TOURISM DEPT IN AN TENDER CHHANNA A HNAWL SAK, HC THUPEK VANGA NGAIHTUAHNAWN LEH TE’N LODGE PRIVATISE ZAWNG ZAWNG LUAHMAN 88% TUM LEH SI

 

Kum 2015 September thla khan Tourism Department chuan Tourist Lodge hrang hrang, a tam zawk sorkarin sum hlauha a enkawl char char te mimal hnenah luahman chawia a hlan (privatise) tum danah thil mak ang reng tak a ti a: a kum hmasa lama Department in tender a chhuaha a chhang sang ber ber te panga bid chu hnawlin a aia lêt engemaw zata tlawma luah a nih theih nan Expression of Interest a chhuah ta daih mai a.

Tender chhang sang tute thenkhat chu Gauhati High Court (Aizawl Bench) ah an zualko ta a, HC chuan Tourism Dept thil tih dan chu a ngaithiam lo hle a, sorkar chuan mipui sum hloh ringawta heng lodge te a enkawl avangin sum engemaw a hmuh theih zawk vanga privatise a tum ti-a a insawi laia tender chhang sang te hnawla an chhan ngamna aia tlawm daiha lilam a tum leh si chu tha a tih loh thu sawiin EoI chu dan hnuaia kaltlang pui theih loh a ni a ti a, tender chhangtute chungthu chu ngaihtuah nawn leh turin Tourism Dept chu thu a pe ta a.

Tourism Dept chuan HC thupêk hi a zawm ta ngei tih tun tum Assembly Session ah hian a hmuh theih a. Opposition MLA Lalruatkima unstarred question (ziaka chhan chi zawhna) a chhanna ah Tourism Minister John Rotluangliana chuan sorkar hnuaia Tourist Lodge/TravellersRs. Inn 50 zinga 12 lai chu privatise a ni ta tiin, heng lodge 12 te enkawltu mimal hming leh thla tin sorkar hnena luah man an chhun luh zat theuh a sawi lang a ni.

Tourism Minister chhanna-a a lan dan chuan heng Tourist Lodge/TravellersRs. Inn 12 te atang hian thla tin a belhkhawmin sorkarin cheng nuai 1.84 (kum khatah cheng nuai 22.11) luah manah a hmu a. Heng Lodge leh Inn te zinga luah man chhung lût hnem ber pathum te chu Tourism Dept in an tender bid a lo hnawl sak tak, HC thupêk vanga a pawm leh tak si te kha an ni nghe nghe.

Tourist Lodge luah man pe hnem pathum te hi Highway Restaurant, Thingdawl (thla tin Rs. 41,700), TravellerRs.s Inn, Vairengte (thla tin Rs. 70,100) leh Tourist Home, Luangmual Zonuam (thla tin Rs. 50,000) luahtute an ni a, an pathum hian lodge privatise tak 12 teRs.n luahman an chhun luh zawng zawng za-a 88 dawn (87.81%) an tum tihna a ni.

Hetih lai hian, Tourism Dept in tender bid panga a hnawl zingah khan Tourist Lodge Bairabi pawh a tel ve a. Khatih laia bid sang ber chu Rs. 22,100 a ni a.

Bairabi Tourist Lodge tender chhang sang ber tu hi chu HC ah a zualko ve loh avangin a chungchang hi ennawm leh a ni lo a nih hmel a, chuvang pawh chu a ni mahna, tunah chuan Bairabi Tourist Lodge hi thlatin Rs. 3,000 in mimal pakhatin a luah mek a.

Tin, Hmuifang Tourist Resort pawh tender chhang sang ber chuan thla khatah Rs. 50,500 in a luah ngam a. Amaherawhchu, Hmuifang Tourist Resport hi Tourism Minister-in unstarred question a chhanna-a privatise tâk zingah hian a lang ve lo.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s