SORKAR LAIPUIIN BRU TE THIL PHÛT A PEK CHUAN MIZO TE PAWH MIN PE VE TUR A NI:CM

Chief Minister Lal Thanhawla’n Tripura Bru Camp-a mite’n Mizorama an lo kir theihna tura an thil phût te chu sorkar laipuiin a pe dawn a nih chuan Mizo mipuite pawh a pe ve tur a ni a ti a, a kaihhruai sorkar chuan tute hnenah mah Autonomous District Council (ADC) a pe dawn lo niin House a hrilh bawk.

IMG_0497.JPG

Vawiin (March 28) Assembly Session zawhna leh channa-a MNF member Lalruatkima zawhna Home Minister R Lalzirliana a chhanpuina ah Chief Minister chuan Bru te thil phût chu sorkar laipuiin a pe dawn a nih chuan Mizo mipuite pawh a pe ve tur a ni a, Mizo mipui zingah ram nei lo an tam a, hetianga duhsak bik tura an phût ang dawng lo Mizo zingah an tam a ti a, “ADC phei chu keini chuan tute mah kan pe lo ang,” a ti bawk.

Lal Thanhawla chuan Bru mipuite kha anmahni duh thlala Mizoram chhuahsan an ni a ti a, chuti chungin khua leh tui dik tak te chu kum 1997 atang khan lo kir turin sorkar chuan vawi tam a ngen thu sawiin, “Heti chung hian Central ah a chhe thei ang berin min hêk a, LK Advani-a’n na takin min rawn bei a, Hindu an nih avanga tiduhdah ah Mizo mipuite min rawn puh a, lâk kir hnathawk turin min ti a.

Union Home Minister hnenah Mizoram an chhuahsan dan kimchang, misual 8/9 thil tih a nih dan te, heng mi sual te hi kan man vek dan te, a chhuak duh lo te chu chhuak tura an vau dan te, Hindu temple 28 tih chhiat tur a awm loh thu leh Bru te chu Hindu an nih loh thu te ka hrilh a ni,” a ti a.

“RSS te pawhin min rawn vau a, mahse, na takin ka chhang let ve a, national media te pawh thil thlen dan kimchang leh a nihna dik tak en turin kan sawm a, an rawn en bakah tha takin an chhuah a. Bru te hian Mizo te chungah hleilen an tum a, chuti chung chuan that kan chhuah a, lo kir duh te lo kir turin kan ti reng a, an camp ah te kan kal chilh a ni,” a ti bawk.

 

Road Map pali hnuaiah cheng vbc 40 dawn

Home Minister R Lalzirliana chuan Mizoram mi dik tak Bru te la kir tur hian Road Map pali (I, II, III & IV) siam a ni tawh a ti a, sorkar laipui atangin Road Map I atan cheng nuai 243.80, Road Map II atan cheng nuai 243, Road Map III atan cheng vbc 17.84 leh Road Map IV atan cheng vbc 17.2 an hmu tawh niin a sawi a, Road Map I, II & III-a an sum hmuh te chu hman a ni tawh a, Road MAP IV atangin cheng vbc 4.7 leh cheng vbc 5 te chu inpuahchah nan hman then a ni tawh niin a sawi.

 

Supreme Court ah petition

R Lalzirliana chuan Bru te hian Supreme Court ah Writ Petition thehlutin thil phût 13 an nei a ni a ti a, an thil phût te chu danin a phal a, sorkar in tul a tih chuan tih hlawhtlin sak theih beisei a ni a ti a. Kum 2016 November thla-a Bru identification process report atang chuan district hrang hrang ami Bru chhungkaw awm zat chu Mamit District ah 4,199, Lunglei District ah 348 leh Kolasib District ah 824 an ni a ti a, Mizoram Electoral Roll-a Bru hming chuang zat chu Mamit District ah 8,384, Lunglei District ah 348 leh Kolasib District ah 1,633 niin a sawi.

 

“Phut an neih belh zel”

Home Minister chuan Bru te hian Mizorama lo kir turin thil phût an neih belh zel avangin tun thlengin lâk kir theih an la ni lo a ni a ti a, January 30, 2015-a Ministry of Home Affairs hova Mizoram leh Tripura sorkar-te’n thutlukna an lo siam tawh anga kalpui a nih lohna chhan chu kum 2015-a lâk lêt loh hnu khan Supreme Court-in lâk lêt hna hi chhunzawm leh tur a tih vang niin a sawi bawk.

 

Phut zingah ram pek, khaw khat a awm state in remti lo

Lalruatkima zawh belhna chhangin Home Minister R Lalzirliana chuan Bru-te’n Supreme Court-a Mizorama an kir lehna tura thil 13 an phût ah Mizoram sorkar in ngaihdan a nei a ni a ti a, chhung tin hnena thlai chinna tur ram acre 5 theuh pek chu ‘a rem lo’ a ti a, khaw khata awm khawm an duh pawh ‘ramin a daih dawn lo a, heti zat dahkhawm an nih chuan thingtlang lo neih pawhin a dawl lo ang’ a ti a.

An khaw awmna ah electric, tui, school, damdawi, ek in, kawng tha siam leh pêk an phût chu ‘an awmna tura ruat khua ah hian an sawi ngai lovin a awm dawn a, a awm lo a nih chuan sorkar in a ngaihtuah ang’ a ti a, rama thing leh thlai te zalen taka lâk leh hman an phût chu ‘danin a phal ang zela ngaihtuah sak an ni ang a, mahse, hetiang hi danin a phal lo’ a ni a ti a.

 

“Zangnadawmna chu sorkar laipui thu”

Zangnadawmna sum Rs. 80,000 atanga 10,00,000-a tih pun chu ‘zangnadawmna hi Mizoram sorkar thu a ni lo, sorkar laipui mawhphurhna a ni’ a ti a, Bru te lâk lêtna tur motor anmahni lungawina ang thlapa felfai taka ruahmanna siam chu ‘an awmna tur DC in ruahmanna fel tak an siam, a tha tawk hle a ni’ a ti a.

Bru chhungkaw zawng zawng hnenah ration card thar pêk an phût chu ‘endik an nih hnu-a Mizoram mi leh sa te chu pêk mai tur an ni’ a ti a, E-roll revision neih a, Bru ral tlan zawng zawng thun luh leh e-roll revision kum tina neih an phût chu ‘ E-roll ennawn chu Election Commission of India thuneihna a ni’ a ti a.

Bru zirlai naupang te hnenah an zirna chhunzawm theihna tura transfer certificate pêk vek an phût pawh ‘ Mizoram sorkar mawhphurhna a ni lo’ a ti a, India Constitution Article 244(2) leh VIth Schedule zulzuia Bru ho tana Autonomous District Council pêk an phût pawh ‘ Mizoram sorkar in rem a ti lo’ a ti a, Mizorama Bru lâk lêt tumna chu a hlawhtling lo a nih chuan Tripura ah an tanpuina dawn tur zawng zawng bakah chenna in, tui, electric, zirna, damdawi leh thil dang te nen Tripura-a an khawsak phal an phût pawh ‘Sorkar laipui leh Tripura sorkar ngaihtuah tur a ni’ a ti bawk.

 

Tih luihna in kan hruaikir loving: HM

Rehabilitation scheme chu Bru ho lungawina thlapa tih fel a nih hma chu tih luihna-a Mizorama lak kir rih loh an phût chu ‘ la kir turin Mizoram sorkar in tih luihna hman a tum lo’ a ni a ti a, Dampa Santuary-a a tira an chhuahsanna hmuna awm lêt leh an phût chu ‘lo khawsa ho te kha phal lohna hmuna awm an ni a, sanctuary tih hmasawn nan sawn chhuah zawk an ni’ a ti a.

 

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s