KAWNG LAKA BUN RUIH AN NI EM?

March 28 zan tlai tawh tak ah khan Mizoram a thleng zen zen lo thil a thleng a. Sorkar laka lungawi lo nuar chuan Chief Minister chenna in tualzawl kaiin an kawngka an ban pha a. Hetianga nawrh huaihawt, CSS Hindi Teacher hlawh la theilo leh sorkara dahngheh phut te leh police inkarah pawh buaina chhuakin hliam engemawzat an awm a, a tuk thlengin state rorelna sang ber Assembly House ah inhnialna a chhuah phah ta ani

 

Kum 2011 February thla khan High School leh Middle School zirtir turin Hindi zirtirtu mi 1,305 te chuan Mizoram hmun hrang hranga zirna inah an hna an tan a, heng mite hi Mizoram sorkar chuan sorkar laipui hlawh pek turin DPC kal tlangin a la a ni.

 

Tum hnih hlawh pung

Heng zirtirtute hi a tirah   ` 9,750 (High School) leh ` 7,500 (Middle School) hlawh turin February 18, 2011 khan an thawk a, an hlawh te hi sorkar laipuiin za-a za a tum sak a. An hlawh hi Mizoram sorkar hmalakna in October 1, 2011 khan ` 20,000 (High Shool) leh ` 15,000 (Middle School) ah tih pun a ni a, state sorkar hmalakna tho in March 1, 2015 atangin High School leh Middle School zirtirtute hian ` 29,000 an hlawh ve ve ta a ni.

 

Education Minister thusawi?

September 30, 2013 khan CSS Hindi Teachers’Association Conference, Chanmari YMA Hall-a neihah khatih laia Education Minister Lalsawta chuan CSS Hindi Teacher te chu an fa hrin an nih thu te, a la tu te ni lo an sorkar chuan an thlauhthlak a hlauhawm thu te, kawng laka bun ruih an hlauhawm thu te bakah Congress sorkar chuan a ngaihsak thu leh an contract pawhsei thleng ngaihtuah pui a tiam ni-a sawi a ni a, Education Minister thusawi ni a sawi leh social media lama voice record darh ta chuan sawi zui a hlawh hle a ni.

 

Thawh hlawh lak leh dah ngheh phutin nuar, YMA hmalakna in sorkar nen inrem

CSS Hindi Teacher te hian thla 10 lai hlawh an lak loh avang leh an thawh theih hun chhung sorkar laipuiin a titawp mai dawn ni-a a lan avangin kumin kum tir atang khan thawm an rawn nei tan a, thla 10 hlawh an lak theih loh chungchangah hian Mizoram sorkar chuan sum harsa chungchungin thla li hlawh a pe a, mahse, an mangan em avangin February 23 atang khan chhun zan zawmin CMO gate bulah an thu a,  February 27 atang khan sorkar chu chaw ngheiin an nawr ta a.

February 28 khan Central YMA hmalakna in Mizoram sorkar leh CSS Hindi Teacher te chuan inremna an ziak ta a.

 

An inremna

Central sorkar in zirtirtute hlawh la pe lo mahse, state sorkar in zirtirtute thla li hlawh leh April 2016 hlawh an lak bak ` 10,000 advance a pe ang; extention beisei mek hi a hlawhtling a nih chuan tuna thawk mek te an thawh chhunzawm theih nan sorkar in hma a la ang; zirtirtute hi an thawk chhunzawm a nih chuan an training ve theih nan sorkar in hma a lâkpui ang; extention hi a hlawhtling lo a nih chuan state sorkar in a theih angin hma a la ang; central sorkar hmalak dan enfiah a bawhzui turin sorkar hotute kaiihruaiin Central YMA, MZP, MSU leh CSS Hindi zirtirtute aiawh mi pathum a hma thei ang berin Delhi ah an kal ang.

 

Delhi ah sorkar laipui dawr

An inremna ang thlapin sorkar aiawh leh CSS Hindi zirtirtu aiawh te chu Parliamentary Secretary Joseph Lalhimpuia hovin Central YMA, MZP leh MSU aiawh te nen Delhi ah kalin sorkar laipui hotute an dawr a, mahse, sorkar laipui hotute chuan an hna chhnzawm na’n sum a tum thei tawh lo tih an lo sawi.

 

Tiamchin awm lovin chaw nghei, buaina lian chhuak

Mizoram CSS Hindi Teachers’ Association (MCHTA) chuan sorkar nen an inremna ang leh an dikna chanvo ni-a an sawi phutin March 22, 2017 atang khan High School field ah tiam chin awm lovin chaw an nghei ta a, an chaw ngheina hmunah hian chau zual te an awm tak avangin damdawi lam thiamte pawhin an tlawh a.

March 28 zan khan an zinga pakhat chu a chauh em avangin an chaw ngheina hmunah chuan a tlu ta a, hetah hian Aizawl Civil Hospital be nghalin tanpuina an dil niin an sawi a, mahse, damdawi thiam te leh ambulance an beisei chu an hmuh tak loh avangin Chief Minister hmuh tumin an inbuatsaih a.

MCHTA hruaitute chuan Chief Minister hi kutthlak tum emaw, tih thaih tum emaw-a hmuh an tum loh thu an sawi a, CMO gate an paltlang hnu ah Bungalow gate an lut lehin Bungalow tual zawla an punkhawm laiin police te nen an innawr niin an sawi a, “Chief Minister chu tih nat tum ni ila kan thei em em a, police te an tlem bakah kan ban phak maiin Bungalow kawngkhar pui a awm a, mahse, buaina siam tura kal kan nih loh avangin engmah kan ti lo,” tiin an hruaitu pakhat chuan The Frontier Despatch a hrilh a ni.

TFD thudawn dan chuan hetianga zirtirtu nuar te a nawlpuia CM bangla pan a an kal lai hian an zinga mi thenkhat chu a chhaka emergency gate lamah tlan chhovin bangah an lawn liam a, chuta tang chuan bangle compound luhna gate chu a chhunglam atangin an hawng ta mai a, chumi hnu chuan a nawlpui, main gate a lut tawh chu bangle tualzawl an thleng chho ta ani.

Hetia CM Bungalow kawt an thlen taka vang leh buaina a pun lun zel loh nan Aizawl Bawrhsap Kannan Gopinathan chuan Cr. PC 144 tlawh chhanin McDonald Hill ah mi panga aia tam punkhawm chu March 29 zing dar 7 atangin hman turin thu a chhuah a.

MCHTA hruaitute chu hemi zing hian an kal zel dan tur relin an nawrhna bula Teachers’ Inn ah an thu khawm a, zing dar 8 vela an thu khawm zo chu police te chuan Cr. PC 144 na tlawh chhanin an hruaitu mi 23 (mipa 15 leh hmeichhia 8) te chu an man a, Aizawl Police Station ah an hruai nghal a.

MCHTA member te chuan Vanapa Hall kawta punkhawm leh an tum chu Aizawl District Magistrate in punkhawm a khap leh tak avangin an pungkhawm ta lo a,  an hruaitu man tak te chhuah phutin March 29 chhun khan Aizawl Police Station thlangah an pungkhawm ta zawk a, hetah hian police hotute leh Dawrpui khawtlang hruaitute nen an inbia a.

MCHTA member te chuan buaina siam an tum loh thu te, an hruaitu man tak te chhuah turin an ngen a, Dawrpui khawtlang hruaitute pawhin an veng chhunga buaina siam an phal loh thu leh buaina an siam lui a nih chuan an inkoh khawm ve tur thu an hrilh a.

MCHTA hruaitute chuan an manganna hi Mizoram Kohhran Hruaitute Comittee (MKHC) ah an thlen leh a, MKHC hruaitute chuan March 30-a ngaihtuah an tum thu an lo hrilh a. Hemi hnu hian an chaw nghei chu an ti tawp a.

He thu buatsaih lai hian MKHC thu leh hla hriat hman a ni tawh lo a, mahse zirtirtute an man tawh ho chu March 29 zanlam khan police-in an chhuah a, an hruaitute engemawzat chuan tharum thawhna a an inhnamhnawih vangin  ngaihdam an dil a, hetianga hma la tawh lo turin an intiam ani.

 

Assembly House ah

Duan lawk ang thlapin thil a kal tih mai theih turin March 29-a Assembly Session tan a nih veleha zawhna leh channa hun hman a nih chuan MNF member Dr K Beichhua starred question 162-na leh Lalruatkima starred question 165-na, CSS Hindi zirtirtute chungchang a zawhna chu a chhuak nghal a, Education Minister H Rohluna chuan CSS Hindi Teacher te chu kum 2011 ah 1,305 lak an nih thu te, High School ah 389 lak nniin Middle School ah post 916 a awm a, post 97 chu District Council – MADC 36, LADC 36, CADC 25 – an pek an nih thu a sawi a.

State sorkar lak zat chu post 819 niin District Council pathum in an chan theuh chu appointment an siam thu te a sawi a.

An hun chhung hi sorkar in a hriat lawk avangin sorkar laipuiah kum 10 dang pawhsei sak tura an ngen thu leh theihtawp an chhuah thu te sawiin zawh belhna dang te pawh a chhan a ni.

 

“Tu nge mahni tu leh fate zirtirtu atan duh ang”

Education Minister chhanna hi House Leader Lal Thanhawla chuan chhanpuiin CSS Hindi zirtirtute chet dan chu vanduaithlak a tih thu a sawi a, Department hrang hrangah CSS hnuaia thawk tur an lo chhawr fo tawh a, kum tin contract thar an ziak a, tuna mite pawh hi kum tin bond sign thar an ni a, sorkar laipuiin an contract a tih tawp ruala maipar thlawn tur an ni tih an inhre chiang a, nikum hmasa lamah Forest Department hnuaia mi za chuang an contract tawp avanga chawl an awm a, chung mite chuan an bond sign zah taka awmin tuna mite chet ang hian an che ve lo a ni a ti a, tuna mite hi chuan an tam an chhuan vang nge, hetiang hian an awm ta a, “Tuna an khawsak dan ang hi tu nge mahni tu leh fate zirtirtu atan duh ang che u,” a ti.

Lal Thanhawla chuan sorkar laipui chhawr an ni na chungin Mizoram sorkar hotute’n an duhsak a, thla li atan sum harsa chungin Mizoram sorkar sum hmangin an hlawh pawh pek a ni a, tu pawh sorkar se zirtirtu ni tlakin an khawsa em tih pawh hi en tur ni-a a hriat thu a sawi.

CSS Hindi zirtitute inhmuhkhawm tuma khatih laia Finance Minister thusawi chungchang sawiin Chief Minister chuan, “Kan hotute’n mi vau an ching ve lo a, an harsatna an rawn thlen kan hotupa in a lo tawng thlamuan chu a tih tur dik tak a ni a, khami tum khan lo vau phei se chuan tun aiin an bei nasa ang,” a ti a, CSS Hindi zirtirtute hi Evaluation Team-te’n a rawn endik thut a, an hmuh danah an beidawng hle a ni a ti a, chuti chungin an duhsak avangin rawn endik leh an tum ni-a sawiin, “School thlan bik lo nei ula, chutah chuan Hindi thiam tak zirtirtu lo dah rawh u tiin Education Minister an lo hrilh hial a ni,” a ti.

Lal Thanhawla chuan an awmkhawmna leh an awmkhawm dan chu Zarkawt Local Council in tha an ti lo a, KTP hla zir bangte lo chhaih an chin bakah zu an in thin avangin naupang tan pawh a him lo a, ni 4, 5 ,6 lai chaw nghei tawh si hetiang an la awm theih avangin aikal la an awm ni-a rinhlelh theih a ni a ti a, CM bangla an panna ah MNYF President K Vanlalvena leh an Secretary Francis Lalrammuana leh mi dangte pawh an tel niin a sawi.

MNF member pahnihte zawhna leh zawh belhna te chu Education Minister H Rohluna’n a chhang a, zawh belhna bakah hian member te an inhnial deuh a.

 

Lalsawta thusawi sorkar thuchhuah in a nemnghet: eptu MLA

Zawhna neitu Lalruatkima chuan September 30, 2013 khan CSS Hindi Teachers’ Association Conference, Chanmari YMA Hall-a neihah khatih laia Education Minister Lalsawta chuan, “Kawng laka inbun ruih chi a ni lo, kha kha chu ka hre ve khawp mai ti-a a sawi kha he dinhmun atanga enkawl zel tura an intiam laia vote zawn nana hmang ziazangin, hring ve lo tu che u chu an sorkar chuan an ban phiar mai ang che u tih a hlauhawm ve tho a ni tiin sorkar press realese, September 30, 2013 ah khan tarlan niin a hringtu che u kan nih angin kan ngaihtuah sak zel dawn che u a ni tiin an contract pawhsei chungchangah a sawi bawk a,” a ti a, sorkar press release ah chiang taka Minister thusawi  tarlan a ni a, inthlan a hnaih tawh avangin heng zirtirtute hi campaign nana hman an ni em tiin a zawt a.

Dr K Beichhua chuan, “A hringtu sorkar ngeiin an intiam chungin mi 15 hliamin kawng lakah an bun a, sorkar hian NEDP te a nei bawk a, chhawr zui dan an awm lo maw tih chu ka zawhna a ni,” tiin a zawh belh bawk a.

Finance Minister Lalsawta rawn dingin, “Ka tawngkam niawm tak sawi a awm thin a, hre chiang lo chuan sawi ve lo se, ka tawngkam hi video ah a awma, ka transcribe vek a, ka word hman zawng zawng hi ka hria, hre chiang lo chuan sawi lo se ka duh khawp mai,”  a ti a.

MNF member Lalrinawma’n “Zirtirtute kha duh taka an lak niin ka hria, tunah khan kan tu leh fate zirtir turin kan duh dawn em ni tih lai kha a va mak ve,” a ti a.

 

Zirtirtute chet dan awmin an che lo: Home Minister

Chu chu chhangin Home Minister R Lalzirliana chuan, “Zirtirtute chet dan awmin an che lo,” a ti a, Lalruatkima chuan, “DPC kal tlang veka lak an ni a, khatih laia Education Minister khan inthlan a hnaih tawh avangin vote zawn nan in hmang a, a intiam ang khan tih hlawhtlin mai ni se,” a ti a.

Parliamentary Affairs Minister R Romawia’n CM hnehchhuh an tum a, an chet dan a dik lo a ni a ti bawk a, member te an inhnial avangin Speaker Hiphei chuan member te chu zawldawh tura ngenin zawhna dangah a kalpui a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s