CSS HINDI ZIRTIRTUTE’N STATE SORKAR NEN AN INREMNA ANGA DAH NGHEH PHÛT

Mizoram CSS Hindi teacher te chuan vawiin (March 21) khan Vanapa Hall, Aizawl ah Special Conference an nei a, hetah hian resolution pass in kumin February 28-a Central YMA hriatpuia Mizoram CSS Hindi Teacher leh Mizoram sorkar inremna, ‘Extension hi a hlawhtling lo a nih chuan state sorkar in a theih angin hma a la ang’ tih chu sorkar laipui in an service pawh sei a remtih loh avangin Mizoram sorkar nen an inremna ang ngeia dah ngheh an phût.

CSS Hindi Teacher te chu Mizoram sorkar nen an inremna angin Delhi ah an kal a, Ministry of Human Resources Development-a Economic Adviser Dr NK Sahu chuan an service pawhsei chu Plan period a tawp tawh avangin a theih tawh loh thu a lo hrilh niin an sawi a. Sorkar laipui in an tih tur an tih zawh tawh thu leh state kuta awm tawh tur an nih thu Parliamentary Secretary Joseph Lalhimpuia leh Mizoram CSS Hindi Teacher hruaitute hma ah a lo sawi niin an sawi bawk.

Dr NK Sahu hian scheme thar chungchang pawh lo sawiin scheme thar a nih chuan engkim a thar veka kalpui tur a nih thu a sawi niin an sawi.

CSS Hindi Teacher te chuan hetiang a nih tak avang hian Evaluation/Inspection team rawn kal tur chu CSS Hindi zirtirtu 1,305-te tan chuantangkaina nei lo leh him tawk lo a ni an ti a, Dr Sahu ngei pawhin scheme tharah hian zirtirtu an pêk theih zat tur pawh a la hriat bik loh thu a sawi avangin evaluation team te hi rawn kalin mark za-ah za lo pe pawh ni se, tuna CSS Hindi zirtirtu mi 1,305 te tan an service pawhsei sak chu a theih dawn chuang lo niin an sawi.

CSS Hindi Teacher te chuan Dr Sahu hian CSS Hindi zirtirtu nei state pali – Punjab, Nagaland, Odisha, Mizoram – te chu an state-a CSS Hindi zirtirtu te dah nghet turin Education Secretary te theuhah lehkha an pêk tawh thu a sawi niin an sawi a, sorkar laipui lehkha hi Punjab sorkar chuan bawhzuiin an state-a CSS Hindi zirtirtu te chu dah nghet turin file an kal tir mek a, Nagaland sorkar pawhin March 17 khan heng Hindi zirtirtute chungchang ngaihtuahin Cabinet an thu khawm a, state Assembly thut khawm huna pass turin thu an dah niin an sawi a, sorkar laipuiin Mizoram sorkar chu anmahni dah nghet tura hriattirna lehkha a pêk angin anni chu dah nghet turin sorkar an phût a ni.

CSS Hindi Teacher te chuan Mizoram sorkar in Forest Department hnuaia Forest Guard leh CSS Hindi Teacher te thil inanga sawi a tum chu thil dik lo ni a sawiin, Forest Guard te chu 13th Finance Commission sum lo kal atanga lâk an ni a, sanction head pawh nei lo, post siam pawh awm lo, Forest Department tih changtlunna tur project ‘Preservation and Maintenance of Forest’ atana sum lo kal chu Forest Guard lak nan an lo hmang a ni an ti a.

Anni CSS Hindi Teacher te erawh chu sorkar in an post tur siamin DPC kal tlang veka lâk an nih thu an sawi a, Mizoram sorkar hian CSS Hindi Teacher te chu Forest Guard nen sawi pawlh tawh lo se an duh thu leh a rang thei ang bera anmahni dah nghet turin sorkar an phût thu an sawi.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s