HC IN RMSA SCHOOL ATANA RAM PE TU FAPA CLERK ATANGA BAN CHU HNA PE LEH TURIN SORKAR A HRIATTIR

A fapa-in hna a neih nana Tuipui khua ami khawtlang mamawh ram petu leh sorkar inbiak lawkna chu ziakin awm lo mahsela, court chuan sum sanction a awm loh vang ringawta sorkarin a thutiam a bawhchhia chu tha a ti lova, sorkar chu dik tak leh hleih nei lo-a rorel tur a nih avangin hna dang zawn sak turin thu a pe

 

Champhai District Tuipui khua-a RMSA school atana ram petu fapa, an ram pek avanga sorkar in lawmthu sawi nana clerk-a an dah an ban leh chu Gauhati High Court chuan hna pe leh turin sorkar a hriattir.

March 15-a thupek a chhuah ah Gauhati High Court Aizawl Bench chuan Mizoram sorkar chu thupek a chhuah atanga kar riat chhungin RMSA school atana ram petu fapa hi a thawh theih awm tawk hna pe leh turin a ti a, sorkar thil tih dan chu dik lo a tih thu a sawi.

RMSA school atana ram pek dan

RMSA hian school din tumin Tuipui khua ah hian ram an zawng a, mahse, an duhthusam ram an hmuh loh avangin Thanmawia ram bigha 11.5-a zau chu school atan hian an dil a, an dil ang hian Thanmawia hian a ram chu school atan hian a pe a, hetah hian Thanmawia leh RMSA hotute chu Thanmawia fapa Lalpianpuia chu he school-a clerk pakhat anga chhawr turin a thuphungin an inrem a, Tuipui khua ah hian RMSA school din a nih takah chuan March 30, 2012 khan Tuipui New Secondary School ah chuan Lalpianpuia pawh chu contract in a thawk ve ta a.

 

Lalpianpuia ban a ni, a pa Court ah kal

Lalpianpuia pa ram pekah chuan RMSA chuan school building chu an sa tan a, mahse, April 6, 2014 khan RMSA hotute chuan Lalpianpuia chu lehkha thawnin sorkar laipui atanga sum an dawn thenkhat tihtawp a nih avangin RMSA hnuaia Laboratory Attendants, School Clerks leh Guidance & Counseling Staff te chu March 31, 2015 hnu lam atanga chuan chhawr chhunzawm theih an nih dawn loh thu an hriattir a.

Lalpianpuia pa Thanmawia chuan RMSA hotute hi lehkha thawnin a fapa a hna atanga an chawlh tir tur chu ngaithiam tura ngenin July 29, 2015 khan Chief Minister pawh lehkha thawnin clerk atanga a fapa chawlh tir a nih dawn chuan hna dang pe turin a ngen a.

Mahse, Thanmawia hian RMSA atangin emaw, Chief Minister atangin emaw a fapa tana hna dang pek a nih tur thu lehkha engmah a dawn tak loh avangin January 12, 2016 khan RMSA chu Legal Notice pe in school atana ram pe a nih avangin a fapa hna chu pe kir leh turin a ti a, hei bakah hian RMSA hotute chu school tura a ram a peka a thuphunga an inremna bawhchhia ah a puh bakah ram danpui bawhchhia ah a puh a ni.

 

Sorkar ukil thu leh hla

Sorkar ukil chuan Tuipui khua-a RMSA school din tur hian Village Council in ram pek tur an nei a, mahse, Thanmawia hian a ram chu a pek theih thu a hrilh avang leh Thanmawia ram chu VC te ram aia aschool dinna tura a that bawk vangin RMSA hotute chuan school din nan an thlang ta zawk a ni a ti a, hei bakah hian Thanmawia leh RMSA hotute hi Thanmawia fapa chhawr chungchangah hian kum khat chhung inremna an nei a, a bak eng inremna mah an nei lo niin a sawi a. Hei bakah hian Thanmawia fapa chhawr chu RMSA in sorkar atanga sum an hmu dan azira pawhsei thei a ni tih chauh a ni a, sorkar laipui atanga sum hmuh a tawp hnu ah chhawr zui theih a ni ang tih a awm lo niin a sawi.

Sorkar ukil chuan sorkar laipui chuan RMSA in Thanmawia fapa a chhawrna ang School Clerk te hlawh tur sum a rawn pek te chu a titawp vek niin a sawi bawk.

 

Court thu leh hla

Court chuan Thanmawia ukil leh sorkar ukil te thusawi atanga thil chiang ta awm chu Thanmawia ram pekah RMSA in school an sa a, a fapa pawh RMSA in School Clerk atan an chhawr a. Sorkar laipui atanga RMSA in sum a dawn thin a tawp avanga Thanmawia fapa a chhawrna a tihtawp sak hi a tira an chhawr dawnah a hlawh turte chu sorkar laipui tum tur a ni tih inziak hmuh tur pakhatmah a awm lo a ni a ti a.

Thil chiang em em bawk chu Thanmawia ram pekah RMSA in school a sa thei tih a ni a, leilung dana thil chiang tak chu ‘sorkar in a khua leh tui te lakah dik tak leh hleih nei lovin ro a rel tur a ni’ tih a ni a, sorkar chuan dan mumal tak a nei a, sorkar chu Thanmawia ram pek avanga school sa thei a ni tih chiang taka a lan hnu ah a fapa a hna atanga a chawlh tir chu thil felhlel tak a ni a ti bawk a.

Supreme Court in ‘Onkar Lal Bajaj and Others-vs- Union of India and Another’ chungchang a relna ah sorkar chu a dik tur a ni a, lai takin ro a rel tur a ni a ti bawk a. Court chuan RMSA in Thanmawia ram pek avanga school din thei chauh an ni tih a chian avang leh sorkar chu dik tak leh hleih nei lo-a rorel tur a nih avangin Thanmawia fapa Lalpianpuia a hna atanga a chawlh tir chu thil dik lo a ni a ti a. Hei bakah hian Thanmawia tan chuan ram chân bawk, a fapa hna chân bawk chu thil ni thei a ni lo a, leilung dan dik tak leh dik taka rorelna mit atanga thlir chuan RMSA in a hna atanga Lalpianpuia an chawlh tir chu thil dik lo a ni a ti a.

Court sang ber rorelna tlawhchhanin High Court chuan sorkar chu hriattirna pe in Lalpianpuia chu hna nghet emaw, a nghet lo emaw a thawh theih awm tawk chu thupek a chhuah atanga kar riat chhunga pe turin a ti.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s