FOOD TESTING LABORATORY DIN TUMNA AH THIL FELHLEL AWM NASA, MLA RUAL AWMNA COMMITTEE-IN COMMERCE LEH HEALTH DEPT HOTUTE KHAK

 

A tir chuan Mizoram mipuite ei leh in a hrisel leh hrisel loh endik na tur, Food Testing Laboratory chu kawlphetha leh tui awm sa tawh na Zokhawthar a bun tura ruahman ani a. Mahse, ruahmanna thar a lo piang a, kawlphetha leh tui supply siamchawp vek ngaihna hmun Thenzawlah bun tura ruahman ani leh zawk a. Chutih rual in, a enkawltu tur ber Health department chuan Thenzawla a awm chuan hman tangkai theih ani dawn lo tiin hmun danga sawn leh zawk a ngen ta daih thung a, tunah chuan Aizawl Zemabawka sawn rawt ani leh ta thung.

Tun dinhmunah Mizoram hian ama pualin mipui ei leh in chu sawiloh, mipui damna tur damdawi chi hrang hrang te a tha tawk em tih leh a him tawk em tih endikna tur laboratory a la nei lova, Aizawl Zemabawka sorkar laipui hnuaia zirna in, RIPANS ami laboratory chu sorkarin man chawiin a hmang hawh thin chauh ani. Amaherawhchu, state puala laboratory din tumna kawngah sorkar chu a hnufum hle mai bakah din a tum danah thil felhlel a tam hle niin Mizoram Assembly hnuaia committee pakhat, Committee on Government Assurances chuan a hmuchhuak.

Sorkar lai Congress party MLA R Vanlalvena chairman na committee chuan Food Testing Laboratory din tum dan hi kum hnih chuang zet a lo en thlithlai tawh a, a chhuichianna chungchang ziahna report, tun assembly kal meka House hmaa a pharh ah chuan a fawngchelhtu department pahnih – T&C (tuna Industries Dept nena fin a Industries & Commerce Dept ni ta) leh Health Dept hnathawk te chu hna thiamlo leh thawk tha duhlo angin a sawi hial ani.

Hetianga committee in thil kalhmang a en thlithlai tak nachhan tobul chu he committee chairman, R Vanlalvena’n kum 2014 July thla a Assembly House-ah “Damdawi tha leh thalo enna (Laboratory) Mizoram Sorkar hian a nei em? Nei lo ta se, nei ve tura hmalakna a awm em?” ti a a zawh vang ani a.

R Vanlalvena zawhna chu Health Minister-in, “Damdawi tha leh thalo enna (Laboratory) Mizoram Sorkarin tun dinhmunah chuan a nei lo. Food and Drug Testing Laboratory nei tur hian hmalakna a awm tawh a. DPR pawh siam a ni tawh a ni. Chu chu DoNER ah pawh theh luh tum a ni a,” tiin a chhang a.

Hetianga Health Minister-in House-a a tiam hnu hian sorkar hotute thutiam tih hlawhtlin leh tlin loh en thlithlai tu Committee chuan laboratory din tum dan hi a bawhzui nghal a.

A hmasa berin T&C Dept chu a hmalak dan a zawt a, T&C chuan kum 2015 July thla tawp khan chhangin laboratory awmna tur hi Thenzawlah sak zawh tawh anih thu leh hnathawk te awmna tur quarter te pawh sak anih thu a hrilh a, mahse, electric wiring leh tui connection te peihfel a la ni lo a ti a.

T&C chuan hemi hmunhma hi Health Dept hnenah hlan turin hma a la mek bawk niin a sawi a, chutih rual chuan khawl mamawh te chu chah thlen tawh anni in Department Store, Zemabawk ah dah an nih thu a sawi bawk.

A kum leh, 2016 May thla tir chuan committee chuan Zemabawk a Department Store chu a va tlawh ta a, thil felhlel engemawzat a va hmu ta.

A hmasa berah chuan sum sanction tawh chu T&C sorkar lehkha thenkhatah hman tawh anga a in ziah laiin a dangah la hman loh angin a inziak a. Hei hi committee chuan ngaihven nghalin sawifiah turin a ti a, T&C chuan hetia tih anih chhan chu laboratory khawl supplier pakhatin pawisa hlutna a tlakhniam thut avangin a supply leh thei mai lova, chuti anih si chuan sorkar laipuiin a zilhhau ngei dawn si a, sum sanction te chu hman tawh anga ziah ani ta mai niin a sawi a. Chumi bakah chuan, sum hman vek tawh anga ziah anih chuan sorkar laipuiin sum a pek belh a beisei awm a, chu pawisa pek belh chu a hmaa an lo dil tell oh, electric wiring leh water supply tihchangtlun nana hman tura beisei ani T&C chuan a ti bawk.

Committee chuan thil hriat belh a nei zel bawk a: Food Testing Laboratory chu electric leh water supply tihfel tawhna hmun Zokhawthara din tura ruahman hmasak ani a, mahse chutiang a awm lohna hmun Thenzawla sawn tura hmalak ani leh hlauh thung a. Hetia sawn nan hian cheng vbc 3 chuang sanction ani nghe nghe a, T&C pawhin he sum hi Health Dept hnenah a hlan zet a, mahse tu tih hriat lohin a thurawn angin sum chu T&C hian a lo la kir leh ta daih ani.

Tin, hetih lai hian T&C chuan laboratory a hman tur bungrua hrang hrang te hi chah lut tawh mahsela a vaiin a la dawng kim lo tih committee chuan a hrechhuak leh zel a. A kim lo chung chuan Health Dept building pakhatah a kawr (packaging) phelh lohin heng khawl te hi dah lailawk anni hlawm a, mahse, Health Dept hotute erawh chuan T&C hian khawl a chah luh tawh thu an lo la hre miah lo thung. Chumi piah lamah chuan, khawl chu a la thlen kim loh vangion T&C Director pawh chuan sum chu supplier hnenah a lo la pe kim lova, nuai 200 emaw lai chu a lo la kawl nghe nghe.

Hetiang thil felhlel a lo awm nuk tih a hriat hnu chuan committte hian Thenzawla laboratory tur sak mek ah electric leh water supply tihfel a nih leh nih loh official te a zawt leh a, T&C chuan Health Dept nen meeting neih zawh lamah hnathawh tan anih tur thu leh hemi atan hian cheng nuai 90 ruahman anih tawh thu sawiin, chumi ah chuan state sorkarin cheng nuai 67 a sanction tawh a ti bawk a.

Chutianga chhanna a hmuh hnu chuan committee hi Thenzawla laboratory hmun tur enchiang turin kum 2016 September thla khan a zin ta a.

Official ten tawngka in electric wiring leh water supply te chu zawhfel tawh a ni angin sawi mahse, committee chuan electric wiring thenkhat chauh zawhfel anih bakah water supply atana hmanraww bun ngai te chu a bo then a va hmuchhuak a.

Official te chuan hemi thu ah hian sum chu sorkarin a pek tawh thu leh dept in a la kawl tha mek ani tia an insawifiah hnu chuan Health Dept official te erawh chuan laboratory khawl te chu AYUSH laboratory, Zemabawk ah an hman tangkai theih thu leh Thenzawla building sak lai chu hman na tur an hriat loh thu an sawi daih thung a.

Committee in Thenzawl a tlawh hnu thla hnih lek, T&C dept thiah anih takah chuan Industries and Commerce (I&C) leh Health dept hotute chuan thu an rel tlang a, meeting chuan Food Testing Laboratory chu hmun tha zawh ah sawn rawtin sawn anih chuan a a hman tangkai dan tur phuhruk anih theih ngei a beiseiawm a ti nghe nghe ani.

Heti anih vang hian Chief Minister pawh rawn ani a, Thenzawla awm tura ruahman laboratory khawl te chu Thenzawla dah lova AYUSH Building, Zemabawk a dah zawk anih theihnan thutlukna siam ani ta a. Chumi hnu chuan Health Dept hmunhma Zemabawk ami pawh chu tlawh niin siamthat ngai te siam dan tur en thlithlai ani a, hetianga siamthat nan hian cheng nuai 5.72 mamawh ani dawn tih hriat ani bawk a, chumi atan erawh chuan sum pawh dil fel ani tawh thung.

Hetianga thil felhlel tak tak a lo awm nasat avang hian Committee on Government Assurances chu a lungawi lo hle a, a lawm loh thu sawiin mipui thatpui tur leh an hriselna nghawng thei ruahmanna ngaihthah ani a ti hial a.Laboratory chu Zokhawthar atanga Thenzawl a sawn zet a, Thenzawl atanga Aizawla sawn a ngaih leh tak dan leh chhan te chu a hrethiam thei lo tih sawiin, hmanhmawh takin ruahmanna te chu tih  hlawhtlin ni se tih leh hluihlawn tak mai tur Thenzawla building sak te pawh sum sent e chu a thlawn mail oh nan hmanna tur dang zawn nise tiin thutlukna a siam ta ringawt mai ani.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s