“POLYTHENE-IN KAN KHAI HAW NGHENG MAI A, KAN SEM HEM HEM MAI”

Serchhip leh Champhai District hmun thenkhata khawtlang hruaitute leh sikul hotute chuan insakna-a inhlawhfa te hamthatna dawn tur pawisa inthlan kuma an dawn chiam dan sawiin, inthlan a zawh hnu ah erawh chuan nawr nasa teh mahse, dawn chhunzawm an neih tak miah loh thu an sawi

WhatsApp Image 2017-03-08 at 15.40.36

PHOTO: Biate VC Secretary HVL Sawma chuan kum 2014-a mi za chuang zet MBOCWWB hnuaia an in register na ID card chu sorkar in hmalakna a neih chhunzawm loh vangin a la kawl khawm vek

An khaw thenawm Biate atanga an thu dawn chuan Sialhawk-a private sikul hotute chu a chawk phur viau a, Mizoram inthlanpui hnuhnung ber, 2013 kum tir lamah khan an primary sikul naupang te nu leh pa zawng zawng an ko khawm a, nileng in an hnena form lo thleng thar te chu an fill-up ho a.

Hamthatna dawn tur, a bikin naupangte zirna lama tanpuina chu tihtlak êma an hriat avangin thahnem ngai takin hma an la zel a, form chu an fill-up vek hnu ah a hrilhhretu te hnenah pe kir lehin a hnu rei lo te ah chuan Aizawla pisa thlenna tur, Mizoram Building and Other Construction Workers’ Welfare Board, Upper Republic ami chu a thlen thu an hria a.

A hnu deuh ah chuan an bialtu MLA leh khatih laia Minister ni bawk chuan an khua a rawn tlawh ta a.

“Pu Rina a lo kal a, a P.A. in pawisa chu min pe a, khai haw tham lawih kha a awm maw le. Community hall ah min ko khawm a, engkim an sawifiah tho a, a buaithlak deuh avangin sikula sem mai turin Principal ka nihna angin ka kutah an hlan tawp a, chuan sikulah kan sem ve tawp mai a ni. VC hovin kan sem chu pawh chu, VC in min rawn hriat pui. Polythene in kan khai haw ngheng mai a. Kan sem hem hem mai,” tiin Sialhawka english medium sikul Principal Lalmuansanga chuan The Frontier Despatch (TFD) a hrilh a. Mahse, chutia an sem lai mek chuan thil mak tak an hmu chhuak ta.

Form an han en chian chuan an sikul naupang te chu unau nei thleh thluah angin a lo in ziak tlar thla dul mai a. An han bih tak ngial pawhin chung sikul naupang hming, an sikula lût ni si lo te chu an sikula lût ngei naupang thenkhat te nu leh pa fa angin an lo in ziak nuk a. A tihngaihna an hre lo viau a, mahse, lehkha-a inziak ang chuan pawisa a lo thlen vek si avangin nu leh pa te hnenah chuan an dawn ang angin an pe ta mai a.

“Hming mak tak tak te khan kan sikul nu leh pa te hming an hman miau avang khan an nu leh pa te hnenah kan pe vek mai a ni keini chuan. [Naupang] pakhat chauh awm te kha unau pathum/pali dawng ang khan, ti khan cheng sang riat (Rs 8,000) an dawng mai,” tiin Lalmuansanga chuan a sawi a, form lo petute chuan an lâk kir hnu ah hlawkna tel beisei in hming phuahchawp an lo ziak lut teuh mai a nih a ring a, mahse, pawisa hi anni kutah ni lovin khua-ah a thlen direct avangin hetiang hian a chuang bang ta teuh mai a nih a ring.

Mahse, an sikul naupang thenkhatin lehkhaah unau an nei ta tlat mai chu thil mak awm chhun a ni lo. An sikul naupang ni hauh lo te leh an nu leh pa te hming pawh an sikula pawisa sem dan tur chuanna lehkha ah chuan an hmu leh zel a, chung erawh chu an thawn kir leh ringawt mai a. Cheng nuai hnih (Rs 2,00,000) lai a tling niin zirtirtu chuan a sawi.

Inthlan hnaih ah hamthatna sem hluai

Tualchhung chanchinbu The Aizawl Post chuan thla hmasa khân Welfare Board hnuaiah kum inzâwn in Children Educational Assistance (CEA) pêk chhuah dan inang lo leh intam hleih a awm thu a lo ziak tawh a. He chanchinbu hian “Inthlan kumah tanpui hnem thut, a kum lehah tanpui tlem leh thut” tih thupui hmangin sorkar kum 2012-13 chhungin naupang 2,409 in CEA hi an dawng tiin a ziak a, kum 2013-14, Mizoram inthlanpui kum ah erawh chuan CEA dawng hi an pung nasa hle a, naupang 13,294 laiin an dawng a, inthlan kum a ral hnu ah erawh chuan naupang 474 chauhin an dawng thung niin a ziak a, heng a dawngtute hi Serchhip leh Tuichang bial chhunga khaw hrang hrang te an nih deuh vek thu a ziak bawk.

Mahse, CEA dawng zat an pun leh tlakhniam thut hi kum indawta thil thleng mak awmchhun a ni lo. A tirah chuan insakna-a inhlawhfa te chuan an fate theuh zinga naupang pahnih zirna atan kum khatah cheng 300 an dawng thei thin a. Hei hi nasa taka tihpun niin cheng 1,500 ah tihsan a ni a, a hnu ah cheng 2,000 ah tihsan a ni leh tiin he chanchinbu hian a ziak.

Tuichang leh Hrangturzo bial ah CEA hi sem nasa

Inthlan kum, 2013-a Sialhawk sikul naupang za têl in pawisa an dawn te hi hetianga CEA sem rûnpui lai a ni a, Tuichang biala Sialhawk khua chauh lo ah pawh hetih hunlai hian CEA sem hi a tam hle awm e.

Hetianga hamthatna dawn tur a awm tih thu khaw tam takin an hriatna hmun Biate ah ngei pawh hian hetiang hamthatna hi sem a ni nghe nghe a, mahse, dilna thehluh leh pawisa sem thu hi VC te hriatpui loh a ni a, an khaw mi tlem te chuan hma lo la in a dawng tur te pawh tlangau hmangin hall ah koh khawm an nih thu khatih lai leh tun thlenga VCP RV Hluna chuan TFD a hrilh.

Hemi bial chhung tho-a khaw pakhat, Chawngtlaia Village Council member thin pakhat Siamhnuna chuan an khua-a naupang eng emaw zatin welfare board atangin pawisa hi an dawng ve bawk niin a sawi a, cheng sing riat (Rs 80,000) bawr vel chu an sem niin a sawi.

“Naupang pakhat tan khan cheng 4,000 zel a ni a. ‘Labour ho in in-register thei e, register fee chu chutiang khatiang a ni e, a duration chu kumkhat a ni mai a, chuan heng in in-register hian in fate hamthatna a awm thei e’ an rawn ti a. Labour accident leh a dang tak kha chu tumah hi dawng kan awm lova. Register mumal tak pawh hi kan awm leh tawh lo maithei. Engzah nge dawng chu ka va han hre tawh lo e aw. A vai khan nuai khat a tling em aw, cheng 80,000 vel a ni em aw a grand total khan… A hma in form kha an rawn ti a, VC khan kan collect sak a, VC khan kan thawn thla a, a hnu ah an rawn sem ta pawisa kha chu,” tiin khatih laia VC member Siamhluna chuan TFD a hrilh.

East Lungdar, Hrangturzo bial ah pawh CEA hi sem a ni ve bawk a. Khatih laia East Lungdar Village Council President K Lalngaizuala chuan an sem dan hi a ngaihtuah lêt in, “Campaign-na a ang khawp mai,” a ti.

East Lungdar khua ah hi chuan naupang pakhatin cheng 1,500 theuh an dawng thung a, K Lalngaizuala chuan khaw thenawm Biate atangin Welfare Board form hi hmeichhe pakhatin a lo keng niin a sawi a, a zin lai a nih vangin an VC member pakhatin a aiawhin form ah te chuan a lo sign a, a semna ah erawh chuan amah a awm ngei niin a sawi a.

“Naupang 200 chuangin ami dawng kha le… Hall ah kan sem alawm zingah, nu leh pate an lo kal a, envelope ah pawisa an dah a, chutichuan an pe zel a. School naupang tanpuina an rawn ti a. Engmah an rawn chian chuang lo, sorkar hnathawk leh hnathawk lo kha an ti chuang lova, fee nei sikula kal fa nei ho kha chu an rin lut hmiah hmiah,” a ti.

Hetih lai hian, Hrangturzo bial chhung tho Keitum khua ah erawh chuan CEA hi sem ni lo mahse, khaw mi te chuan hetiang thil hi engemaw chen an hmelhriat ve tho a, mahse, hmun dang aiin a danglam deuh.

Khatih laia Keitum VCP Ruatmawia chuan Welfare Board form te hi an khaw mi Aizawla hnathawk in bengvar thilthu ah Keitumah hian a hawn chho niin a sawi a, chutah chuan mi za emaw vel a fill-up pui a, registration fee atan cheng 120 theuh an thawh bawk a, chungte chuan Aizawl lamah an thawn thla leh ta a.

A hnu lamah chuan a form kengchho tu pawh chuan VC te chu bia in hamthatna awm thei ang te an dawn leh dawn loh a zawt thin a, engmah a awm si loh vang chuan Ruatmawia leh an VC Vice-President nen Aizawlah an chhuk a, Welfare Board office ah an kal a, mahse, Director an hmu thei lova, office-a thawk te an dawr ta zawk a, anni chuan registration form fill-up zawng zawng chu pawm vek theih a nih loh thu sawiin mi 35 emaw chauh pawm theih an nih thu an lo sawi a, mahse, Ruatmawia te thian dun chuan khawtlang tan thil tha a nih ringin awareness siam na turin lehkha pawimawh te an hawn chho ta tho a, ni za inhlawhna (MGNREGS)-a an in kohkhawm tum te in an sawi chhuak a.

“Amaherawhchu, engmah hmalakna chhunzawm a awm ta tak tak si lova, a tih tlak loh tawp a nih hi tih ngaihdan kan nei ta a,” tiin TFD a hrilh.

In register-na renew nasa, mahse, hamthatna dawng zui lo

Heng khaw hrang hrang ah hian hamthatna awm thei te beisei chhunzawmin mi tam takin welfare board hnuaia an in register na chu a kum leh ah pawh an renew a, mahse, TFD in a biak te zawng zawng hian hamthatna te chu chhunzawm a ni lo tiin an sawi.

Hamthatna sem a nih hmasakna hmun Biate ah te pawh VC-te’n a tir chuan an hriatpui lo na in, dawng an awm tak ah chuan hetianga thil awm hi ngai pawimawh in hmalak tul an ti a, pawisa te sem a nih hnu chuan hamthatna kalhmang chu an zirchiang a, an khaw mi hamthatna dawng thei tur awm te chu ko khawmin document pawimawh te an buaipui vek a, registration leh renewal fee mi pakhat atangin cheng 120 theuh an la vek bawk a. Hetiang hian mi 112 lai chu Welfare Board hnuaiah hian cheng 13,120 chawiin July 16, 2014 khan an ziaklut ta a ni.

Mahse, dan anga registration/renewal VC hmalakna hnuaia an tih vek hnu hian Welfare Board lam chuan thawm an nei zui leh ta miah lo a, inziaklut te board hnuaia member an nihna Identity Card te pawh chu VC-te’n pe chhuak ta lovin an la kawl vek nghe nghe a.

“Mi harsa ten an dawn theih dawn chuan kan tia. Mahse a zuzi kual ta sia,” tiin Biate VC Secretary HVL Sawma chuan a sawi.

Sialhawk a zirtirtu Lalmuansanga pawhin, “Nu leh pa te khan dawng leh turah an inngai a, a kum leh ah pawh kan phur khawp a. ‘Ti hi chuan English medium-a fa te dah hian man lovin kan indah thei ang tluk a nih hi,’ te pawh an ti ve ta hial a.

“Mahse, engmah kha a awm leh ta si lova. Pawisa kan chawi a, kan ti nawn leh vek a, naupang pawh kan dil sak leh vek a, mahse, ‘Pawisa a awm lo, kumin chuan in dawng lovang,’ tih kha a ni leh ringawt a. Kumtin dawn tur min rawn ti na na na a kan ti ve a, nu leh pa te pawhin pawisa chawi an hreh lo. Mahse, Aizawl te pawh kan rawn be vek a, keimahni te pawhin form chu kan thawn thla a, office ah te pawh kan zuk dah leh thlap alawm. Renewal ah pawh cheng 120 tho chu kan chawi leh a nih chu. Mahse, cheng 120 kha rawn pek lêt a awm leh chuang lo,” a ti bawk.

Dan anga in register tawh te hnenah sum awm loh thu sawi a nih laiin Welfare Board in sum dawng reng

Amaherawhchu, hetianga khaw hrang hranga khawtlang hruaitute chu pawisa a awm tawh loh thu hrilh an nih lai hian February 27, 2017 chhuak Vanglaini chanchinbu chuan welfare board hian sum an dawng reng tho niin a ziak a. Kum tin an sum dawn chu  a pung nghe nghe niin a ziak.

Vanglaini-a a lan dan chuan kum 2013-14, hmun hrang hranga hamthatna sem a nih kum hian Labour Cess atan cheng vaibelchhe sarih chuang (Rs 7,17,63,049) a awm a, a kum leh, kum 2014-15 ah chuan hei hi cheng vaibelchhe 8 aia tam (Rs 8,47,68,981) ah a pung a, kum 2015-16 ah phei chuan vaibelchhe 10 (Rs 10,50,11,437) a chuang a ni.

Tarlan tawh angin, kum 2014 khan Welfare Board leh Mizoram Youth Commission te hmalakna in zirna in hrang hrang pathum hnenah he Labour Cess pawisa hi sorkar kal dan zulzui lovin cheng vaibelchhe li (Rs 4.73 crore) pek an ni a, heng zirna in zingah hian Nalanda Institute of Advanced Studies, Kolkata a tel a.

Hetianga zirna in te pawisa tur zingah hian cheng vaibelchhe hnih dawn (Rs 1.8 crore bawr vel) chu khatih laia Welfare Board Secretary-in MYC hotute pahnih hmingin a pe chhuak nghe nghe.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s