Lalsawta’n 2017-18 budget a pharh; “kawng siam/enkawl na tur leh hmasawn hnathawhna tur pung”

Kum 2017-18 atana Mizoram budget tur cheng vbc 8803.10 chu Finance Minister Lalsawta’n March 16 khan Mizoram Assembly-ah a pharh a. A budget pharh ah hian indaihlohna awm lo tura ngaih ani tih sawiin sorkar kumtharah chhiah lak thar tur a awm dawn lo a ti a, tui leh electric bill erawh a pun hret hret a rin thu a sawi a.

Larsapin tun Assembly session tan ni a sorkar in kawng siam leh enkawl chungchangah tan a la dawn a tih angin FM budget pharh ah hian kawng siam thar leh siam tawh sa enkawl nan cheng vbc 897.14 a ruahman ani.

Lalsawta hian sorkar thuchhuah te’n a lo tarlan tawh angin Congress policy thar NEDP atan cheng vbc 750 a ruahman bawk a, hmasawnna hna hrang hrang thawhna’n sum ruahman a pung nasa viau dawn niin a sawi bakah hetiang atan hian cheng vbc 550 sorkarin a puk dawn thu a sawi bawk.

Eirukna dotu Lok Ayukta dinna’n erawh nikum lam ang bawkin cheng nuai 159 vel a ruahman leh a, Lok Ayukta hi din a la ni lo thung.

Tin, sorkar hnathawk hlawh, sorkar inrelbawlna senso, kawngpui awmsa enkawlna te, District Council te, Commission leh Board hrang hrang enkawlna senso te phuhruk turin cheng vbc. 6,386.21 a ruahman bawk a, hei hi budget pumpui atanga chhutin 76.53% ani a.

Hetah hian sorkar hnathawk nghet leh nghet lote hlawh atan cheng vbc. 3,187.65 (budget pumpui atanga chhutin 36.21%) a ruahman bakah, sorkar hnathawk pension hlawh atan cheng vbc. 846.66 crore (budget pumpui atanga chhutin 10%) a ruahman tel ani.

FM sawi dan chuan Mizoram sum thawh chhuah (GSDP) hi sorkar kum liam tur ngaihtuahin  13.05% in a thang tura ngaih ani a, a vai chuan Mizoram mipuite’n kum 2017-18 ah cheng vbc 17,561.99 an thawh chhuah dawn niin a sawi.

NITI Aayog chhinchhiah danin Mizoram hi 2009-10 atanga 2013-14 chhung zawng khan India state zawng zawngah GSDP hniam ber ani reng a. Hemi hma kum nga chhung khan Sikkim chu GSDP hniam ber ani thin a, mahse, kum 2009-10 atang khan Sikkim GSDP hi a pung nasa a, Mizoram hi a hniam ber ta ngar ngar ani.

— — — — —         

Mizoram Budget 2017-18 tlangpui

Budget zat: 8803.10 crores (vbc)

Supplementary Demands for Grants1: vbc 1,645.38

Indaihlohna (Deficit): NIL

Chhiah thar lak tur: NIL

Chhiah tihpun tur: NIL (Tui leh Electric bill erawh tihpun hret hret a nih a rinawm)

Hmasawnna hna thawhna’n a loan lak tur: (a) Market Loan – cheng vbc. 400 (b)NABARD loan – cheng vbc. 150 (hei hi dept 8 in hna thawh nan an hmang ang)

New Economic Development Program (NEDP) atana dah hran: cheng vbc. 750 (Dept 31 te chan tur)

Kawngpui awmsa chei thatna: cheng vbc. 239.50 (Hei hi nikum lama sum dah aiin 259%-in a tam)

Kawngpui siam hna kal mek/a thar siamna tur: cheng vbc. 657.64 (Hei hi nikum lama sum ruahman aiin 70%-in a tam niin a sawi)

Centrally Sponsored Scheme (CSS) hrang hranga state matching share tur: cheng vbc. 140

Non-Lapsable Central Pool of Resources (NLCPR): cheng vbc. 98.77

Lok Ayukta din na’n: cheng nuai 159.34 (Nikumah heti zat hi dah hran tawh ni mahse, Lok Ayukta hi din a la nilo)

Kum hmasa aia hmasawnna hnathawhna’n sum dah pun dan: 35.57%

Hman ral aia hmuh tur tam zawk dan: cheng vbc. 331.07

Revenue Expenditure2: cheng vbc. 6,386.21 (budget pumpui atanga chhutin 76.53%)

  • Sorkar hnathawk nghet leh nghet lote hlawh (salaries and wages): cheng vbc. 3,187.65 (budget pumpui atanga chhutin 36.21%)
  • Sorkar hnathawk pension hlawh: cheng vbc. 846.66 crore) (budget pumpui atanga chhutin 10%)

Capital Expenditure3: cheng vbc. 1,907.88 (budget pumpui atanga chhutin 22.86%)

Sorkar sum puk rulhna: cheng vbc. 277.74

Sorkar hnathawk damlo enkawlna (Medical Reimbursement): cheng vbc. 98.51

MLA te bial hmasawnna atana sum ruahman: cheng vbc. 40 (kum kallai angin cheng nuai 100 theuh)

Mizoram sum thawh chhuah (GSDP) thanna tur: 13.05%

GSDP atanga chhutin Mizoram leiba tlakhniam dan:

  • Kum 2013-14 ah cheng vbc. 5,608.38 (Mizoram sum thawh chhuah, GSDP atanga chhutin 54.46%
  • Kum 2014-15-ah cheng vbc. 6,550.39 (GSDP atanga chhutin 62.90%)
  • Kum 2015-16-ah cheng vbc. 6,407.39 (GSDP atanga chhutin 47.90%)
  • Kum 2016-17 ah cheng vbc. 7,290.17 (GSDP atanga chhutin 46.92%)
  • Mizoram leiba hi sorkar kum thar 2017-18-ah cheng vbc. 7,177.99 ni tura chhut a ni (GSDP cheng vbc. 17,561.99 atanga chhutin 40.87% ni tura chhut ani bawk)

— — — — —

1Hei hi Budget a tel lo, kum kallai 2016-17 Budget-a sum dil belhna

2Revenue Expenditure hi sorkar hnathawk hlawh leh sorkar inrelbawlna senso ringawt ni lovin kawngpui awmsa enkawlna te, District Council te, Commission leh Board hrang hrang enkawlna senso te pawh a tel a ni a ti.

3Hna thar rehna tur, ram rotling siama hmasawnna hna thawhna tur atana ruahman

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s