MBOCWWB-a hnathawk 36 te ban vek turin thutlukna siam

Mizoram Building and Other Construction Workers’ Welfare Board member-te tukin, March 16-a thukhawm chuan NIAS buaina avanga mipui hriat ni ta, dan zawm lova board hnuaia hnathawk engemaw zat rawih te leh hnathawk dang te chu ban vek an nih na turin thutlukna a siam a, board hnathawkte hi a thar rawih chu phal ni mahse, hnathawk 11 aia tam lo ni se tih leh sorkar dan ang ngei a rawih ni tawh se tiin thutlukna a siam bawk

MMA
Photo: MIZORAM MISTIRI ASSOCIATION

NIAS, Kolkata-a Mizo zirlai 32 dan lova thawn an nih avanga buaina chhuah hnu a Mizoram Building and Other Construction Workers’ Welfare Board thukhawm hmasa ber chuan tukin, March 16 khan tuna Welfare Board ding lai, thawktu 36 awmna hi thiah a, a thawk lai mek te chu thla hnih notice pek a, a thar a board official leh staff te rawih an nih theihna’n thutlukna a siam.

Tarlan tawh angin, Welfare Board ah hian thawktu 36 lai awmin an tam uchuak hle nia ngaih ani: officer pali chauh an awm laiin driver 10 lai rawih an ni a, nikum 2016 atang khan insakna a inhlawhfa construction workers te register hna pawh Labour Department hnuaia District Labour Officer te’n an khawih vek tawh laiin Data Entry Operator 11 leh Field Assistant panga rawih an ni reng bawk a, heng bakah hian peon pathum an thawk bawk ani.

Tukina board thukhawm chuan heng hnathawk te chungchang hi ngaihtuah in thutlukna siam mahse, Welfare Board ex-officio chairman, Labour Minister hna chelh thin Lalrinmawia Ralte a ban tak avang leh a thlaktu an awm hrih loh avangin Chief Minister in final approval a pek a ngai dawn niin The Frontier Despatch (TFD) chuan thu a dawng a. Tuna board official leh staff te chungchanga board thutlukna thar hi CM-in a approve chuan, a approve atanga thla hnih ah ban an ni ang a, hnathawk rawih thar te erawh chu 11 aia tam lo, dan ang taka rawih tur an ni ang tiin TFD chuan thu a dawng bawk ani.

Tuna Board hnuaia hnathawk 36 te zinga 25 emaw zet chu “mamawhna bik” avangin kum 2013 chawhnu lam khan rawih an ni a, rawih an nih danah hian sorkar dan dinglai zawm a ni lo thung.

Board thukhawm hian thu dang hrang hrang pawh a rel nghal a, chutah chuan NIAS zirlai ni thin C Laltlanmawia medical reimbursement cheng nuai khat, sing hnih leh sang khat (Rs 1.21 lakh) pek tawh pawh chu ex-post facto approval a pe duhlo a. C Laltlanmawia hi February 24 khan cheque in pawisa hi pek tawh nimahsela, insakna a inhlawhfa thin te chanvo tur welfare cess atanga pawisa hman hi board chuan a remti lo a, pawisa hi hman tawh anih pawhin account dang atanga pek emaw chhun khah leh nise tiin a rel.

Tin, NIAS-a Mizoram Youth Commission leh Welfare Board tangkawp in Mizo zirlai an thawn, an zirna in kalhmang duhkhawp loh vanga zir zawm ta lo te’n an zirlaia an senso hrang hrang rulh (compensation) an phut, zirlai pakhat theuhin cheng nuai li leh singkhat (Rs 4.10 lakh) — a vaiin cheng  vaibelchhe khat leh nuai sawmthum pakhat (Rs 1.31 crore) – pek dan tur chungchangah erawh chuan March 16 a thukhawm board hian thutlukna a siam lova, nidangah ngaihtuah that leh atan a khek niin TFD chuan thu a dawng bawk.

Hei bakah hian, kar engemawzat kalta a NIAS, Kolkata in Mizo zirlai te an zir chhunzawm tak loh vanga an fee sorkarin a pek lawk, cheng nuai sawmli pahnih (Rs 42 lakh), cheque kaltlanga Welfare Board an pe kir leh tih pawh chu board thukhawm hian a ngaihtuah a, NIAS hian an current account ami anih loh avangin cheque hi pek kir leh an phut a, mahse Labour Department hotute chuan an ngenna chu hnawl in cheque thar an lo thawn hnu ah cheque hmasa zawk chu an pe kir leh thei chauh ang tiin an chhang niin board thukhawm hi sorkar hotute’n an hrilh bawk ani.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s