Tunhnai ah pisa rawk awm fo, thawktu inhnamhnawihna a tam

Mizorama sorkar pisa hrang hrang, a then phei chu silai nena ven reng te pawhin rawk an tawk fo a, pawisa fai bakah a chhunga bungrua eng emaw zat a bo thin. Police te’n an chhuina ah pisa-a hnathawk te emaw an chhungkhat laina te emaw an inrawlh fo tih an hmuchhuak tawh a. Hetianga pisa rawkna thenkhatah chuan pawisa awmna hmun hrechiang tak an inhnamhnawih tih a lang

 

Mizoram sorkar pisa tam tak te chuan rawk an tawk ve thin a, heng pisa rawk a niha police-te’n a titu an zawnin thawktute emaw, thawktu chhungkhat laina hnai emaw an tam hle a ni.

The Frontier Despatch (TFD) chuan Aizawl SP hnuaia Crime Branch chu Aizawla Police Station hrang hrangin pisa rawk chungchanga FIR an dawn a zawt a, police te chuan pisa rawk an chhuina ah a rawktu chu pisa-a thawk an nih loh chuan an chhungkhat laina hnai te an ni duh viau niin an sawi a, thawktute emaw, an laina hnai emaw te in pisa an rawkin sum an la deuh tlangpui bawk.

 

GHC Aizawl Bench tum hnih rawk

Vaivakawn Police Station hnuaia Zonuam Police Out-Post ah chuan nikum chhung khan Gauhati High Court Aizawl Bench atangin an office rawk chungchangah FIR tum hnih an thehlut a.

A hmasa zawk chu February 15 khan Asst. Registrar MC Kailiana chuan a thehlut a, hetah hian Judge Chamber rawk a nih thu sawiin hemi tum hian a rawktu hian Rs. 21,000 man computer CPU, Rs. 1,599 man electric meilum leh Rs. 1,500 man electric ketli an lâk thu a sawi a, heng bungraw bo te hi ni February 12 (Zirtawpni) tlaia pisa an khar chuan a la awm ni-a sawiin, bungraw bo hmuhchhuah sak a, a titu laka hremna pe turin a ngen a ni.

Nikum December thla khan Gauhati High Court Aizawl Bench hi mi tu tih hriat loh in an rawk leh a, December 12 khan Superintendent R Zomawia chuan Zonuam Police Out-Post ah bawk FIR thehlut lehin FIR ah chuan Account Section rawk a nih thu te, he room-a steel almirah pakhat chu kar chhiat a nih thu leh a chhunga Rs. 76,500 a bo thu te sawiin, pawisa bo hmuhchhuah sak a, a titu laka hremna pe turin a ngen a ni.

GHC Aizawl Bench tum hnih rawk a nih chungchangah hian police te chu a hmunah kalin thil awmdan an enfiah a, rinhlelh man pawh nei mahse, an mi mante hian an phat tlat avangin leh forensics lam nena an tan pawha anmahni ngei an ni tih an finfiah theih loh avangin tun thlengin a titu tak an la man chhuak thei lo a. High Court hi pawn lamah CRPF lamin uluk taka an ven avangin a titu chu thawktu emaw, thawktu chhungkhat laina hnai tak emaw, Court hre chiang tak a nih an rin thu an sawi.

 

Helicopter ticket man ru bo

Nikum November 8 khan GAD Aviation Wing Dy. Controller Saidenga chuan Aizawl Police Station ah FIR thehlut in a hma zan (7.11.16)-ah an office rawk a nih thu leh a titu zawn chhuah sak turin a ngen a. FIR bawhzui hian police te chu GAD Aviation Wing pisa ah hian an kal a, he pisa-a almirah paruk zinga sum an dahna chauh chu he pisa rawktu hian kar chhia in a chhunga Rs. 5,47,180 chu a la a, police te chuan pisa rawktu in almirah zinga sum an dahna kher a rawk tih an hriat hian thawktute zing ami emaw, thawktu chhungkhat laina hnai tak emaw a nih an ring a. Ngun taka an chhui hnu ah he pisa-a peon pakhat chawlh la mek ai kal nu pakhat pasal hlui Zohlimpuia (35) Khatla JL High School bula cheng chu he pisa rawktu a ni tih hmu chhuakin ni thum hnu, November 11 ah an man a, Rs. 5,47,180 a ruk atangin Rs. 5,00,000 vel an hmu kir thei a, amah hi thubuai siamsakin Court in lung inah a khung tawh a ni.

 

Health Department cheque hmangin Bank atangin cheng nuai 5 lak chhuah a ni

Health Department chuan nikum June thla tir khan State Bank of India Vaivakawn Branch-a an account chu an update tir a, hemi tum hian Rs. 5,00,000 a kim lo tih an hre chhuak a. An pawisa kim lo hi an department cheque hmangin Dr. Lalbiakzuala leh Dr. Vanlalhuma te  signature lem hmanga lâk chhuah a ni tih an hre chhuak a, hemi hnu hian National Health Mission Director Dr. K Lalbiakzuala chuan Vaivaiawn Police Station ah FIR thehlutin sum la chhuaktu zawn chhuah sak a, a laka hremna pe turin an ngen a ni.

Police te chuan FIR bawhzui hian Health Department office leh Bank ah hian an kal a, thil awmdan te an zawhfiah hnu leh Bank-a CCTV thlalak hlui te an en a, hemi hnu hian cheque hmanga sum la chhuaktu chu an department-a a nghet lo-a thawk pahnih Hmingthanzauva leh a nupui a ni tih an hre chhuak a, an nupa hian Court ah man hma-a chhuah phalna lo dil hman mahse, Court chuan Hmingthanzauva dilna hi a hnawl a, a nupui erawh naute nei mai tawh tur a nih avangin bail hi phalsak a ni a,   police te chuan Hmingthanzauva hi manin thubuai an siamsak a, mahse, a hnu ah bail in a chhuak leh a ni.

 

Assembly Secretariat rawktu an pisa hnathawk nih vangin ngaidam

June 17, 2015 khan Assembly Dy. Secretary, C Lalbiakthanga chuan Aizawl Police Station-ah FIR thehlutin April ni 16 leh June ni 17 inkar khan Assembly Annexe building kudam-a motor ke 12 chu a bo a, pawi khawihtu chhuichhuah sak a, hremna pe turin a ngen a ni.

FIR bawhzui hian police-te chuan Assembly kudam rawktu, R Zothansanga (33) leh Isaac Zothanpuia (32)  Assembly Secretariat-a thawkte chu an man a, an kudam atanga motor ke an ruk 12 zinga 10 pawh hmu kirin a leitu mi pahnihte nen an man a, an pali hian police te chuan Court-ah hruaiin hremna pe turin an ngen a ni.

Assembly Secretariat chuan Court-ah lehkha thawnin an office chuan pawikhawihtu mi pahnih – R. Zothansanga leh Isaac Zothanpuia – te chu an ngaihdam thu te, FIR an hnuhkir thu leh hremna pe lo turin a ngen a, anmahni office-in Home-a dah an tum tih pawh a hrilh a ni. Police te chuan, Assembly Secretariat thil tih dan chu tha lo an tih thu leh, dan anga kal tlang tha zawka an hriat thu an sawi a ni.

 

Pisa leh zirna in 32 rawktu man

Nikum August 14 khan Sialsuk High School-a computer part thenkhat chu a bo tih hriatchhuah niin hemi ni hian Sialsuk Police Station ah FIR thehluh a ni a, vanduai thlak takin he school rawktu hian a wallet a thlauh avangin police te chuan pisa leh zirna in 30 chuanga computer ru thin chu an man chhuah theih phah a ni.

Kum 2014 atang khan Aizawla Police Station hrang hrangte chuan zirna in leh pisa atangin an computer part thenkhat a bo tih report an dawng tan a, police te hian Durtlang, Maubawk, Sihphir, Thingsul leh Tuirial-a zirna in atangin heng complain te hi an dawng a, kum 2015 leh 2016 khan Reiek, Muallungthu, Saikhamakawn, Sateek, Sakawrtuichhun, Sairang leh Lengpui te bakah Kolasib, Serchhip leh Thenzawl ah te pawh zirna in leh pisa-a computer part thenkhat chu a bo tih an hre zel a.

Computer part bo avang hian Police Station pariat – Aizawl, Bawngkawn, Kulikawn, Vaivakawn, Sialsuk, Kolasib, Serchhip leh Thenzawl te bakah Zonuam Police Out-Post – te chuan thubuai 32 an ziak lut a, misual hi a chet danah hnu chhui a harsat bakah a chetna hmun a inkar kik theih em avangin Aizawl SP Lalhuliana Fanai chuan he rukru chhui bing turin mi panga awmna Special Investigation Team (SIT) a din ta a.

SIT te hian he rukru mi man ngei tumin theihtawp chhuah mahse, a hnu chhui harsa an ti hle a, mahse, vanneihthlak takin he rukru hian Sialsuk High School a rawkna ah a wallet a thlauh avangin police te chuan rukru hi an man chhuah theih phah a ni.

Wallet chhungah hian TC Lallawmkima driving license a awm a, amah hi Aizawl Zotlang Venga mi in luaha khawsa a ni a, mahse, TC Lallawmkima hian social media hrang hrangah a wallet a tih bo thu a sawi a, police-te’n an zawhfiahna ah pawh a wallet chu a tih bo thu a hrilh nghe nghe a. Police te chuan ‘miin an wallet an tihbo chuan mi rinawm takin an chhar anih loh chuan wallet chu hmu leh pawh ni se, a chhunga pawisa awmte chu a bo tawh thin a,’ mahse, Sialsuk High School chhunga wallet an chhar chhungah erawh chuan pawisa a la awm avangin TC Lallawmkima’n a wallet chu a tihbo thu a sawi chu an awih sak lo a, thu an zawhfiah leh hnu ah Lallawmkima hian pisa hrang hrang leh zirna in hrang hrang a rawk dan chu a sawi ta a ni.

TC Lallawmkima chuan college pasarih, school 22 leh sorkar pisa pathum atangin computer set 24, computer hard-disc 16, CPU pali, motherboard paruk leh Rs. 8,500 a la a, heng a thil ruk te hi Facebook-a Buy n Sell, Swappin, Zobay Group leh WhatsApp group ah te zuarin a hralh thin a ni. Ani hian computer lam thil a ruk chhan chu Youtube atanga a inzir atangin computer part thlawn dan a zir thiam niin police te a hrilh.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s