KAN THIL PHÛT A HLAWHTLING HMA CHU THEIHTAWP KAN CHHUAH ZEL ANG – CSS HINDI TEACHER

20170404_120252

Mizoram CSS Hindi Teacher Association (MCHTA) hruaitute’n sorkar-a an thil phût chungchangah Mizoram Kohhran Hruaitute Committee (MKHC) hmalakna an ngaihchan thu leh MKHC palai-na in awmzia a nei lo a nih pawhin an thil phût a hlawhtlin hma chu theihtawp chhuah zel an tum thu an sawi.

Vawiina Aizawl Press Club-a thuthar la khawmtute an kawmna ah The Frontier Despatch (TFD) zawhna chhangin MCHTA hruaitute chuan “Tunah hian MKHC in sorkar ah palai hna min thawhsak dawn a, engtik ah nge sorkar an biak dawn tih kan hre lo a, an hmalakna in awmzia a nei lo a nih chuan theihtawpin hma kan lak chhunzawm ang. CSS Hindi Teacher te hi chhungkua kan ni a, kan tangtlang a, kan hlawhtlin hma loh chuan hma kan la ang,” an ti.

TFD zawhna dang chhangin MCHTA hruaitute chuan kum 2013-a Chanmari YMA Hall-a General Conference an neih khan khatih laia School Education Minister Lalsawta chuan kawng laka bun ruih an nih loh tur thu a sawi ngei a ni an ti a, a thusawi lai video pawh an nei a, politician a ni a, a intiamna anga a ti hlawhtling lo a nih chuan mipuiin an thusawi an hriat ve reng an beisei niin an sawi.

Zawhna dang chhangin CSS Hindi zirtirtu pawl hruaitute chuan dah ngheh an phût chu thil theih a ni tih chu an ngaihdan a nih thu an sawi a, “Department danga sorkar laipui atanga hlawh la te nen min tehkhin fo a, min tehkhintute hian kan guideline hi chhiar rawh se, Mizoram sorkar in kan contract a tawp huna a enkawl theih chin zat tur ngaihtuah chungin sorkar laipuiah rawtna siamin a dil a, tun ataka min thlauhthla leh si hi a dik lo,” an ti a, zirtirtu indaih loh avangin subject dang pawh an zirtir thin thu an sawi.

Political party thenkhat fuihpawrh avanga CM bangla-a lut anga puhna chungchang chu thu dik lo a ni an ti a, “Pawn lam mi tumah an inrawlh lo, CM bangla atanga kan chhuah leh hnu ah pawn lam mite chu an rawn tel chauh a, rawn tel turin kan sawm lo a, an rawn tel tih kan hriat hnu ah police te kan man tir,” an ti a, kar khat chhung chaw an nghei chunga Chief Minister, sorkar hruaitute leh sorkar MLA pakhatmahin an tlawh lo chu na an tih thu an sawi a, an member pakhat nikhaw hre lova tlu chu a thih an hlauh avanga an manganna te chu Chief Minister hrilh tuma a bangla-a kal an nih thu an sawi a, buaina siam tum emaw, kutthlak tum emaw an ni lo a, engmah an ti chhe lo niin an sawi a, anmahni zingah ruitheih thila fihlim lo an awm a, chung mite chu an haw tir a, chumi hnu ah Zarkawt mite chhaih nawmnah an awm tawh ngai lo niin an sawi a, anmahni mi 1,305 te chu sorkar in a lak danah dik takin thil a kalpui a, rorel lai party hruaitute’n an laina hnaite dah luh an tum pawhin khatih laia Education Minister khan a thiam leh tha chauh a la niin an sawi.

MCHTA Vice President Lalchhuanliana chuan Mizoram sorkar hnena Central Guidelines anga state plan hnuaia min la lut (absorb) tura chawngheia an ngenna chuan awmzia a nei lo niin a sawi a, March 27 zanah an member pakhat chu nikhaw hre lovin a tlu a, telephone no. 102 chu bia in doctor rawn kal thei an awm loh thu an hre leh a, kar khat chhung ngawt chaw an nghei chung pawha anmahni hringtu sorkar atangin khawngaihtu leh tlawhtu an awm miah lo chuan an riru a ti na hle niin a sawi a, “Kan CM, kar khat chhung ngawi renga min tlan peltu hian kan awm dan hi hre ve rawh se” tiin CM bangla ah an chhoh thu a sawi a, sorkar dan bawhchhia-a phalna nei lo-a CM chenna hmuna an kal ve ringawt chu an thiam loh thu leh CM leh Mizoram mipuite chungah ngaihdam an dil thu a sawi a, chutih rual chuan an manganna leh harsatna chu mipuite’n an hriatthiam an rin thu a sawi.

MCHTA Vice President chuan CM bangla an luh tuk March 28 zing dar 7 atangin CrPC 144 leh 129 puan a ni a, an hruaitu thenkhat leh member te chu McDonald Hill-a Teachers Inn-a damlo an buaipui mek te leh bungrua ti feltute chu man a, thubuai siamsak an ni a ti a, hetiang a nih tak avang hian MKHC te bia in anni’n Mizoram sorkar laka palai hna an thawhsak theih dawn avangin tiamchin awm lova chaw an nghei chu an ti tawp lailawk a ni a ti a, mahse, an dikna chanvo nei ngei turin theihtawp an chhuah zel tur thu a sawi.

Lalchhuanliana chuan CSS Hindi Teacher te hian an hna an thawh dawnin contract a ni tih an hriat thu a sawi a, chu contract chu a tawp theih thu leh a tawp dawn tih pawh an hria a, mahse, CSS Hindi Teachet 1,305 te chu Mizoram sorkar in a mamawh zat sorkar laipui ah a dil a, Central lam chuan, “Plan Period tawp 2017 thleng ka lo en kawl ang a, Plan Period a tawp hunah State mawhphurna a ni a, an hlawh pawh nangmahni thawhchhuah atangin (state budget) in pe ang,” tiin a lo hrilh a, chumi huam chuan Mizoram sorkar chuan appointment min pe a ni tih an hre chiang em em a, Mizoram mipuite pawhin hriatpui ve se an duh niin a sawi a, hetiang a nih avang hian state thenkhat chuan CSS Hindi Teacher an dil ve duh lo niin a sawi a, an Plan Period a tawp takah chuan Central Guidelines angin State Plan-a luh chu an dikna chanvo a ni tih hria in an dil ta mai niin a sawi.

MCHTA Vice President chuan an contract a tawp ruala bang (mai par thlawn) mai tura bond sign tir an ni chu state sorkar in a hre viau a, mahse, he agreement bond hi sorkar laipui hriatpui a ni lo niin a sawi a, state sorkar in plan period a tawp hunah state mawhphurhna a ni tih hre reng chunga a siam chawp mai a ni a, tun hma lama CSS Hindi Teacher nghet ta mi 491 te pawhin agreement bond an sign a, mahse, an dikna chanvo (dah ngheh) lak sak/chhuh sak an ni ve lo niin a sawi.

An thawh hun chhung a tawp hunah state sorkar in a enkawl zui tur a nih thu chu Mizoram sorkar in a hre chiang hle tih sawiin Lalchhuanliana chuan, “Mizoram sorkar in Hindi Teacher a mamawh zat proposal siamin sorkar laipui ah a zuk dil a, sorkar laipui chuan Centrally Sponsored Scheme 5 year Plan hi Plan Period a tawp hunah mawhphurhna zawng zawng la a, a enkawl zui tur a nih thu a lo hrilh a, Mizoram sorkar chuan min enkawl zui tur a nih zia chiang taka hriain lawm takin he scheme hi a kal pui ta a ni. Mi 1305 te chu DPC kal tlangin min la a, tunah hian Plan period a lo tawp takah chuan state plan-a seng lût a, dahngheh tur kan ni a, an dil tirha Central sorkara a lo intiam tawh angin leh Central guideline-a inziak angin sorkar hi a thu tiamah dinga min enkawl zuia min dahnghet turin kan phût a ni. Central sorkarah Plan period tawpa ka enkawl zui ang ti-a a intiam tawh avangin, agreement bond min sign tir a ‘mai par thlawn’ tur an ni tih hian awmzia a nei lo a ni. Mizoram sorkar hian Central sorkarah Plan period tawpah ka enkawl zui ang tiin Agreement Bond a sign zawk a ni,” a ti bawk.

Lalchhuanliana chuan Mizoram sorkar in Plan Period tawpah a mawhphurh zui tur a nih zia chiang taka a hriat avangin kum 2014 khan 14th Finance Commission-ah CSS Hindi Teacher 1305-te dah nghehna turin sum cheng vbc 5.98 a lo dil daih tawh a ni  a ti a, an dilna hi Vanglaini chanchinbu chuan February 28, 2014 khan a ziak a, October 6, 2013 khan Education Department pawhin State Plan-a la lut turin Proposal pawh hi a lo kal tir tawh a, an rawtna ang hian Mizoram sorkar chuan hma la se chuan an buai loh tur thu a sawi a, Zarkawta chaw ngheia sorkar an nawr laia Zarkawt khawtlangin dawhthei taka a en chu lawmawm an tih thu a sawi bawk.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s