MIZORAMA MEDICAL COLLEGE HMASA BER TUR DIN THEIH LOH CHHAN SAWI DAN INANGLO

Mizorama medical college hmasa ber tur Mizoram Institute of Medical Education and Research (MIMER) din theih lohna chhan nia Health Minister Lal Thanzara’n March ni 28-a Assembly a zawhna a chhan dan leh Assembly Committee on Government Assurances hnena Health and Family Welfare department-in chhanna a pek dan a inmil lo.

MNF member Dr. K. Beichhua zawhna chhangin Lal Thanzara chuan Medical College la din theih lohna chhante chu – 1) Building hrang hrang sak ngai turte leh cheithat ngaite zawh a la nih loh avangin 2) Hnathawktu tur lak a, dah fel kim a la nih loh avangin 3) Hmanrua leh bungrua chi hrang hrang awm tur la dah kim loh avangin 4) Medical Council of India in damlo OPD – State Referral Hospital, Falkawn-ah nitin 400 tal entur a bithliah a siam kan la tlin loh avangin tihte a ni.

Hetihlai hian nikum May ni 25-a Health and Family Welfare department-in kum 2016-17 chhunga Mizoram Medical College class tan theih a nih loh chhan Committee on Government Assurances zawhna an chhanna-ah erawh chuan Medical Council of India (MCI) leh Ministry of Health and Family Welafre in din phalna Mizoram sorkar hnena an la pek theih loh vang niin an sawi a. Kum 2017-18 session-a admission ti hman ngei tura chak taka tan lak chhunzawm zel a ni an ti a.

A bul tanna atana zirlai 50 zir theihna tura an dilna chu Ministry of Health and Family Welfare-in an pawm thei lova, Ministry leh MCI thurawn angin zirlai 100 zir theihna turin Falkawna Referral Hospital hi tih changtlun tum a ni a. Chumi hnu-ah MCI in tehna kawng hrang hrang hmanga a endik a, a pawm hnu-ah chuan MIMER hi tan theih a ni chauh dawn a ni tiin Assembly Committee zawhna hi an chhang a ni.

MIMER dinna tur atan hian Ministry of Health and Family Welfare atangin cheng vbc 40 dawn tawh a nih thu leh Mizoram sorkarin a do vena cheng vbc 5.56 chu dawn a nih tawh bawk thu Lal Thanzara chuan a sawi a. He sum hmang hian Administrative building a Anatomy, Physiology, Bio-Chemistry Department leh Library Department atan chei that mek a ni a, zawh fel mek a ni a ti a. Hospital building pui ber chu a chhawng sang zawnga sak belhin hna hi za zela 90 thawh zawh tawh a ni a. OPD building-a Ward leh Laboratory, Radiology department te siam peih tep niin a sawi a. Hmanraw hrang hrang mamawh zualpui leina’n hmalak mek a nih thu a sawi a. Post chi hrang hrang 190 dah khat turin DP and AR phalna lak a ni tawh a, mahse MCI duhdan a la phakloh avangin dil belh leh mek a nih thu a sawi bawk.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s