MPSC Chairman hmasa ber thi

SR Vala

 

Indian Administrative Service (IAS) officer SR Vala (Selkhuma Ralte Vala), Mizoram Public Service Commission (MPSC) Chairman hmasa ber chu March 6 zan dar 11:05 khan a thi a, kum 85 mi a ni.

SR Vala hi January 9, 1932 khan Bawngchawm khua ah a piang a, a pa chu Selluaia niin a nu chu Hrangkungi a ni a, pianpui unau panga a nei a, an khua ah zirna bul a tan a, a zir tirh atang hian thiamthei tak niin kum khat chhungin A pawl, B pawl leh pawl khat a zo vek a, pawl thum chu 1st Division ah a pass a. Sumsuih khua-a an pem hnu ah Sialsuk khua ah zirna a chhunzawm a, kum 1946 khan pawl VI exam ah Mizoram pumah pakhatna a ni.

Mizo High School ah zirna a chhunzawm a, an pawlah thiamthei ber a ni a, mahse, an chhungkaw harsat avangin zirna  a chhunzawm hleithei lo a, kum 1952 ah private in Matric a exam a, 1st Division ah a pass a ni. Hnathawk chungin lehkha a zir chhunzawm a, kum 1958 khan private bawkin Shillong ah BA a exam a, Distinction ah a pass a, Gauhati University pumpui ah pathumna a ni a, Mizo zinga Board leh University exam-a private-a pass vek awmchhun ni-a hriat a ni.

April 1, 1960 ah Assam sorkar hnuaiah District Publicity Officer hna a thawk a, 1961 khan UPSC hnuaiah IAS and Allied Service a exam chu a tling a, Orrissa cadre pek a ni. Sorkar hna a thawh chhungin sorkar laipui, Orissa leh Mizoram sorkar hnuaiah a thawk a, a thawh chhung hian Officer taima leh rinawm, hna thiam leh hotute mit tlung tak a ni.

Kum 1992 khan a pension a, Mizoram sorkar in MPSC a din kum niin Chairman hmasa ber a ni leh a ni.

April 17, 1956-ah Vanlalchhungi nen Mission Veng Biak Inah an innei a, fapa pakhat leh fanu pali a nei a, a fate hi mite hriat hlawh leh hlawhtling tak tak an ni a, a fapa Lalduhthlanga Ralte chu Indian Foreign Service atanga a pension hnu ah Mizoram Information Commission ah Chief Information Commissioner a ni leh a ni.

SR Vala hi Kohhran ah pawh mi tangkai tak, rawngbawltu a ni a, kum 2000 khan cancer natna in tlakbuak mahse, a dam leh a, natna neuh neuhin a tlakbuak ve thin a, March 5 khan a awm a na a, damdawi lam thiamte’n enkawl mahse March 6 zan dar 11:05 khan a boral a, March 7 khan Mission Venga a chenna inah vui a ni.

Amah uitu mi thahnem takin an thlahliam a, sorkar-a mi pawimawh tak tak – Minister, Parliamentary Secretary, MLA te bakah Chief Secretary leh officer te, All India Service officer hlui te pawh an tel an ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s