SIHHMUI-LENGPUI KAWNGA CONCRETE LEI DAWH LAI SORKARIN HLUIHLAWN DAWN

Cheng vbc 3.5 chuang sen tawhna lei concrete ban lehlam innghahna lungpui chu tui in a hreuh kuak avangin a nghing thei a, sak zawm chi a ni ta lo. Mahse, a thlang metre 70 velah thir leh concrete lei thar sak dan tur ngaihtuah mek a ni.

sihhmui

National Highway 44-A, Aizawl leh Lengpui inkara Tlawng lui kanna tura ruahman concrete lei sak hna hi kum 2012 bawr vel khan thawh tan  a ni a, mahse, ban phun pahnih zinga pakhat zawk (Sihhmui lam ami) chu a innghahna lung chu tui in a hreuh kuak avangin a nghing thei a, hei vang hian hna hi chawlhsan a ni.

Kum 2014 leh 2015 khan he concrete lei dawhna tur bula Bailey Bridge chu vawi thum lai a lo chim tawh a, a chim ngun em avangin Mizoram Chief Secretary hlui M Lalmanzuala chuan Gauhati High Court ah Public Interest Litigation (PIL) a thehlut a, hemi chungchang ngaihtuah a nih hian concrete lei chungchang pawh hi sawi tel a ni.

 

PWD hotute’n RCC lei hluihlawn anih dawn thu GHC an hrilh

He PIL ngaihtuahna kal zel ah hian kar kalta March 8 khan PWD Under Secretary chuan Gauhati High Court Aizawl Bench (GHC) ah affidavit thehlutin, chumi ah chuan concrete lei sak hi chhunzawm a nih tawh loh tur thu a sawi a.

Hetih rual hian lei thar, thir leh concrete hmanga sak tur chu sak dan tur duan chhin ni tawh in, consultant ruaiin DPR pawh a siam tawh nghe nghe a. PWD lamin DPR hi an zirchiang ang a, a that chuan final DPR thehlut tura hriattir a nih hnu ah sorkar laipuia Ministry of Road Transport & Highways ah thehluh a ni dawn tih a sawi bawk.

Hetianga concrete lei sak lai mek hluihlawn a nih tur thu sawichhuah a nih hnu leh Bailey Bridge chim chu dawh that a nih tawh avangin GHC chuan M Lalmanzuala PIL pawh chu ‘ngaihtuah zui a ngai tawh love’ tiin a titawp nghal bawk a ni.

Sihhmui leh Lengpui inkara concrete lei hluihlawn tak hi Pre-Stressed Concrete Girder (PSG) bridge ti-a koh a ni a. He lei hi sak tlak a ni tih leh a sak dan tur DPR chu Gurgaon company pakhat, Consulting Services Engineers Ltd in a siam fel a. Chumi hnu chuan Tantia Constructions Ltd in a sak hna hi an thawk thung.

Mahse, kum 2012 August thla vel khan ban pahnih an phun fel hnu leh lui ko lehlam lehlamah hna an tan tawh hnu in a ban pakhat zawk chu a nghing thei tih hmuh chhuah a ni a.

 

Ban chet dan zir chiang

Tantia chuan MS Phike & Associates, Mumbai ami chu a nghin chhan zirchiang turin an ruai leh chhawng a. Tin, Ministry of Road Transport & Highways-a Regional Officer, Guwahati-a thu chuan January 2013 khan a hmunah a tlawh bawk a. Khami kum April thla khan Jadavpur University, Kolkata, chu zirchiang turin tih a ni a, anni hian August thla ah an zirchianna chu zo fel mahse, siamthat dan tur rawtna an siam lem lo.

Kum 2013 December thla khan khatih laia PWD Engineer-in-Chief chuan a hmunah a en ve leh a, chumi hnu chuan siamthat theih a ni em tih zirchiang turin mi thiam rawih tura hmalak tan a ni a. Hetianga mi thiam rawih nan hian tender vawi ruk lai chhuah ni mahse, he hna thawk duh hi hmuh an ni lova, E-in-C in a hmuna a tlawh hnu kum hnih ah tender hi hawn chauh a ni.

sihhmui-2

Lei sakna concrete tha, a innghahna lung ngêt

Hemi hnu hian NIT Mizoram chuan he lei dawmtu tur concrete ban hi a chak tawk niin a sawi a, NIT, Silchar chuan he ban hi amah chuan a nghing lova, mahse nawr tu a awm chuan a nghing tiin a sawi bawk.

Hemi chungchang chhuitu IAS officer Dr Franklin Laltinkhuma chuan he lei sak hma-a DPR siam lai hian ban phunna turah hian âwng/pawp/kua engmah hmuh a awm lo tiin a chhuina report ah chuan a ziak bawk a, hetia ban innghahna lungpuia âwng/pawp/kua a awm nachhan chu Tlawng lui tui in a ei hêk hret hret vang tiin hetiang hi chu hmuhlâwk emaw hriatlawk emaw theih a ni lo a ti nghe nghe.

 

Cheng vbc 3.57 seng tawh

Sihhmuia Tlawng luia lei dawh hi Tantia Constructions Ltd chuan cheng vbc 6.99 in a thawk a, a foundation leh ban phun ni tawhin hemi atan hian cheng vbc 3.57 sen a ni tawh a, hei hi za-a 50 (50%) vel a ni a, zawh hma-a hluihlawn a nih dawn avang hian Tantia Construction Ltd. pawhin bungrua leh hmanrua an lo chhawp tawh riral leh te phuhrûk nan PWD ah an senso an la dil leh dawn ni-a thu dawn a ni.

 

– – – – – – – – – –

 

Bailey bridge vawi thum chim dan

sihhmui-3

Sihhmuia Tlawng lui kanna Bailey Bridge hi tum thum lai a chim tawh a, hengah te hian mi pakhat a thi.

October 31, 2014 chhun khan truck pakhatin he lei hi a zawh laiin a chim a, hei hi a zawh tawka rit truck in a zawh vang leh lei kilhna tam tak rukbo vanga chim ni-a sawi a ni. Lei chim tuk hian PWD chuan Sairang Police Station ah FIR an thehlut a, hetah hian lei kilhna transom clamp 80 chuang chu ruk bo niin a sawi. Hei bakh hian lei chim hma hian he kawng siamtu company – SLT Infracon – chuan kawng siamna hmanrua MT 35.76-a rit phur truck pakua chuan he lei hi an zawh niin an sawi a, lei ah hian MT 14.56-a rit phur zawh an phal loh laiin hetianga rit phur truck hi an zawh bakah a chim ni hian truck 10, MT 10.6-a rit phurte’n an zawh leh a, 11-na in a zawh laiin a chim ta niin an sawi.

Lei chim hi dawhthat a nih lai December 8, 2014 khan a chim leh a, hei hi tluang taka hna an thahw laiin vanduaina an tawk ta niin Department chuan an sawi.

Lei chim dawhthat mek a chim leh hnu hian dawh that leh a ni a, mahse, vanduaithlak takin a chim hnuhnun ber atanga kum khat hnu December 2, 2015 zan dar 10 khan truck pakhatin a zawh laiin a chim leh a, hetah hian driver chu thi nghalin handyman chu na takin a hliam a ni.

Hemi zan la la hian PWD chuan Sairang Police Station ah FIR an thehlut nghal a, a tukah thu chhuah siamin lei zawh tawk aia rit phurin a zawh vanga chim niin an sawi a, sorkar in lei chim chhan chhui turn Aizawl Bawrhsap Dr Franklin Laltinkhuma a ruat nghal a ni.Bawrhsap chhuina ah hian lei chim chhan chu PWD te inthlahdah vang ni lovin lei zawh tawk aia rit truck in a zawh vang niin a sawi a, PWD chuan chhun zan zawma lei vengtu tur mihring an neih loh avangin a zawh tawk aia rit phurin an zawh thin avangin lei chu dawh that leh a nih pawhin ven ngaia a hriat thu a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s