Naupang khuaikhem thu ah hostel neitupa in thuhretu te thamna nen lamtang siam tum: CWC

Hostel neitupa Henry Lalmalsawma bail chu Special POCSO Court in a sût sak hnu ah a ukil te Gauhati HC ah an zualko a, HC chuan puh a nihna hi thu pawimawh leh nghawng thui tak nei a ni a ti a, mahse, dan chuan tumah an thu khawchang ngaithla hmasa lova dem a phal loh vangin court hniam zawk chu ennawn leh turin a ti

 

Hostel naupang kum tling lo engemaw zat khuaikhema puh, Home Mission hostel neitupa Henry Lalmalsawma chu tunhnai khan Aizawl District Child Welfare Committee hotute’n a thubuaia thuhretute tham tum leh lamtanga siam tumah an puh a, hemi thu ah hian CWC chuan court ah lehkha a thehlut a, court in Henry Lalmalsawma bail-a chhuah a phalsak na pawh chu a sût leh nghe nghe.

CWC hotute chuan hetianga court a lehkha ziah ngai khawp hiala thil awm hi naupang khuaikhem thubuai chungchang ah a la awm ngai lo tiin The Frontier Despatch (TFD) an hrilh.

Hemi chungchangah hian court ah thu a kal mek zel a, March 7 khan Henry Lalmalsawma hi Special POCSO Court Judge Lucy Lalrinthari hma ah Gauhati High Court, Aizawl Bench (GHC) thupêk angin inlan tura tih a ni a. Mahse, hei hi POCSO court chuan March 9 ah sawn in he thu ziah lai hian eng nge thil thleng hriat hman a ni ta lo.

Henry Lalmalsawma hi nikum November 8 khan a hostel naupang pawl 10 zirlai engemaw zat khuaikhema puh a nih vangin police-te’n an man a, a hnu November 24 khan bail-a chhuah phalsak a ni a. Bail phalsak a nih rual hian Special POCSO Court chuan thubuai chungchang hretu te hi lamtanga siam tum lo turin thu a pe nghal bawk.

Mahse, nikum December 5 khan Child Welfare Committee chuan thuhretu thenkhat chu a thuphungin pawisa nen lamtanga siam a tum tiin court ah a bail phalsakna chu sût turin a ngen ta a, court chuan kumin January 16 khan a bail phalsakna hi a sût zui ta a ni.

Hetianga bail sût a nih hnu hian Henry Lalmalsawma ukil te chu GHC ah an zualko a, anni sawi dan chuan Special POCSO Court hian bail a sût hma in Henry-a thukhawchang hi a ngaichang hmasa lo niin an sawi a.

Mahse, GHC chuan case record te en in December 5, 2016-a Special POCSO Court thu chhuak chu a bihchiang a, chutah chuan court hian thubuai a lehlam lehlam te remtih angin bail sût tura ngenna chu kumthar lamah ngaihtuah ni se tiin thupêk a siam a ni tih a hmu a. Heti a nih vang hian Henry Lalmalsawm thukhawchang zawt hmasa kher lova bail phalna a sût lehna ah dan bawhchhiatna a awm lo a ti a.

GHC chuan CWC in Henry Lalmalsawma a puhna chu thu pawimawh leh nghawng nei thui tak a ni a ti nghe nghe a, mahse, dan chuan mi tupawh thiam loh chantir an nih hma in an thu ngaihthlak phawt a ngai a tih si avangin bail sûtna hi Special POCSO Court chuan ngaihtuah nawn leh rawh se a ti ta a, hetianga GHC thu chhuak hi Henry Lalmalsawma chuan hriatttirna ah a ngai nghal thei ang a, bail sûtna chungchangah sawi tur a neih chuan thu ziaka thehlut turin a ti nghal bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s