PWD LUNGLEI IN KUM 10 KALTA A DEPT KHAWL HAWH MAN BA CHENG NUAI 30 CHUANG LA THING CHHUAK LO

CAG in sorkar sum hman dan diklo a haichhuahna chu Mizoram Assembly hnuaia Public Accounts Committee chuan bawhzui mahse, PWD lamin an chhan dan a inang lo nuaih a, committee chuan hetianga thu chiang lo a hmaa thehluh anih chu sawisel in, PWD chu thu chiang thehlut tur leh thla hnih chhunga ba thing chhuak vek turin thu a pe

Mizoram Assembly hnuaia Public Accounts Committee (PAC) chuan Public Works Department (PWD)-in kum 2004 leh 2006 inkara department khawl mimal a hawh tir, tun thlenga an hawh man cheng nuai 30 bawr vel a la thin chhuah loh chu a ngai thutak hle ani.

Opposition MLA Lalruatkima Chairman na hnuaia thawk PAC chuan March 23 khan House hmaah Comptroller and Auditor General of India (CAG)-in PWD sum hman dan diklo a chhuichhuahna a bawhzui dan report a pharh a.

CAG hian kum 2012 khan PWD Mechanical Division, Lunglei in sum a hmansual dan a lo zirchiang tawh a. PWD hian kum 2004 leh 2006 inkar khan hna hrang hrang thawktu contractor paruk te hnenah department khawl – bulldozer/air compressor – te chu man chawiin a hawh tir a, heng khawl hawhna man hi a vai chuan cheng nuai 34.84 lai ani.

Mahse, PWD chuan contractor te sum bat atang hian cheng nuai 4.70 chauh a la thin hlawhtlin avangin sorkar chuan a sum hmuh tur cheng nuai 30.1 a hmu lo tihna a ni tiin CAG chuan a sawi a.

He sum hman dikloh chungchang hi PAC chuan chhui zuiin PWD chu CAG thil hmuhchhuaha auditor hnena an insawifiahna PAC hnenah thehlut turin a ti a.

PWD chuan CAG audit a chhanna ah chuan heti hian a sawi a: contractor te chu hmun hla tak taka thawk an nih vangin pawisa thin lamah hma lak chak theih ani lova, chu bakah chuan contractor te hian an jlawh tur an la mumal thei lova, chuvng chuan PWD hnena an pawisa ba pawh chu an rul thei mai lo niin an sawi a.

Hetianga an chhan hnu hian PAC chuan PWD hotute chu baa thin tawh zat leh thin hmabak te hrilh turin a ti leh a. PWD chuan chhang mahse an chhanna chu awmze neilo tak, hmun dang daih a contractor dang daih hnathawhna a bitumen (alkatra) pek anih dan leh bitumen chu a thlawna pek tur anih hrim hrim avangin contractor chuan ba a neilo tiin an chhang a.

PAC chuan hetianga dawngdah taka chhanna an hmu chu hrethiamlo in PWD chu a zilhhau nghe nghe a, PWD chuan chhanna chu an tihsual liau liau ani an ti a.

Chumi hnu a PAC-in PWD hotute an koh erawh chuan Lunglei Sub-Division hnuaia contractor te khawl hawh man leh an bat zat sawi dan hi a danglam leh ta daih a, PWD hotute chuan ba thin chhuah tawh hi cheng nuai 7.37 ani zawk an ti a, hei vang hian b thin chhuah loh chu cheng nuai 30.14 nilovin cheng nuai 28.27 ani zawk an ti a.

Hetianga sawi dan in ang leh ta lo hi PAC chuan ngai thutakin dept chu an zilhhau a, PWD hian MLA rual zawhna chu an ngai pawimawh tawk lo tiin, PWD chuan contractor te pawisa bat zat chu chiang taka chhutin May thla ral hmaa thing chhuak vek turin thu a pe ta ani.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s