KALADAN PROJECT KAWNG SIAL: A BILHA THO LO

Hmarchhak biala project lian leh langsar ber pawl, Kaladan Multi Modal Transit Transport Project chu hnathawh tan hma atangin lei (soil) zirchianna leh survey puitling tih a ni lova, hei hian re-estimate vawi hnih ngawt hringin kum li-a zawh tur kum riat thawh a ngaih phah

 

kaladan-3

THLALAK: Kum 2014-a Committee on Estimates in Kaladan Project a hmuna a tlawh khan kawng chu heti hi a ni a. Kum 2010-a he project duan \antirh a nih khan, Lawngtlai leh Zochachhuah inkar kawngpui hi kum li chhunga thawh zawh hman tura ruahman a ni a, tunah erawh chuan nakuma thawh zawh hman beisei a ni

 

India in zalenna a sual chhuah atang khan India hmarchhaka state hrang hrang te chuan tuipui an hlat nghal a, Bangladesh a lo pian tak avangin hmasanga Chittagong lawngchawlhna awlsam te a kal theih thin kha kalpawh hleihtheih a ni ta lo va, hmundang atanga bungraw châwk luhna tur awmchhun chu Chicken’s Neck Corridor ti-a hriat lar, West Bengal-a Siliguri khua kaltlangin a nih phah ta a ni.

Mi thiamte chuan heti khawpa bungraw pawimawh châwk luh a harsat avang hian hmarchhak state te chu ramchhung hmun dang aiin a retheih phah ah an ngai fo. Hei vang hian kum 10 vel kalta khan ram hruaitute chuan kawng dang an zawng tan a, chutah chuan Lawngtlai District-a Kaladan Multi-Modal Transit Transport Project (KMMTTP) hi a lo piang ta a ni.

Kaladan Project in a tum ber chu hmarchhak state te leh tuipui inzawm theihna kawng zawn a ni a, project ruahman dan chuan Sittwe port atangin luitui leh lirthei kawng tha tak sial a, chumi hmanga awlsam taka Mizoram leh hmarchhak mamawh bungrua phurh luh a ni.

 

Kum li-a zawh tur kum sarih thang ta

Kum 2010-a hnathawh tan tura hmalâk a nih khan Mizoram chhung, Lawngtlai khua leh Myanmar leh India inrina hmun Zochachhuah inkar kawng sial chu kum li chhunga zawh tura ruahman ni mahse, tun dinhmunah chuan kum sarih thawh tawh a ni na chungin zawh a la ni ta lo a, hei kawng sial mek viltu PWD chuan nakum 2018 ah hian zawh inbeisei mahse, Mizoram Assembly hnuaia Committee on Estimates chuan nikuma House-a an report pharh ah hei pawh hi a rinhlelhawm an lo ti tawh a ni.

Khatih hunlaia Committee Chairman Lalrinliana Sailo leh member dang te chuan hetiang khawpa hna muang hi an ngaimawh hle a, hnathawh tan a nih hnu-a estimate vawi hnih lai ennawn a ni te, hetianga ennawn a nih avanga cheng vbc 534.63 sen belh a ngaih dawn thu te leh he kawng sial hna a muan nachhan te chu thil pumpelh theih, engineer te hna thiam loh vang leh state ti hmingchhe thei thil a ni an lo ti hial a.

Committee on Estimates in nikum March 30-a an report pali-na an thehluh ah phei kha chuan revised estimate siamtu engineer te chu tute nge an nih chhuichhuah leh tunhnu ah project lian ah chhawr tawh loh ni se tiin a duh dan a sawi nghe nghe.

Tuna Assembly session kal lai ah hian Committee Chairman nihna changtu PC Zoramsangliana kaihhruai in Committee on Estimates chuan report thar a thehlut leh a. He report thar ah hian report hmasa zawka revised estimate siamtu engineer te zawn chhuah leh hna pawimawh pek tawh loh chungchanga PWD-in hma a lâk dan tarlan a ni a, mahse, hmalâkna ai chuan insawifiahna a tam zawk.

 

A bilha tho lo kawngpui

PWD chuan Kaladan kawng sial dan tura Detailed Project Report (DPR) hmasa ber chu Ministry of Roads, Transport and Highways (MoRTH) hnuaia RITES Company in a siam niin a sawi a. Hei hi Ministry chuan pawm lovin Mizoram PWD chu DPR thar siam tura tih a ni a. PWD chuan Khawruhliana Class-I contractor C Lalhluna chu ruaiin, ani chuan hnamdang engineer Dhadhan Jay, Gurgaon khawpui ami ruai chhawng leh in DPR thar a buatsaih ta a. Anni hian “hun chep tak karah” kawng sialna tur hmuna lei (soil) zia te zirchiang hmasa lovin leh survey nei mumal lovin DPR hi an thehlut a ni tiin PWD chuan Committee chu a hrilh a. PWD pawh chuan DPR chu lei zia leh lei (bridge) dawhna tur hmuna lei ngheh leh ngheh loh zirchiang chuang lovin sorkar laipui ah an thehlut a, hnathawh nan cheng vbc. 575.696 an hmu ta a ni.

Kawng sial hna an thawh hnu hian lei chu a nghet lo tih an hmu chhuak chauh niin PWD hotute chuan Committee an hrilh a, hei vang hian sorkar laipui hotute nen a hmunah enfiahin revised estimate cheng vbc 677.28 chu an siam leh ta niin an sawi bawk.

Revised Estimate siam a nih hnu hian thil felhlel dang an hmuchhuak leh zel a, kawng chu tlema siamrem a ngaih bakah lei ngheh loh avangin retaining wall leh lei chelh nghehna tur chi hrang hrang sak belh a ngai leh a, drain te tihzauh a ngaih bakah kawngsir ah eng engemaw an bun bawk nen, revised estimate vawihnihna siam leh a ni a, nikum May 2016 khan cheng vbc 1,013.52 sanction leh a ni bawk a ni tiin PWD chuan Committee an hrilh bawk.

Hetianga an sawifiah hnu hian Committee on Estimates chuan an chhanna chu pawm in bawhzui zel a ngai tawh lo a ti ta a ni.

wp-1490425381327.jpg


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s