State dang inthlan ah MPCC in lawmna hmu, MNF beisei san phah, Mizoram BJP ‘confi’ hle

India ram state panga a inthlanpui result a chhuah tirh tê khan Mizorama Congress thupuangtu pakhat chuan “Indian National Congress che tha hle” tih thupui hmangin  thuchhuah a siam a, Congress in party mal a state pathum ah vote a hmu sang ber tiin hei hi lawmna a tling a ti a, UP leh Uttarakhand a BJP chak erawh chu Hindu kulmut tamna ram annih vangin thilmak ani lo tiin a sawi bawk a.

Inthlan result puan anih hnu deuh a Goa leh Manipur-a Congress nilo lamin BJP kaihhruaina hnuaia sorkarna an siam tak hlauh thung hnu leh leh thu ziahlai thleng hi chuan thuchhuah a awm chhunzawm leh lova.

Hetih lai hian MNF President Zoramthanga chuan party thiltihkhawmnaah, “ Congress tlak chhiatzia kan hmu zel a. An lenna ber Punjab ah an sorkar ve tawk,” tiin 2018-a Mizoram a inthlan ah MNF in sorkarna an chan a beisei thu a sawi nghal a.

Hetianga party lian pahnihin state danga inthlan hnu lawka a sorkarna siam dan rinloh lam deuha a thleng an khel lai hian, BJP Mizoram lam chuan an pisa ah an result an lawm thung a, President Prof JV Hluna chuan  ram pumah BJP thli a tleh mek a ni a ti a, tunah rih chuan an party chu Mizoramah te angin lang mahse, 2018 Assembly inthlanpuiah BJP in hnehna a chang ngei dawn a, MNF party in BJP thawhpui a duh a nih chuan ticket an pek zaha an lungawi a ngai dawn niin a sawi ve thung a, Congress party leh MNF party atangin BJP candidate nih duhin mi tha tak tak an lo lut dawn tiin a sawi bakah, CM Lal Thanhawla’n thawhpui a châk niin a sawi bawk a, an hotute pawh a lo be fo tawh tih sawiin, “Kan sawi kan sawi duh lo mai a ni,” a ti.

JV Hluna chuan mipuiin Congress party an nin avangin MNF party chuan len phah ta viauah an inngai chu an tidik lo a ni a ti a, BJP kaihhruai North East Democratic Alliance ah MNF party chu an kaihkuah avangin lian ve viau ah an inngai a ni maithei ni-a sawiin, “2018 Assembly inthlanpuia ticket kan pek zaha an lungawi lo a nih chuan Assam-a Asom Gana Parishad dinhmun ang lek an ni dawn a ni,” a ti bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s