STATE DANG ZAWNGA AN TLÂKHNIAM LAIIN MIZORAMAH NAUSEN KUM TLING LO THI AN PUNG

National Family Health Survey – 4 a a lan dan chuan state 15 zingah kum sawm chhungin Mizoram ah chauh Infant Mortality Rate tlahniam lovin a sang zawk a, hetih lai hian Health Department hmalakna te a phuisui zawk zel tho si. Engvangin nge nausen thi hi an pun ni ta ang?  

Naute

India state hrang hrang 15-a mipui hriselna zirchian a nih hnu ah Mizoram ah chauh nausen kumkhat tlin hma-a thi (Infant Mortality Rate, IMR) a pung niin tunhnaia sorkar laipui in a tihchhuah National Family Health Survey – 4 ah a lang a, hetih lai hian, state dang zawng zawngah chuan nausen thi zat hi a tlahniam thung.

IMR hi nausen dama piang zawng zawng 1,000 zel atanga chhût thin a ni a, mipui nawlpui, a bikin nunau te hriselna lam khawih thil a nih avangin khawvel ram hrang hrang ah ram changkanna tehfung pawimawh taka ngaih a ni.

NFHS – 4 atan hian nikum January atanga December thleng khan survey neih a ni a, survey-a a lan dan chuan Mizoram ah hian nausen dama piang 1,000 zelah 40 chu kum an tlin hma in an boral. Mizoram ah hian kum 2006 khan nausen thi an tlem zawk daih a, khami kum a NFHS survey ah khan IMR chu 34 a ni.

 

State sorkar in nausen thi, raicheh a tlahniam tiin a lo sawi fo tawh thin

Nikum lam khan Mizoram sorkara Health Department hotute chuan vawi engemawzat IMR chungchang hi an lo zirho tawh thin a, hetia an inhmuhkhawm hian Census of India hnuaia Sample Registration System data chu ringin a tlâkhniam zel thu te an sawi thin a, chutih rual chuan tan lâkna tur a la tam tiin an sawi thin thung bawk.

November 1, 2016 khan Health Department hotute chuan Health Minister Lal Thanzara hovin Aizawl Civil Hospital Conference Hall-ah 2016-17 kum chave chunga Reproductive and Child Health leh National Health Mission hnathawhte an thlirlêt a, chutah chuan kum 2013 atanga Mizoram IMR a tlâkhniam zel thu te sawiin, khami kuma IMR 35 ni thin chu kum 2014-ah 32-ah a tlâk thu te leh a kum leh ah chuan 22 a nih tawh thu te bakah nikum kum chanve chhung chuan naupang 1,000 zelah 18 tling lo hret chauh an thi niin an sawi.

 

Survey hrang hrangah Mizoram IMR lan dan inang lo

NFHS – 4 data lo chhuak thar hian Mizoram sorkar in nausen thi leh raicheh zat tunhnai ah a tlahniam  tial tial a tih thin chu a kalh tihna a ni a, Health Department hotute chuan he thu tarlang hmasa ber tu, internet lama thuthar thehdarh tu Scroll hnenah NFHS – 4 thil hmuh chhuah hi an pawm loh thu an sawi a, kum engemaw zat kalta-a survey dangin a tarlan dan chuan Mizorama nausen thi zat hi 1,000 zelah 32 a nih thu an lo hrilh bawk.

Mahse Scroll chuan SRS ai chuan NFHS hi a rintlâk zawk thin a ti a, SRS data-a a lan danah pawh hian Mizorama nausen thi zat hi an pung hrim hrim tho niin a ziak a, kum 2000-a nau piang za zela 17 chuang hret kum tlin hma in an boral laiin 2015 a nih meuh chuan 1,000 zelah 37 an boral niin a ziak a. Hemi awmzia chu, Mizoram IMR hi kum 15 chhungin 80% velin a pung tihna a ni a ti a, a ziahna ah chuan he NFHS – 4 a tel leh tel lem lo mi thiamte chuan NFHS – 4 thil hmuhchhuah hi a rintlâk ni-a an hriat thu an sawi bawk a, pakhat chuan hei hi hriselna thil a nih rualin ei leh in nena thui tak inkaihhnawih a nih bakah hetianga IMR a san nachhan niawm chu Mizoram chhimlam, a bikin Siaha district lamah nausen thi an tam vang niin an sawi nghe nghe.

 

Health Department hmalakna in hma a sawn tih NFHS – 4 in a tarlang

NFHS – 4 ah hian IMR chauh ni lo in nunau hriselna lama hmalakna hrang hrang dang pawh zirchian a ni a, chutah chuan Health Department hian kum hmasa lam ngaihtuah chuan hma a la tha viau a ni tih a chiang.

Mizoramah hmeichhe nau pai zingah an rai tirha inentir te, regular taka inentir chhunzawm te, damdawi ei dan tura ei te, nau hrin tawh hnu-a doctor emaw hriselna lam hnathawk te emaw enkawl zui te, damdawi ina nau an neih ngei nana tanpuina dawng te chu kum 10 kalta ai khan an pung vek niin a tarlang a. Hemi bakah hian mahni in ni lo, damdawi ina nau nei leh nau pian hlimchhawn a doctor emaw nurse in emaw an enkawl zui pawh an pung hle niin a tarlang bawk.

Hetianga inentirna leh damdawi nena inenkawlna lamah hmasawnna a awm zel laia nausen thi an pun tlat si hi eng vang nge ni ta ang? IMR a san nachhan niawm chu NFHS – 4 ah ni lo in Mizoram University mi thiamte chhuina ah hian a lang daih thung.

 

 

Mizoram University in Siaha lama nunau ei leh in duhkhawp lo tih hmuchhuak

Saiha-1
Lawngtlai atanga Siaha panna kawng hi a kual em vangin tualchhungah hriat a hlawh a, mahse, hetianga hmunhla hian nghawng a nei niin mithiamte’n an sawi: buh leh bal chawk luh a harsat vangin hmeichhiate ei a chhia a, nausen an hrisel loh phah

Siaha district-ah hian IMR leh MMR hi district dang aiin a lo sang deuh bik tawh thin a, kum 2013 khan Mizoram pumah IMR hi 35 a nih laiin Siaha ah bik chuan 219 lai a ni a.

Hetiang a nih vang hian kum 2015 pawh khan Health Minister a zin hial a, Mara Auitonomous District Council hruaitu te, Health official te leh Mara tlawmngai pawl te hnenah, “IMR tihniam tur hian Health department chauh chuan hma kan sâwn chak lo a, thawhhona tha tak kan neih chhunzawm zel theih nan sawiho pui turin ka sawm duh che u a ni,” a ti nghe nghe.

Hemi hma hian Mizoram University-a Department of Geography and Resource Management ami te pahnih – Vishwambhar Prasad Sati  leh Lalrinpuia Vangchhia – chuan zirchianna an lo bei tawh a; kum 2016 June thla khan Indian Academy of Sciences leh Current Science Association tihchhuah Current Science scientific journal chuan an zirchianna chu a tichhuak nghe nghe.

An zirchianna ah hian khaw 17 ami hmeichhe nau pai tawh 1,650 lai an kawm a, chutah chuan an ei leh in te zawt chiangin an ei zat calorie chu an chhûtchuak dap a. An hmuh chhuah tak chu mihringin nitin chakna a mamawh chu Siaha-a hmeichhe nau pai tawh te ei leh in hian a phuhruk lo hle tih a ni.

Chawhrualin heng hmeichhia te hian nitin calorie 1,700 bawr vel ei leh in atangin chakna an hmu a, mahse, mihring pangai chuan nitin calorie 2,100 chuang an mamawh thung.

An hmeichhe kawm te zinga 75% phei chuan nitin calories 1,600 aia tlem an ei leh in atangin an hmu nghe nghe.    Hetianga ei leh in atanga chakna an mamawh te an hmuh loh nasat em avang hian Siaha ah hian nau pai lai hmeichhia te chu an hrisel loh phah a, hei vang hian nausen thi an tam phah niin an sawi.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s