Kanhmun bula forest staff tibuai tu ni-a sawi Bru hel pawl te Assam sorkar nena inrem tum mek

Mizoram Police te’n he pawl hruaitute hi an be tawh a, anni chuan ramri-a Bru mi, mau sât a inhlawhfa te thlavang an hauh mai niin an lo sawi a. Hetih lai hian, Kanhmun khawtlang hruaitu chuan mau sah ruk hi a thleng fo tawh niin a sawi.

 

Tunkar liam ta Thawtanni, March 13-a Kanhmun bul Mizoram leh Assam inrina-a Mizoram Forest Department hnathawk pahnih lo tibuaitu ni-a sawi te chu Hailakandi District-a Bru hel pawl pakhat, Bru Revolutionary Army of Union (BRAU) ami te niin anni hi Assam sorkar te nena inrem tura hma la mek te an ni tiin The Frontier Despatch (TFD) chuan thu a dawng.

BRAU hel pawl hnaih tak, mahse, hruaitu dang hnuaia awm si chuan tum khat chu Meidum ah hmasawnna hna thawk an lo kidnap tawh na a, tunhnaia Kanhmun khaw bula forest staff te lo tibuai tu ni-a sawi te tak erawh hi chuan Mizoram chhungah buaina an siam hriat a la ni lo thung.

Mizoram Police hotute hnen atanga thu dawn danin BRAU hruaitu te hi Mizoram Bru an ni lo a, Riflemara, Assam lam mi an ni.

Kanhmun bula thil thleng chungchangah pawh an hruaitute chu biak pawh an ni tawh a, anni chuan Mizoram forest staff te chu Assam Reserved Forest chhunga lût an ni tiin khulai hmuna mau sâta inhlawh thin Bru mi inhlawhfa te thlavang an lo hauh mai niin an sawi bawk.

Hetih lai hian, Kanhmun YMA hruaitu Zonuntluanga chuan helai hmun hi ramri a nih avangin Assam chhung va rah zauh te a ngai thin a, forest staff pahnih te pawh kha chutiang chuan an kal ngei a, mahse, mau sah pum te chu Mizoram chhung lui ah an hmu niin a sawi a.

Hel silai keng mi pali te hian forest staff pahnihte hi Assam ram chhungah an lo chhawn hmasa a, mahse, a hnu ah chuan Mizoram chinah an umzui a, chutah chuan silai an hmet puak niin Zonuntluanga chuan a sawi.

Mizoram dep Assam chhung ni si ah hian hel pawl hi an awm thluah a, mahse, Bru hel te hian Mizo te chu an tibuai ngai meuh lo niin a sawi bawk a, mahse, tunlai hian sorkar phalna tel lovin mau sah rûk hi Mizoram chhungah leh Assam chhungah a awm deuh reng niin Zonuntluanga chuan a sawi.

He thil thleng avang hian pawl hrang hrang chuan thu chhuah siamin intihbuaina chu an dem nasa hle a.

Mizo National Youth Front chuan March 14 khan thu chhuah siam in “Mizoram Mau tawlhruk a nih lohna tura Forest duty te lo tibuaitu mi sualte hi MNF thalaite chuan kan dem takzet a. Hel nge an nih Cachar Paper Mill mi leh sate tih chhuichhuaka man thuai turin Mizoram sorkar kan phut a. Kanhmun chheh velah Assam lam atanga buaina rawn siam an awm fo avangin Mizoram Police dah belh thuai turin Mizoram sorkar kan phût bawk a ni,” an ti a.

Hachhek Constituency Development Committee (HCDC) pawhin hemi ni vek hian thu chhuah siamin “Helte hi mi tlemte an ni a, sum tuak nan sorkar hnathawk leh contractor man tur an zawng reng tih hriat a ni a, hei vang hian Mizoram sorkar thuneitute pawh a tul anga hma la nghal turin kan ngen nghal bawk a, thil pawi zawk a thlen hma ngeia che chhuak turin kan ngen bakah Mizoram khawthlang lama sipai tam zawk rawn dah turin kan ngen bawk a ni,” a ti a.

“Hel te hi insaseng vat turin kan ngen a, an insaseng lo a nihchuan Mizo thalaite hi a tul angin kan che ve dawn a ni,” tiin an thu chhuah chuan a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s