MIZORAM RAIPUAR ENKAWL AH HMASAWN, NAUTE/NAUPANG DAMDAWI HMANGA ENKAWL AH HNUNGTAWLH

 

Sorkar laipuia Ministry of Health and Family Welfare hnuaia kum 10 dana survey pui neih thin, National Family Health Survey vawi li na (NFHS-4) chu tun hnai khan tlangzarh a ni a. He survey ah pawh hian Mizoram mipuite hriselna dinhmun zirchian ve niin, Mizorama survey buaipuitu Research & Development Initiative (RDI) chuan kum 2016 February leh October inkar khan an bei a, chhungkaw 11,397, hmeichhia 12,279 leh mipa 1,617 te an zirchiang a ni. Helaiah hian nunau te enkawl chungchanga NFHS-4 in a hmuh chhuah thenkhat te kan han tarlang e.

hnute pe lai

Khawvel pumah nu hnute tluk hi naute tan chaw tha a awm lo tih mi thiamte pawm tlan a ni a. NFHS-4  chuan Mizoramah pawh nausen te chu nu hnute ngei pek uar deuh deuh a nih zel thu a lang a ni. Nau piang hlim an pian hnu darkar khata nu hnute pek chu 65.5% ni thin kha 70.2% ah a pung a. Tin, naute thla ruk hnuai lam nu hnute chauha chawm (exclusively breastfed) chu 46.1% ni thin kha 60.6% ah a kaisang bawk.

Nau chaw pe

Naupang kum 5 hnuai lam, an san tur anga ngaih pha lo (stunted) an tlahniam a, naupang than tur anga  thang lo hi 39.8% ni thin kha 28% ah a tlahniam tawh a. Tin, naupang kum 5 hnuailam cher lutuk (wasted) 9% awm thin kha 6.1% chauh an awm tawh bawk. Hemi rual naupang cher uchuak (severely wasted) 3.6% ni thin pawh 2.3% ah an tlahniam a, naupang an rih zawng tura ngaih ni pha lo (underweight) pawh 19.9% atangin 11.9% ah an tla tawh a ni.

Nau nei

Damdawi ina nau nei zat 59.8% ni thin kha 80.1% ah a pung a, mahse, mahni in lama  nau  nei mi thiam in an enkawl erawh chu 5.8% ni thin kha 3.8% ah a tlahniam thung. Nau nei zingah doctor emaw, nurse emaw, mi thiam dang emaw in an neih laia an enkawl chu 65.4% atangin 83.8% ah an pung bawk.

Naupai doctor en lai

Raipur enkawl lamah hmasawnna a nasa viau a. Thla thum rai tlin hmaa raipuar inentir zat 42.9% ni thin kha 65.7% ah a pung a, raipuar an rai laia vawi li aia tlem lo inentir pawh 45.6% atangin 61.7% ah an pung a, tetanus venna-a chiu pawh 51.4% atangin 82.7% ah an pung a, tin, an rai laia ni za chuang iron folic acid ei pawh 17.8% atangin 53.8% ah an pung. Hei bakah hian raipuar rai laia enkawl theih dan chikima enkawl 11.8% ni thin kha 38.5% ah an pung bawk a ni.

Naute chiu lai

Naute thla 12 leh thla 23 inkar BCG, measles, polio leh DPT inchiuna dawng kim vek 46.5% ni thin kha 50.5% ah a pung a, mahse hemi rual naute BCG-a chiu chu 86.4% ni thin chu 75.3% ah a tla hniam thung a, polio vaccine dawng kim pawh 63.5% atangin 61.7% ah a tla hniam a, DPT vaccine dawng kim pawh 66.8% atangin 61.7% ah a tla hniam a, measles vaccine dawng pawh 69.5% atangin 61.1% ah a tla hniam. Hetih lai hian, naupang thla 6 atanga thla 59 Vitamin A ei chu 40.2% chauh an nih thin laiin 68.6% ah an pung thung.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s