PROPERTY TAX: SORKAR BUILDING 700 CHUANGIN LA PE LO

property tex

Sorkar kum kal lai 2016-17 chhungin Aizawl Municpal Corporation (AMC) hnena property tax chhun luh hun kar khat chuang awrh la awmah Aizawl khawpui chhunga sorkar department hrang hrang te chuan an building neih te atanga property tax pêk tur an la pe kim lo nasa hle a, The Frontier Despatch (TFD) in a hriat theih chinah department 25 hnuaia building 700 chuang zet atan property tax hi pek a la ni lo.

March 21 thleng khan sorkar department hrang hrang 29 te chuan an building 267 atan property tax hi pe tawh mahse, sorkar building sangkhat dawn awm atanga chhût chuan building awm zawng zawng za-a sawmsarih pathum (73%) chuang in property tax hi an la pe lo tihna a ni.

Tun thla tir lama AMC Board of Councillors meeting ah pawh property tax pek a nih dan chungchang hi sawi lan a ni a, Aizawl Mayor PC Lalhmingthanga chuan report pe in mipui te chuan property tax hi pe tha viau mahse, sorkar zawk hian an pe tha lo hle niin a sawi nghe nghe. Mayor hian Aizawl mipuite zingah property tax la pe lo te pawh tun thla chhung, tax pêk theih thla hnuhnung berah hian pe an awm nual thu a sawi a.

“Mipui hi chu kan fel a, a hunlaia pe lo a hnu a inthiam thei ngang lo rawn pe leh te pawh hi an awm nuk mai,” a ti a, “Mahse, sorkar lam zawk hian an pe tha lo viau a, lehlamah chuan hetianga sorkar department berin property tax an pek that loh chuan mipui pawh hian an pêk that duh bik loh phah a hlauhawm in ka hria,” a ti bawk.

Mayor-in councilor te hmaa report a pêk tum khan property tax hi AMC hnenah cheng vbc 2.03 a lût tawh a, khami hnu khan engemaw zat chu lut belh leh tho mahse, tun dinhmunah cheng vbc 2.1 vel a ni a. AMC-a hnathawkte chhût dan chuan property tax hi tun sorkar kum kal lai ah hian vbc. 2.7 vel tura ngaih a ni thung.

AMC Councillor Laltlanzova Khiangte chuan property tax pêk chungchangah mipui chungah councillor leh AMC thawkte chu an lawm hle tih a sawi a, he chhiah lût zawng zawng atanga za-a sawmriat (80%) chu mipui te tana hman leh tur a nih vangin mahni chakai khawrh an nih thu a sawi bawk.

Laltlanzova leh AMC Councillor dang te hian nikum November thla khan Himachal Pradesh khawpui Shimla an tlawh a, a sawi dan chuan Shimla ah hian mipui nuai hnih emaw chauh cheng mahse, property tax ah hian kumtin cheng vbc. 15 vel a lût a. “Shimla ah chuan Municipal Corporation hi a upa tawh a, tin, an inenkawlna a changtlung bawk a, property tax pawh hi an la tam viau a. Aizawl ah erawh chuan mipui kan harsa a, tih san vak chi a nih lo vangin mihring nuai thum emaw vel chengah hian property tax cheng vbc 3 tling lo kan la mek a ni,” tiin a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s