chu sorkar hian a hlen ta tihna a ni.

Hetianga rulh an ngen nachhan chu kum 2014-a MBOCWWB/MYC leh NIAS in thawhhona thuthlung an ziah ah zirlai in damlohna a tawh chuan NIAS-in enkawlna senso an tum ang a, zirlai nu leh pa hnen atangin rulhna an la leh thei ang tih bakah, nu leh pate’n an rulh theih loh chuan sorkar in a tumsak tur a ni ti-a inziak behchhanin a ni.

C Laltlanmawia chuan  hetia a damloh laia a insenso na man sorkar in a rulh chungchangah hian an thil ngiat zinga pakhat chu an hlawhtlinpui ni-a a hriat thu a sawi a, hetih rual hian amah leh a zirlai pui te’n a huho-a an ngiat, NIAS-a an zirlaia an in sensona hrang hrang vanga zangnadawmna an phût chu an nawr chhunzawm zel dawn niin a sawi. C Laltlanmawia sawi dan chuan zirlai 32 te hian zangnadawmna cheng nuai 4.10 chuang theuh (a belhkhawmin cheng vaibelchhe 1.31) an phût a ni.

 

CM pawh a bang tel ve tur a ni: ZNP President

Nitin chanchinbu lian pahnih in an ziah bakah hian eptu party Zoram Nationalist Party chuan hemi chungchangah hian sorkar a beih chhunzawm zel a.

An President Lalduhoma chuan party mite hmaa February 27-a a thusawina ah NIAS buaina avanga Minister leh MYC Chairman an ban thu sawiin, “CM hi midangte banna pawm tlak a ni bik em ni? tih hi mipui zawhna a ni. Media hrang hranga a lan dan in he Fund hmang dik lo hmasatute zingah CM ngei hi a tel ve tlat a ni… 2013 inthlan dawn tep khan CM bial Serchhip leh Thenzawlah mi 760 hnenah he Fund atang hian Rs 26,34,000 sem a lo ni reng mai. A mak lehzualna chu an vai hian nikhat thil thuah (October 4, 2013) an dawng rual vek thei kha a ni. A kum leha Mizoram pumpuia Welfare Fund an sem chhuah aiin CM biala ni khata an sem hi a tam zawk nghe nghe bawk a ni,” a ti.

 

CM leh a hnuaia official engemaw zat man ni ve rawh se: PRISM

PRISM pawhin hemi chungchangah hian sorkar an bei chhunzawm a, February 27 vek khan an President Valalruata chuan, “Sorkar tha leh awmze nei chu nei ila tunhnaia kuthnathawktu te chanai hman dan dik lo lo lang zing ami, CAG Report meuha lang, dik lo taka he sum lo puktu mi pali, a hun laia LE&IT Director te, ITI Principal te, MYC Secretary te leh LE&IT Director PA te hi man ngei tur an ni a.

“Kum 2013 inthlan dawna he sum hi campaign nana hman ni-a sawi hi a dik a nih chuan a hun laia Chief Minister Lal Thanhawla te, LE&IT Minister Lalrinliana Sailo te leh he fund hmanga campaign mi dang te hi man ngei tur an ni a. He sum hmanga MYC Chairman inah cheng nuai 150 senga hostel an siam ni-a sawi hi a dik chuan a hun laia MYC Chairman T Sangkunga hi man ngei tur a ni a.

“NIAS leh institution dang hrang hrang hnena dan kalha sum pek dan te, NIAS in cheng nuai 42 a pe kir leh ni-a sawi te, leh thil dik lo dang hrang hrang awm ni-a sawi te hi a dik a nih chuan a hun laia LE&IT Minister Lalrinmawia Ralte leh heta inhnamhnawih dang – LE&IT Department-a thawk te, Welfare Board-a thawk leh member te, Youth Commission-a thawk leh member te hi man ngei tur an ni a.

“Chumai ni lovin institution hrang hranga mi, heng thil dik lova inhnamhnawih te leh, thawhna nei miah si lova heng thil atanga hlawkna lo tel ve ringawt ho pawh hi man ngei ngei tur an ni,” tiin an pawl inhmuhkhawm naah a sawi ve bawk.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s