GAS CONNECTION: SORKAR LEH IOC CHHINCHHIAH DAN SING NGA CHUANGIN INTHLAU

Supply Minister-in State Assembly-a unstarred question a chhanna ah chuan Mizoramah eirawngbawlna gas consumer nuai thum dawn an awm a ti a. Mahse Mizorama gas sem zawng zawng te neitu Indian Oil Corporation Limited chuan consumer nuai hnih sing nga an tling lo niin a chhinchhiah thung

20160922_092707.jpg

March 20 (Thawhtanni) khan opposition MLA Dr K Beichhua-a’n ziaka chhân tur zawhna (unstarred question) a thehluh chu Supply Minister John Rotluangliana’n chhângin Mizoram-ah gas distributor 50 an awm thu te, an vai hian consumer nuai thum dâwn an neih thu te leh kumin January leh February thla chhungin distributor te hian domestic gas cylinder nuai hnih leh sing sarih chuang hret an lei thu te a sawi a.

The Frontier Despatch (TFD) chuan he unstarred question chhana hi Mizorama gas sem thin neitu company – Indian Oil Corporation Limited, IOCL – in a chhinchhiahna nen a enkawp a, House-a zawhna chhana leh company chhinchhiahna ah inmil lo a tam hle tih a hmu chhuak.

House zawhna chhâna-a a lan dan chuan Mizoram gas distributor 50 te hian belhkhawmin consumer nuai thum dâwn an nei angin lang mahse, IOCL chhinchhiahna ah erawh chuan heng gas distributor te hian an vaia belhkhawmin active domestic consumer nuai hnih leh a chanve tling lo an nei angin a lang thung. Hemi awmzia chu, House-a zawhna chhânna leh IOCL chhinchhiahna-a consumer awm zat te chu sing nga sang sarih chuangin a inthlau tihna a ni (a kimchangin phek 6 ah).

Thla khata gas lei zât ni-a sawiin consumer awmzât a daih lo nasa

Supply Minister-in unstarred question a chhânna ah chuan gas distributor te hian kumin January thla  chhung khan domestic gas cylinder nuai khat sing li sang sarih chuang hret (1,47,024) an lei a, hei hian House chhânna vêka consumer an neih zât ni-a sawi nena enkawp chuan consumer awm zawng zawng zâtve pawh a daih lo tihna a ni a.

IOCL chhinchhiahna-a active domestic consumer an neih zât belhkhawm nena chhût pawhin January thla hian consumer zawng zawng za-a sawmruk (60%) a daih tâwk tihna a ni bawk.

Tin, kumin February thla chhung khan domestic gas cylinder nuai khat, sing hnih, sang thum chuang (1,23,114) an lei a, hei hian House chhânna veka consumer an neih zat ni-a sawi nena enkawp chuan consumer awm zawng zawng za-a sawmli pakhat a daih hram tihna a ni a.

IOCL chhinchhiahna-a active domestic consumer an neih zat belhkhawm nena chhût pawhin February thla hian consumer zawng zawng za-a sawmnga pakhat tling lo hret (50.75%) a daih tâwk tihna a ni bawk.

House data: thla hnih chhunga gas lei zâtin consumer te a daih lo nasa

Chhungkaw member tlem deuh te leh eirawngbawl lama in renchem dan hre deuh te chuan gas cylinder pakhat hi thla khat leh a chanve atanga thla hnih te pawh an hmang thei thin a, hetianga chhût chuan chhungkaw thenkhat chuan thla hnih danah vawikhat gas an la pawh a ni thei ang.

Dan angin chhungkaw khat zel hi consumer pakhat ni ta se la, thla hnih chhungin gas cylinder vawikhat la ta ang se la, House-a zawhna chhânna-a a lan dan chuan Mizorama chhungkaw sawm zela pakhat (10%) chuan thla hnih chhung hian gas an chang dawn lo tihna a ni a.

Mahse, Mizorama gas consumer te zawng zawng hian thlatin gas bur khat hmang ni ta ang phei sela chuan January thla khan consumer zatve chuang (51%) in gas kan nghei dawn tihna a ni a, February thla phei kha chuan za-a sawmnga pakua (59%) in gas kan nghei dawn tihna ang a ni.

IOCL data: thla hnih chhungin consumer aiin gas lei zat a tam duai

Mizorama gas distributor zawng zawng te sumdawnna fawng chelhtu IOCL chhinchhiahna-a active domestic consumer awm zât atanga distributor ten January leh February thla-a an lei zat ni-a sawi tehkhin chuan Mizoram hi eirawngbawlna gas chungchangah kan hnianghnar hle tihna a ni daih thung.

Consumer pakhat gas lei theih zât bituk awm lo

Dan hnuaiah chuan eirawngbawlna gas consumer tin te hian a man tlawm (subsidized rate) in kum khatah cylinder 12 an la thei a, hemi bâk hi chu a man dik tak (non-subsidised rate) in an lei thei thung a, non-subsidised rate-a lak theih zat hi bituk a awm chuang lo thung.   Tin, eirawngbawlna gas hi consumer te’n an mamawh ang zel a pêk tur a ni bawk.

Mizorama gas hman awmchhun Indane neitu company IOCL Citizen’s Charter ah pawh hei hi a lang chiang viau a, hetah hian Indane distributor te chuan consumer te’n gas an book hnu ah an inah an hlan (deliver) tur a ni a, rokhawlhna lian tak vangin emaw consumer te inah an deliver lo emaw a nih chuan consumer te hian pawisa engemaw zat an hmu lêt thei bawk a ni.

Eirawngbawlna gas-a inbumna lian tak

Eirawngbawlna gas chungchang hi TFD chuan September 30, 2016 khan a lo ziak tawh a, khami tum khan Mizorama Gas Distributor-te’n mipui an bum dan chipchiar takin a ziak a, Mizorama Gas Distributor 50 te chuan IOCL hnenah chhungkaw tinte chu an kawngkhar ah eirawngbawlna gas an pêk vek thu an hrilh bakah gas te chu sms leh internet kal tlangin mipuite’n an chah a, hei hi ni hnih chhungin an pe deuh vek niin an insawi a, IOCL pawhin Mizorama eirawngbawlna gas distributor te chu an ti tha tiin 5-star rating a pe vek a, India ramchhungah Mizorama gas distributor te chu titha ber nihna an chang phah hial a ni.

Gas Distributor-te’n chhungkaw tin te an kawngkhar thlenga gas an pêk thu IOCL hnena an report chungchang hi thu dik lo a nih avangin Silchar-a IOCL hotute hnenah hêkna vawi engemaw zat a awm tawh nghe nghe a, hei vang hian Silchar-a IOCL hotute chuan Distributor pahnihte chu showcause notice a pe nghe nghe a ni.

Gas lâk zat ah thilmak

Gas semtute’n veng tina gas an sem thinah hian chhungkaw tin lâk zat an chhinchhiah a, hei hi IOCL hnenah an report a, he an report hi TFD chuan a chhui chiang tawh bawk a, chhungkaw tam tak chu gas an lâk zat aia tam la anga chhinchhiah an ni a, hei hian eirawngbawlna gas chu dan lo-a hralh a tam phah a ti rinhlelhawm hle bawk a ni.

Veng hrang hranga chhungkaw hrang hrang in an gas lâk dan an consumer card-a distributor te chhinchhiah dan leh IOCL-a an report dan TFD in a enfiahna ah chuan chhungkaw tam takte chu a taka gas an lâk zat aia tam la anga chhinchhiah an ni a, bur riat la te chu bur 10 la anga chhinchhiah an ni.

Aizawl Chaltlang Venga V Lalhruaitluanga te chhungkua chuan April 1, 2015 atanga March 31, 2016 chhung khan Zoram Indane Service atangin bur 11 an la a, mahse, Zoram Indane Service in IOCL-a an report dan chuan V Lalhruaitluanga te hi bur 17 an pe tiin an report a, H Laltanpuia te chhungkua pawhin Zoram Indane Service atang tho hian hemi hun chhung hian bur thum an la a, mahse, IOCL-a report dan chuan bur li la anga tarlan an ni.

Suakchhunga Gas Agency hnuaia gas la thin Aizawl Electric Venga chhungkaw tam takte pawh an consumer card atanga an gas lâk zat leh IOCL-a report dan TFD in a enkawp a, April 1, 2015 a\anga March 31, 2016 inkar khan bur 10 an lâk laiin IOCL-a report dan chuan bur 12 la anga tarlan a ni a, chhungkaw tam tak te pawh an consumer card-a an gas lâk zat chhinchhiah aia tam la angin IOCL ah report a ni.

(April 1, 2015 atanga March 31, 2016 chhunga eirawngbawlna gas lâk dan tarlan hi TFD in eirawngbawlna gas chungchang a ziah hmasak [September 30, 2016] laia gas distributor-te’n IOCL-a report an pek dan a ni)

Assembly chhana leh IOCL report inmil loh thu

Assembly Session neih meka MNF member Dr K Beichhua-a zawhna ziaka FCS&CA Minister John Rotluangliana chhanna leh IOCL chhinchhiah dan a inmil loh chungchangah hian TFD zawhna chhangin Mizoram Indane Distributor Association (MIDA) General Secretary H Zosangliana chuan Mizorama Gas Distributor 50-te’n consumer an neih zat chu chiang takin a hre thei lo niin a sawi a, Mizorama IOCL Manager C Lalpekliana chuan consumer te an insawn ve thin avang leh connection thar a awm ve deuh reng avangin Distributor 50-te’n consumer an neih zât chu chiang takin hriat a harsa a ni a ti a, mahse, FCS&CA Minister in House-a zawhna a chhanna chu a dik hlei deuh ni-a a hriat thu sawiin consumer hi nuai 2 sing 5 an tling lo deuh niin a sawi. Distributor te’n gas an lei zat chungchangah erawh chuan C Lalpekliana hian Assembly zawhna chhanna hi ama buaipui niin Mualkhang leh Borkhola (Assam)-a bottling plant te a\anga a lâk khawm sorkar hnenah a pe niin a sawi.

wp-1490428846766.jpg


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s