Khehpuam vanga Mizorama lung in tang hmasa ber in hrem a nih dan ennawn dil, Gauhati High Court-in remti

Mizorama khehpuam ti-a hriat lar, pseudoephedrine tawlh rûk vanga ND&PS Special Court in lung ina a khung hmasak ber Lalthuama chuan hrem a nih dan ennawn a dil a, GHC chuan a dilna hi phal mahse, a ukil-in bail-a chhuah phalsak a dilna leh hrem hi a phu em tih emaw khehpuam a tawlh hian dan a bawhchhe reng em tih emaw chu a ngaihtuah zui sak lo

 

Damdawi

Mizorama khehpuam a inhnamhnawih, ruihhlo dona dan ND&PS Act hnuaia lung ina tan tir hmasak ber chuan tunhnai khan Gauhati High Court (Aizawl Bench) ah ND&PS Special Court-in a hremna chu ngaihtuah nawn a dil a, GHC chuan a dilna hi pawmsak in ND&PS Special Court chuan an hremna chu ngaihtuah nawn leh turin ti mahse, a ukil in bail-a chhuah a dil tel sakna chu a pawmsak lo thung.

Lalthuama, Aizawl Tuikual “C” a cheng chu nikum October thla tawp khan ND&PS Special Judge Liansangzuala chuan khehpuam ti-a hriatlar, ruihhlo siam nana hman thin pseudoephedrine a tawlhruk avangin hrehawm taka kum nga lung in tang tur leh cheng sing nga (Rs 50,000) chawi turin a chungthu a rel a.

Lalthuama hian tunhnai khan hremna hi ngaihtuah nawn leh dil in GHC chuan he thu hi March ni 1 khan a ngaihtuah a. Justice Nelson Sailo chuan Lalthuama ukil JC Lalnunsanga thu thlen angin ND&PS Special Court hian hremna a ngaihtuahna ah Lalthuama chu thusawina hun a pe ve lo a ni a ti a.

JC lalnunsanga chuan Supreme Court chuan thilsual ti-a puh te chu thilsual ti tawh ngei a ni tih court ah finfiah ni mahse, hrem an nih dan tur chu court in a ngaihtuah laiin an thiamthu sawina hun siamsak ve tur a ni tiin thutlûkna a lo siam tawh thin a, chu chu GHC Division Bench ngei pawhin a lo zawm tawh tih a sawi a.

Court hniam zawka a chungthu ngaihtuah a nih laiin Lalthuama aiawha ukil ding thin chu a boral hlauh thu te leh khatih hunlai khan thilsual ti-a puhmawh te din sak thin tu, defense counsel te’n hlawh chungchanga an hnathawh an tihtawp lailawk lai a nih thu te a sawi bawk a.

A ukil chuan hetianga a hremna thu ngaihtuah that a nih chhung hian Lalthuama chu hrem a nih hma pawhin bail-a chhuah lai mek a nih vangin bail a chhuah phalsak nise tiin a ngen bawk a.

Sorkar ukil, Public Prosecutor AK Rokhuma chuan court hniam zawk hian Lalthuama chu thiamthu sawina hun pe se duhthusam a nih thu a sawi ve bawk a. Mahse, ukil JC Lalnunsanga’n bail a chhuah lailawk a dilna erawh chu phalsak chi ah a ngaih loh thu a sawi thung a, Lalthuama chu khehpuam mum nuai hnih leh sing thum (2,30,000) zet tawlhru a nih vangin bail phalsak chi a nih loh thu a sawi bawk.

Justice Nelson Sailo chuan court sang zawk thutlukna a lo awm tawh avang leh ND&PS Special Court chuan Lalthuama hrem dan tur a ngaihtuah lai hian amah Lalthuama chu dan in a phût angin thiamthu sawina hun a pe lo ngei a ni tiin ND&PS court chu Lalthuama hremna ngaihtuah nawn leh turin thu a pe a.

Hetianga a ngaihtuah that hian Lalthuama chu thiamthu sawina hun pek ni se tiin ND&PS Court chu thla hnih chhunga chingfel turin a ti bawk a ni.

A bail dil chungchang leh khehpuam a tawlruk chungchangah hian tihsual a nei nge nei lo tih erawh chu ngaihtuah nawn a ngai tawh lo tiin hremna thu chauh ngaihtuah turin Justice Nelson Sailo chuan a ti chiang thung.

Lalthuama, Khehpuam leh ND&PS Special Court

Kum 2015, May ni 17 khan Lalthuama (47) hi Excise and Narcotics Department-a Sub-Inspector Lalrinnunga chuan a lirthei khalh lai nen Rangvamualah a ti ding a. A lirthei khalh chhungah hian chuang ve mi pahnih leh buara ip pathum, khehpuam fun khawmna ni a hriat chu chhar ani.

Lalthuama chuan buara ip neitu chu Zarkawtah a awm tiin Excise SI leh a hote chuan Zarkawtah an kalpui a, mahse a “neitu”chu hmuh tur reng reng a awm loh avangin Excise office ah an hruai a. Buara ip an han hawn chuan khehpuam kg 45 lai a awm reng ani tih an hmuchhuak.

Hemi hnu hian Lalthuama mi phurh pahnih chuan inhnamhnawihna an neih hriat anih loh avangin chhuah an ni a, mahse Lalthuama chu manin thubuai siamsak a ni ta a ni.

Nikum October thla tawp a Lalthuama ND&PS Act hnuaia hrem anih hi Mizoram ah chuan a hmasa ber ani nghe nghe a. Kum 2016 November ni 4-a The Frontier Despatch-in a lo ziah tawh angin khami hma kha chuan ND&PS Special Court lo chang tawh tu judge pahnih te chuan hriat theih chinah mi 45, an vai a khehpuam mum vaibelchhe thum chuang tawlh te chu hrem lovin an lo chhuah zalen tawh thin a. Lalthuama hi hrem ni mahse hrem anih atanga hetiang thubuai lo awm tawh zawng zawng ah hian Mizoram khehpuam man tawh za a pakhat aia tlem ah chauh khehpuam tawlh ru tute hrem an ni tiin a chhut theih tihna ani.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s