KUM THUM A ZAWH BEISEI BAIRABI LEI KUM 11 HNU AH “ZAWH THEIH BEISEI A NI”

Kum 2010 a dawh zawh tura ruahman Bairabi-a lei chu kum sawm chuang dawh ani ta a, a dawh tute chu khawtlai chhan sawi turah an hnianghnar hle 

bairabi lei chim (1).jpg

Kum thum chhunga dawh zawh tura ruahman, kum 11 hnu a la pumhlum thei lo, metre 160 a sei, Bairabi-a Tlawng lui kan a Kolasib leh Mamit District inkalpawh theihna tura ruahman lei chu kumin March thla chhung hian dawh zawh ani dawn tiin Public Works Department (PWD) chuan State Assembly hnuaia committee pakhat, MLA R Vanlalvena chairnman-na Committee on Government Assurances a hrilh a. He lei dawh tur hian contractor ABCI-in heti khawp a rei a buaipui chhan hrang hrang chuan “Assamese Bihu” atanga “Election dawn boruak” te, “pawisa awm lo” atanga “revised estimate” te, “fur ang maiin ruah a sur” tih atanga “labour leh khawl lamah harsatna” a awm tih te, “a huna bill pek theih loh” tih atanga “hnawl a tam” thu te leh “ban lai a awn” tih atanga “a chim” tih te a huam.

A bilha tho lo: lei dawh tum tha tawk lo, revised estimate original let thawk

He lei hi kum 2007 a dawh tan ani a, North Eastern Council (NEC) atanga sum hmuh tur cheng vbc. 6.12 hmanga dawh tur ni zet mahse, state sorkar sawi dan takah, “han dawh tak tak dawn khan … a tha tawk lo” a ngaih anih leh si a. Estimate siam that leh a ni a, chumi hnu chuan a tir a senso tur a ngaih let thawk, cheng vbc 12 chuangin revised estimate siam a ni leh ta zawk a, NEC chuan revised estimate hi a vaiin a sanction lo nghe nghe a, “State Sawrkar-in a sanction fel” ta ringawt mai ani.

Assembly Committee in hnathawh a en thlithlai tan dan

Kum 2014, July 8 khan Assembly Session laiin Opposition MLA Lalruatkima’n he lei hi “Eng hun a thawh zawh tur nge?” tiin PWD changtu Chief Minister Lal Thanhawla a zawt a. CM chuan, “A tira zawh hun atana ruat chu 28th June, 2010 a ni a. Harsatna hrang hrang avangin hun pawhsei a ni a, March 2015 a zawh tur a ni,” tiin a chhang a.

Assembly-a ram hruaitute’n thutiam an neih hi Committee on Government Assurances hian a en thlithlai zui thin a, chutiang bawk chuan CM chhana hi tihhlawhtlin anih leh nih loh he committee hian a vil reng a, PWD pawh hmalak dan (implementation report) tlangpui thehlut zel a.

CM tiam angin thawh zawh anilo; a tiam hun pelh ah “rokhawlhna dang awm loh chuan…” la ti

Hmalak dan report a thehluh hmasak ber chu July 29, 2015, CM in lei dawh zawh hun tur Assembly-a a sawi atanga kum khat chuang leh dawh zawh hun tura a tiam thla li-a a pelh tawh hnu ani a. Chutah chuan ban lai a awn thu leh chu chu theihloh thil ani tia sawiin tum hunah dawh zawh ani thei ta lo niin PWD chuan a sawi a. PWD chuan he ban awn hi sak that anih hnu in hna chhunzawm ni mahsela, fur in a nangching tak thu leh hna chawlhsan a ngaih thu sawiin, “rokhawlhna dawng a awm lohva, contractor bill pek theih chuan thal leh chhung chuan zawh ngei tum a ni,” tiin committee chu a hrilh bawk.

|hal khat liam leh hnu ah pawh “Harsatna dangin min tlakbuak loh chuan…” ti leh

A kum leh fur in tan hun a lo thlen meuh chuan zawh a hnekin zawh theih loh chhan bawk PWD hian Committee hmaah a thlen leh a. Hmalak dan report, May 9, 2015-ah chuan PWD chuan “department chuan theihtawp chhuahin hma la zelin contractor pawh nasa taka nawr a ni a. Mahse, Bill pek mai tur pawisa a awm loh avangin leh ba a tam avangin contractor in hna a thawk chak thei lova,” a ti a, revised estimate ami cheng nuai 500 chuang NEC a sanction vat theilo nia sawiin chu chu chinfel ani tawh a ti a, “sum lamah harsatna a awm tawh lo” tiin April 2016 ah zawh beisei ni mahse, “March thla chanve atanga fur ang maia ruah a sur tak fo avang te, Assamese Bihu leh Election boruak a tih tur tulah labour ho an haw fo avang” leh “khawl thenkhat chhiat thin avangin” an tiam hunah lei chu dawh zawh theihloh ani an ti leh a, kum 2016 May emaw June emaw ah hna zawh hman an beisei niin an sawi leh bawk a.

CM-in hnathawh zawh hun tura a tiam atanga kum hnih naah “Harsatna dang a awm loh chuan…” la ti cheu

Amaherawhchu, kum 2016 September thla a lo inher meuh chuan PWD chuan lei dawh zawh theihloh chhan dang hrang hrang sawi tur an nei leh ta. Labour leh khawl lama harsatna leh “a huna bill pek theih loh” chu hna chak theih loh chhanah PWD chuan a sawi a. Tin, heng harsatna bakah hian ruahsur vangin Tlawng lei chu a lian a, “May 22, 2016 zing dar 10:25 ah a dona (staging) chu tui lianin a len thlu ta a. A hma ni maia bottom soffit chhun chu dona awm lova a mah a ding thei anih loh avangin a chim ta a ni,” tih Committee chu hrilh ani leh ta a ni. Rokhawlhna dang a awm loh chuan kumin (2017) March thla hian dawh zawh hman an beisei ani tiin Committee in Assembly session neih mek, March 20-a House hmaa report a pharh ah chuan a in ziak a, Committee pawhin PWD chu an hun tiam chhung ngei a lei dawh zo turina hriattir bawk.

March thla-a zawh tur?

Hetih lai hian, March 8 khan Mamit District a thuthar thehdarhtute leh Taitesena Group YMA hruaitute chuan Bairabi-a Tlawng lei hi a hmunah an tlawh a, anmahni lo dawngsawng tu, PWD leh ABCI hotute chuan lei hi May 20 ah lirthei tlan thei a peihfel ani dawn niin an lo hrilh ani.


2 thoughts on “KUM THUM A ZAWH BEISEI BAIRABI LEI KUM 11 HNU AH “ZAWH THEIH BEISEI A NI”

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s