HIGH COURT IN SORKAR HNATHAWK KUM THLAK DIL PHALSAK LO

Revenue-a hnathawkin a pension dawn lamah kum thlak a dilna chu sawrkarin a hnawl hnu ah court ah a zualko a, Gauhati High Court chuan a hnuaia thawk te kaisan dan te thlenga thil nghawng thei thil a nih vang leh court sang zawk leh sorkar laipui leh state sorkar te thil phal loh awmsa a nih avangin a zualkona a hnawl

 

Land Revenue & Settlement Department-a Revenue Sub-Inspector Lalthanga Royte chuan Gauhati High Court Aizawl Bench-ah a service kum, September 5, 1957 chu September 5, 1962 a ni tiin thlak a dil a, a dilna ah hian a ukil kal tlangin hetianga sorkar hnathawk kum thlak dil hlawhtling hrang hrang leh Court thu chhuak thenkhatte an tarlang a, mahse, Court chuan ngun taka a ngaihtuah hnu ah Lalthanga Royte dilna hi a hnawl sak ta a ni.

 

Kum 5-a upa tih hriat chhuah dan

Lalthanga Royte hi kum 1987 khan Land Revenue & Settlement Department-ah Field Assistant in a lut a, a luh hlim hian a service kum chu September 5, 1957 a ni a, a ukil in High Court a hrilh dan chuan Lalthanga hian kum 2015 January thla khan a service book ah September 5, 1957-a piang angin a inziak tih a hmu a, April 7, 2015 ah sorkar ah a service book-a a pian kum dik lo siam tha turin a ngen a, mahse, sorkar chuan sorkar hnathawkin an service kum thlak danglam an duh chuan service-a an luh tirh atanga kum 5 chhungin dilna an thehlut thei ang an ti a, kum 28 hnu-a service kum thlak danglam a rem tih loh avangin a phal sak lo a. October 18, 2016 khan High Court ah kalin a service book-a September 5, 1957-a piang anga inziak chu September 5, 1962-a thlak a dil a ni.

 

Court-a naupan dil dan

Lalthanga ukil Lalchhanliana Khiangte chuan Court ah hian Lalthanga chu September 5, 1962-ah a piang ngei a ni tiin a finfiahna tur a birth certificate te, a voter ID te, HSLC-a a admit card te, High School a kal laia a provisional leh transfer certificate te bakah a matric certificate te a thehlut a, a matric certificate dik tak erawh a tihbo tawh avangin MBSE atanga a tlukpui an lak chhuah a nih thu a sawi a, chuvang chuan matric certificate-a a pian kum chu sorkar-a a service kum pawm a nih thu a sawi.

Lalthanga ukil in lehkha pawimawh te a thehluh belhchhah hian Court sang ber rorelna hrang hrang – Mohd. Yunus Khan –vs- U.P.Power Corporation Limited and Others reported in 2009, Loksheswar –vs- Assam State Electricity Board & Ors reported in 2016, Thuleswar Hazarika v. State of Assam & Ors reported in 2016, Satyen Tendulkar v. State of Assam reported in 2014, Judgment & Order dated 26.09.2007 passed in the case of Shri. K. Thanmawia v. State of Mizoram & Ors – a thil tel bawk a.

 

Sorkar ukil thu leh hla

Sorkar ukil AK Rokhum erawh chuan Lalthanga service book-a September 5, 1957-a piang anga inziak hi Lalthanga hian a hriatpui tih a service book ah hian hming a ziah hnan niin a sawi thung a, Lalthanga hian April 5, 2010 leh May 24, 2011 khan Form III hmangin sorkar ah an chhungkua member te hming a thehlut a, hetah pawh hian chiang takin September 5, 1957-a piang a nih thu a inziak niin a sawi bawk a, Lalthanga hian a kum dik lo ni-a a sawi sawiselna hi sorkar ah February 2, 2016 ah chauh a thehlut a, hei bakah hian Mizoram sorkar pawhin a phalsak tawh lo a, July 10, 2014 khan Mizoram sorkar chuan Office Memorandum tichhuakin ‘sorkar hnathawk service kum thlak duhte chuan service an luh atanga kum 5 chungin dilna an thehlut thei ang’ tih a ni a, Lalthanga Royte erawh chuan sorkar hna a thawh tirh atanga kum 28 hnu ah dilna a thehlut chauh a, hei hi dan kalh niin a sawi a, a dilna hi a pension dawn hnaiha phalsak chi ni-a a hriat loh thu a sawi.

 

Court in engtin nge a tih

Judge chuan Lalthanga Royte hi rim taka sorkar hna a thawh tawp lama a service kum thlak a rawn dil hi phalsak ni ta se, zawhna awm thei chu a service book ah te a service kum chu September 5, 1957 angin chiang takin a inziak a, an chhungkua chungchang sorkar-a a lo thehluh tawh ah pawh a service kum chu September 5, 1957 tiin amah ngei pawhin a ziak a,  amah hian a matric certificate dik tak a nei tawh bawk si lo a, Court-a matric certificate dublicate a thehluh hi February 13, 2016-a MBSE officer pakhat pek a ni a, a voter ID pawh May 12, 2005-a chhuak a ni a, heng lehkha pawimawh pahnihte hian Lalthanga Royte hi September 5, 1962 ah a piang ngei a ni tih a finfiah lo niin a sawi a.

Lalthanga ukil in lehkha pawimawh baka Court sangber thutlukna hrang hrang a thil tel te pawh Supreme Court chuan sorkar hnathawk pension hun chu an service book-a an kum inziah dan a ni tur a ni a, sorkar hnathawkin an service kum an sawi atanga en tur a nih loh tur thu a sawi a.

Court sangber leh sorkar in sorkar hnathawk kum thlak dilna chu an service tan tirh atanga kum 5 chhungin dilna an siam thei ang tih a ni bawk a, Mizoram sorkar in July 10, 2014-a Office Memorandum a tihchhuah pawh Lalthanga Royte hian a khing lo niin a sawi.

Hei bakah hian Lalthanga Royte hian a service book-a a kum ziah dan a pawm a ni tih amah ngeiin a hming a ziah hnan hnu leh April 5, 2010 leh May 24, 2011-a sorkar-a an chhungkaw dinhmun a thehluhna ah September 5, 1957-a piang anga a inziah bawk avangin September 5, 1962-a piang anga a service book thlak a dilna chu hnawl a nih thu a sawi a.

Tin, GHC hian State of Haryana v. Satish Kumar Mittal & Anr reported in 2010 9SCC 337-a Supreme Court in a sawi chu a sawichhawng leh a. GHC chuan hemi chungchangah pawh hian sorkar hnathawkin a kum thlak dilna chu uluk taka ennawn a ngaih nachhan chu thui tak nghawng a neih vang a ni a ti a. Sorkar hnathawk kum thlak dil hnuai a hnathawk dang, kum tam tak kaisan lo nghak ve tawh te service a nghawng thui thei hle a, a then phei chuan an promotion hmuh tur ang te an hmuh loh hlen phah thei a ni a ti bawk.

 

Mizoram sorkar hnuaiah service lai 52 in an kum thlak

The Frontier Despatch (TFD) in DP&AR-a RTI dan hmanga zawhna a zawh channa atanga a lan danin, sorkar hnathawk lai mi 52 in an kum an thlak danglam a, heng zinga mi 20 te chu service-a an luh tirh aiin an upa zawk a, a bak 32 te chuan an kum tih naupan an dil chu sorkar in a pawmpui a, an zingah hian MCS officer B Lalhmingthanga a tel ve a, ani hi kum thum lai naupang tura a service kum thlak a dil chu 2014 November khan phalsak a ni.

November 18, 2016-a TFD in PWD CE John Rammawia’n sorkar hriatpui lo-a a service book la chhuaka a service kum a lo thlak danglam chungchang a ziahah sorkar hnathawk lai mi 52 te kum thlak chungchang hi ziah lan a ni a, B Lalhmingthanga chungchang ziah lan chu hemi ni hian MCS officer H Laizika chuan DP&AR Secretary hnenah TFD chanchinbu behchhanin an pu kum thlak chu ennawn a dil a, a dilna hi pawmsakin sorkar chuan B Lalhmingthanga hi kumin February 6 khan pension in a chhuah tir a, H Laizika pawh hi Additional Secretary-a pension tura a inngaih laiin kumin February 23 khan Secretary ah a kaisang a, ni ruk chhung a Secretary ve hman ta a ni.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s