State Assembly thu leh hla

House-ah Larsap in sorkar hnathawh leh hmalakna hrang hrang sawi

Larsap

Kawng tha

Larsap Lt. General Nirbhay Sharma chuan sorkarin kawng enkawl a ngaihpawimawh tur thu a sawi a, Assembly Budget Session ni hmasa ber March ni 14 khan House-ah thu sawiin Larsap chuan inkalpawhna kawngpui tha neih chu thil pawimawh hmasa a nih angin hemi tur hian kum 2016-2017 chhung khan hmun 16-ah km 73.69-a thui kawngpui sial thar a ni a ti a, km 211.11-a thui black top a nih thu te, hmun 58-ah km 1,326-a thui kawngpui sial mek a nih thu a sawi a, state chhung kawngpui tha taka enkawl chu ngaihpawimawh berah sorkar in a nei niin a sawi.

NLUP, NEDP, buh, bal

Larsap chuan NLUP avang hian buh thar a pun laiin tlangram lo neihna hmun a zim sawt thung niin a sawi a, hei hian huan lo ram nghet lam hawiin kuthnathawktute an inher tih a tilang niin a sawi a. Kawng tin renga Mizoram hmasawnna thlen thei tura duan New Economic Development Policy (NEDP) chu theihtawpa tihpuitlin mek a nih thu sawiin hei hian Mizoram ei leh bar dinhmun chu hmasawnna kawng tharah a takin a nawr kâng chho dawn a ni a ti. Nirbhay Sharma chuan NEDP tihpuitlinna atan hian Committee chhawng thum din a ni tawh tih a sawi a. Chief Minister kaihhruaina hnuai-ah Core Committee din a ni a, Chief Secretary kaihhruai Executive Committee bakah a hnathawh leh hlawhtlin dan thlithlaitu tur Monitoring and Evaluation Committee chu State Planning Board Vice Chairman kaihhruaina hnuai-ah din a ni tawh a ni. NEDP a taka kalpuina tura inkaihhruaina siam a ni tawh a, tun sorkar kum kal lai (2016-2017) chhung atan hemi hnuaiah hian cheng vaibelchhe 250 ruahman a ni a. NLUP kalpui mek sum cheng vaibelchhe 27 pawh kaihkawp a ni dawn a ni, a ti.

NEDP hnuaiah hian kawng hrang hranga bawhzui bik tur ruahmanna siam a ni a. Lo leh huan neih leh ranvulh lamah chuan leilet buh thar tihpun, buh herna khawl lian bun, zikhlum leh aieng nasa zawka chin, thil zawrhna hmun tam zawk siam, thil thar chhuah hralh theih dan tur hriattirna leh lo leh huan panna kawng sialte a langsar zual a ni a ti a.

Mizo tualtah puan state pawna hralh chhuahna tur ruahman, thiamna zirna tur hmunpui din, mimal eizawnna kawng zawn leh samkhai zawka sumdawnna ruahman te a tel bawk.

Oil Palm leh anhnah

Hei bakah hian kawng hrang hrangah hmasawnna hna tur ruahmanna lian tham engemawzat siam a nih thu Larsap chuan a sawi. Minute 20 chuang hret thu a sawi chhung hian Larsap chuan buh leh bala intodelhna atana a sorkarin nasa taka hma a lak rualin sum chang thlai thar chhuah tihpun lamah pawh tan lak zel a ni a ti a. Oil Palm chinna ram chu a let tam takin a pung zel nia sawiin RKVY atanga sum hmuh hmangin thar chhuah tihpun leh hmasawnna ruhrel siam hna thawh a ni a. National Food Security Mission hnuai-ah buh leh bal thar tihpunna atan district zawng zawngah hmalak mek a ni a ti a. Anhnah man man zawka hralh chhuah dan kawng leh Green House hmanga thlai thar chhuah tam dan kawngah pawh nasa taka hmalak a ni a ti.

Border trade

Thenawm ramte nena ramri-a insumdawn tawnna chungchang sawiin Larsap chuan sorkar laipuiin Rihkhawdar leh Tiddim inkar kawngpui kilometre 80-a thui sial hna a thawh dawn thu a sawi a, hei hi Zokhawthar kaltlanga insumdawn tawnna kawng tih hmasawnna tinzawna ruahman a ni a ti a. Bangladesh nena insumdawn tawnna atana Kawrpuichhuaha Integrated Check Post dinna atan pawh ram acre kua-a zau buatsaih a nih tawh thu a sawi bawk.

Tourism

Zinmite hipna atana sorkar hnathawh dan sawiin Nirbhay Sharma chuan kumin February thla khan Siaha District chhungah Tourist Lodge pasarih lai hawn a ni a. Nikum June 9 khan Serchhipa Tourist Lodge chu hawn a nih bakah hemi ni vek hian Thenzawla Integrated Development of New Eco-Tourism Thenzawl, South Zote and Reiek lung phum a ni bawk a ni a ti a. Aizawl Bung Bangla-a State Institute of Hotel Management sak hna zawhfel a nih thu a sawi bawk.

National Anthem

House chhunga Larsap a lo luh hlim leh chhuah dawn hian MAP band party-in hnam hla an rem a, member-te leh gallery-a ngaithlatute an ding vek a ni.- – – – – – – – –

Assembly

House-ah member hlui pahnih, Tamil Nadu CM sûn

Budget Session neih mekah March 15 (Nilaini) khan member hlui pahnih – Zosiama Pachuau leh C Lalruata – leh Tamil Nadu Chief Minister Jayalalitha Jayaram te sûn an ni.

Speaker Hiphei sâwm angin House Leader Lal Thanhawla chuan heng mi pathum te chanchin hi sawiin a ui zia a sawi a, Zosiama Pachuau leh C Lalruata te chu Mizorama Assembly House ah pawh member tangkai tak, ram leh hnam tana theihtawp chhuah mi an nih thu a sawi a, Jayalalitha pawh Tamil Nadu tan leh ram tana mi uihawm a nih thu a sawi.

Eptu aiawhin MNF member K Sangthuama leh MPC member Lalthanliana te chuan Zosiama Pachuau, C Lalruata leh Jayalalitha Jayram te chanchin sawiin an ui thu an sawi a.

Congress member pahnih PC Zoramsangliana leh RL Pianmawia te pawhin Zosiama Pachuau leh C Lalruata te an ui thu an sawi ve hnu ah House member te chu mi pathumte sûn nan ngawi rengin minute khat an ding a ni.

 

2016-2017-ah  NLUP atan cheng vbc 15

2016-2017 sorkar kuma NLUP atan Planning Department in cheng vbc 15 a pe.

March 15 (Nilaini)-a Assembly Budget Session-a MNF member Lalrinawma zawhna ziaka Agriculture Minister R Lalzirliana’n a chhan danin sum te hi Agricultue Department budget ah dah a ni a, a hmanna tur ngaihtuah mek a ni a, kum 2015-2016 chhungin NLUP line department hrang hrang atanga NLUP pawisa Bank Interest chu ` 2,37,79,699 a ni.

 

“RMSA hnuaia thawkte hlawh February 2017 thleng pek a ni tawh”

RMSA hnuaia zirtirtu/thawktu te hlawh February 2017 thleng pek a ni tawh.

March 15 (Nilaini)-a Assembly Budget Session-a MNF member Dr K Beichhua zawhna ziaka School Education Minister H Rohluna’n a chhan danin tun dinhmunah RMSA hnuaiah zirtirtu/staff 600 chhawr mek an ni a, sorkar laipui atanga sanction lo kal dan ang zela hlawh pek an ni a, tun dinhmunah February 2017 thleng pek an ni a.

Tuna rawih mekte hi March 31, 2017 thleng contract nei an ni a, thawk chhunzawm tlak te kum khat chhung atan zel extend an ni thin.

Assembly House

Pung awmlo a NLUP sum puktu te’n cheng vbc 3.43 la rûl lo

NLUP sum puktu mi panga in an loan lak an la rûl zo lo a, heng mi panga te loan lak la rulh loh hi cheng vbc 3.43 a ni.

March 15 (Nilaini)-a Assembly Budget Session-a MNF member Lalrinawma zawhna ziaka Agriculture Minister R Lalzirliana’n a chhan danin NLUP sum pûktute’n an la rul zo lo a.

Sum pûktu mi panga zinga mi pahnih – Ramhmangaiha, Hnamchhantu leh Samuel Tea Factory – te chuan an puk atangin ` 33,00,000 (Ramhmangaiha, Hnamchhantu) leh ` 1,24,000 (Samuel Tea Factory) an rûl tawh a. Agriculture Minister chhân danin, Ramhmangaiha hian cheng nuai 230 a puk a, Lallura Pachuau, LZ Bamboo Industry in cheng nuai 10 a puk a. Hemi awmzia chu Ramhmangaiha hian cheng nuai 197 a la bâ tihna ani a, Samuel Tea Factory hian cheng nuai 56 chuang rulh a la hmabawk bawk tihna ani.

BT Nghinglova, Mizoram Broom India in cheng nuai 30 a puk a, PC Lalawmpuii, CDAR in cheng nuai 50 leh Samuel Tea Factory in cheng nuai 57.77 an puk bawk a. Anni hian rulh an la neilo.

Sum puktute zingah hian hunbi nei a rulh leh intiam an awm na in, an intiam angin tuman la rul lo thung niin Agriculture Minister chuan a sawi bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s