CSS HINDI TEACHER TE CHET DAN HI TU NGE MAHNI TU LEH FATE ZIRTIRTU ATAN DUH ANG?: CM

Chief Minister Lal Thanhawla’n CSS Hindi Teacher nuar mek te chet dan chu vanduaithlak a tih thu leh an chet dan chu tu nge mahni tu leh fate zirtirtu atan duh ang tiin tukin (March 29) khan House member te a zawt a, eptu MLA Lalrinawma chuan hei hi chhangletin “Zirtirtute kha duh taka an lak niin ka hria, tunah khan kan tu leh fate zirtir turin kan duh dawn em ni tih lai kha a va mak ve,” a ti thung.

March 28 zan khan CSS Hindi Teacher dahngheh phut a Aizawl High School Field, McDonald Hill-a chawngheia nuar te chuan CM Bungalow compound an luhchilh a, police nena an innawr naah an zinga 15 chuan hliam an tuar nghe nghe. CM in an “chet”dan a sawi leh MLA te inhnial nachhan pakhat ah a ngaih theih awm e.

Vawiina Assembly Session zawhna leh channa huna MNF member Dr K Beichhua leh Lalruatkima te zawhna Education Minister H Rohluna a chhanpui-na ah CM chuan CSS Hindi zirtirtute chet dan chu vanduaithlak a tih thu a sawi a. Department hrang hrangah CSS hnuaia thawk tur an lo chhawr fo tawh a, kum tin contract thar an ziak a, tuna mite pawh hi kum tin bond sign thar an ni a, sorkar laipuiin an contract a tih tawp ruala maipar thlawn tur an ni tih an inhre chiang a, nikum hmasa lamah Forest Department hnuaia mi za chuang an contract tawp avanga chawl an awm a, chung mite chuan an bond sign zah taka awmin tuna mite chet ang hian an che ve lo a ni a ti a, tuna mite hi chuan an tam an chhuan vang nge, hetiang hian an awm ta a, “Tuna an khawsak dan ang hi tu nge mahni tu leh fate zirtirtu atan duh ang che u,” a ti.

Lal Thanhawla chuan sorkar laipui chhawr an ni na chungin Mizoram sorkar hotute’n an duhsak a, thla li atan sum harsa chungin Mizoram sorkar sum hmangin an hlawh pawh pek a ni a, tu pawh sorkar se zirtirtu ni tlakin an khawsa em tih pawh hi en tur ni-a a hriat thu a sawi.

CSS Hindi zirtitute inhmuhkhawm tuma khatih laia Finance Minister thusawi chungchang sawiin Chief Minister chuan, “Kan hotute’n min vau an ching ve lo a, an harsatna an rawn thlen kan hotupa in a lo tawng thlamuan chu a tih tur dik tak a ni a, khami tum khan lo vau phei se chuan tun aiin an bei nasa ang,” a ti a, CSS Hindi zirtirtute hi Evaluation Team-te’n a rawn endik thut a, an hmuh danah an beidawng hle a ni a ti a, chuti chungin an duhsak avangin rawn endik leh an tum ni-a sawiin, “School thlan bik lo nei ula, chutah chuan Hindi thiam tak zirtirtu lo dah rawh u tiin Education Minister an lo hrilh hial a ni,” a ti.

Lal Thanhawla chuan an awmkhawmna leh an awmkhawm dan chu Zarkawt Local Council in tha an ti lo a, K|P hla zir bangte lo chhaih an chin bakah zu an in thin avangin naupang tan pawh a him lo a, ni 4, 5 ,6 lai chaw nghei tawh si hetiang an la awm theih avangin aikal la an awm ni-a rinhlelh theih a ni a ti a, CM bangla an panna ah MNYF President K Vanlalvena leh an Secretary Francis Lalrammuana leh mi dangte pawh an tel niin a sawi.

MNF member pahnihte zawhna leh zawh belhna te chu Education Minister H Rohluna’n a chhang a, zawh belhna bakah hian member te an inhnial deuh a.

Zawhna neitu Lalruatkima chuan September 30, 2013 khan CSS Hindi Teachers’ Association Conference, Chanmari YMA Hall-a neihah khatih laia Education Minister Lalsawta chuan, “Kawng laka inbun ruih chi a ni lo, kha kha chu ka hre ve khawp mai ti-a a sawi kha he dinhmun atanga enkawl zel tura an intiam laia vote zawn nana hmang ziazangin, hring ve lo tu che u chu an sorkar chuan an ban phiar mai ang che u tih a hlauhawm ve tho a ni tiin sorkar press release, September 30, 2013 ah khan tarlan niin a hringtu che u kan nih angin kan ngaihtuah sak zel dawn che u a ni tiin an contract pawhsei chungchangah a sawi bawk a,” a ti a, sorkar press release ah chiang taka Minister thusawi tarlan a ni a, inthlan a hnaih tawh avangin heng zirtirtute hi campaign nana hman an ni em tiin a zawt a.

Dr K Beichhua chuan, “A hringtu sorkar ngeiin an intiam chungin mi 15 hliamin kawng lakah an bun a, sorkar hian NEDP te a nei bawk a, chhawr zui dan an awm lo maw tih chu ka zawhna a ni,” tiin a zawh belh bawk a.

Finance Minister Lalsawta rawn dingin, “Ka tawngkam niawm tak sawi a awm thin a, hre chiang lo chuan sawi ve lo se, ka tawngkam hi video ah a awma, ka transcribe vek a, ka word hman zawng zawng hi ka hria, hre chiang lo chuan sawi lo se ka duh khawp mai,”  a ti a.

MNF member Lalrinawma’n “Zirtirtute kha duh taka an lak niin ka hria, tunah khan kan tu leh fate zirtir turin kan duh dawn em ni tih lai kha a va mak ve,” a ti a.

Chu chu chhangin Home Minister R Lalzirliana chuan, “Zirtirtute chet dan awmin an che lo,” a ti a, Lalruatkima chuan, “DPC kal tlang veka lak an ni a, khatih laia Education Minister khan inthlan a hnaih tawh avangin vote zawn nan in hmang a, a intiam ang khan tih hlawhtlin mai ni se,” a ti a.

Parliamentary Affairs Minister R Romawia’n Chief Minister hnehchhuh an tum a, an chet dan a dik lo a ni a ti bawk a, member te an inhnial avangin Speaker Hiphei chuan member te chu zawldawh tura ngenin zawhna dangah an kalpui a ni.

 

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s