MIZO CARBON PRODUCTS CHUNGCHANGAH CHHINCHHIAH DAN INANG LO TAM, LALSAWTA’N CHHANG VEK THEILO

Taxation Minister Lalsawta’n M/s Mizo Carbon Products in lungalhthei truck trip 2,368 (29,046.2 MT) Mizoramah a rawn phur lut tawh a, a neitu chu Margaret Varte niin vawiin (March 30) khan House a hrilh.

Vawiin Assembly Session zawhna leh channa huna MNF member Lalruatkima zawhna chhangin Lalsawta chuan Mizo Carbon Products hi Mizoram Value Added Tax (VAT), 2005 hnuaia register a ni a, Indian Partnership Act, 1932 hnuaiah register a ni bawk a, a registration number chu RF/MZ-94 of 2011-2012 : dt. 16.8.2011 a ni a ti a, mahse, hemi hnu hian ni 13.7.2012 ah Proprietorship ah thlak a ni a, a chhan chu partner Ravi Gulgulia a inhnuhdawh vang a ni a ti.

Taxation Minister sawi dan chuan M/s Mizo Carbon Products hian January 4, 2011 atanga July 10, 2014  inkarah bungrua an la lut a, a hlut zawng ni-a record chu cheng vbc. 11.33 (Rs. 11,33,93,394) a ni a, he company in VAT a pek zat chu cheng nuai 40 (Rs. 40,00,403) niin a sawi bawk.

Zawhna neitu Lalruatkima chuan Mizo Carbon Products hi DIC Aizawl ah partnership chu Ravi Gulgulia hminga dah a ni a, Minister chhanna ah Ravi Gulgulia inhnukdawk tih a ni si a, “Tu nge a neitu zawk?” a ti a.

Industries Department chhan dan chuan he company neitu hi Dr Margaret M Varte tih a ni a, Minister chhanna ah Margaret Varte tih a ni bawk a, mi thuhmun an nih leh nih loh thu a zawt bawk a.

Supreme Court ruling ah tribal hmeichhia in non-tribal pasala a neih chuan tribal a nihna a hloh niin Lalruatkima chuan a sawi a, chute anih chuan non-tribal in partnership a neih theih leh theihloh a zawt bawk a.

Tin, Lalruatkima chuan Minister chhanna ah Truck trip 2,368 a rawn lut tawh tih anih laiin Dr K Beichhua-a unstarred question chhanna ah way bill 2,207 pek chhuah tawh a inti thung a, chuti a nih chuan way bill pe lo truck 161 a awm tihna a ni a, engvangin nge way bill pe lo in check gate an rawn pal tlang theih tiin a zawt bawk a.

Unstarred question chhanna ah hian Meghalaya atanga Aizawl thleng in truck pakhatin ni khatah lungalhthei vawi 6 te a rawn dah thei angin a lang a, hei hi eng nge a chhan, thil dik lo ani nge record ah thil dik lo a awm zawk tih azawt in, registration buaipui lai hian a neitu te chhungkhat laina hnai tak a enkawltu department ah thlak thut a ni hi eng nge a chhan a ti bawk a.

Taxation Minister Lalsawta chuan Industries Department chu department dang anih vangin Industries chhinchhiahna nena a danglamna chungchang chu a chhan theih lo thu in a chhang a, Non-Tribal in partnership a neih theih leh theihloh chungchang pawh chu a chhan theih loh thu a sawi bawk.

Mizo Carbon Products hi ACB in a chhui mek a, an chhuina atangin thil a chiang dawn a, chuvang chuan zawhna thenkhat te kha chhui mek atanga hriat tur a ni a, document department kutah a awm lo tiin a chhan theih loh thu a sawi.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s