CHENG VBC 71 CHUANG HMAN DIK LOH AH PHE IN EXPOST-FACTO APPROVAL A DIL

PHED hnuaia sum hman dik loh tam tham tak CAG-in a hai chhuah chu bawhzuiin Mizoram Assembly hnuaia committee peng pakhat, Public Accounts Committee chuan he sum, dan kalha an lo hman hi thuneitu dik tak phalna dil leh hnuhnawh (expost-facto approval) turin Department hotute thurawn a pe a, PHED chuan a dil ta niin committee hnenah a thlen

Assembly House

Public Health Engineering Department (PHED) chuan department hotute’n dan phal loh, an thuneihna pel leh tender ko hmasa lo-a bungraw chi hrang hrang leina atana cheng vaibelchhe 71 chuang an lo hman tawh chu phal leh hnuhnawh (expost-facto approval) turin sorkar ah dilna a thlen a.

Hetianga PHED in dan kalha sum a hman hi kum 2006 atanga kum 2010 inkara thil thleng a ni hlawm a, kum 2010-11 khan Comptroller and Auditor General of India (CAG)-in a haichhuak a. Nikum February (2016) thla khan Mizoram Assembly hnuaia Public Accounts Committee chuan department hotute ko in sum hmansual dan chungchangah thu a zawtfiah ta a.

Nikum March thla khan PAC, khatih laia eptu MLA K Sangthuama chairman-na hnuaia thawk chuan Assembly hmaah report a pharh a, chumi report-a a lan dan chuan committee chuan sum hmansual chungchangah expost-facto approval sorkarah dil mai ni se tiin rawtna a siam ta a ni. Chu report-a rawtna a siam hrang hrang te chu PAC chuan bawhzui zelin, kumin March 20 khan tuna committee chairman, eptu MLA Lalruatkima kaihhruai PAC chuan bawhzui in a nih dan report a pharh leh ta a.

Report thar bera a lan dan chuan PHE hian sum hman dik loh hi phal hnuhnawh a dil tawh na in, sorkarin a phalsak reng em tih chu committee hnenah a la sawi chiang lova, committee chuan phalna a hmuh hunah hriattir turin thu a pe a ni.

Cheng vbc 66.98 hman dik loh a nih dan

Kum 2007 khan State Purchase Advisory Board (SPAB) leh Departmental Purchase Advisory Board (DPAB) te chu sorkarin a siamtha a. Chuta siamthat an nih takah chuan sorkar mamawh bungrua cheng nuai 50 aia tlawm chin chu DPAB in lei turin thutlukna a siam thei a, cheng nuai 50 aia man to erawh chu SPAB in phalna a pek phawt a ngai a. Tin, sorkar laipui in a ruahman dan chuan department khata division eng engemaw in bungraw mamawh cheng nuai khat aia man to a lei dawn reng rengin tender a chhuah hmasa tur tih a ni bawk a.

Mahse, PHE bungraw lei tur en thlithlaitu DPAB chuan hetianga kaihhruaina thar hi a zawm ta chuang lova. Firm pahnih, Utkarsh Tubes Pvt Ltd, Kolkata leh North East Tubes Pvt Ltd, Guwahati te chu PHE hnena Galvanised Iron (GI) pipe lo supply reng thin tawh tute an ni tih vangin tender chhuah hranpa lovin leh heng firm te’n an rate sawi ang ang behchhanin supply order a pe ta mai a. Khatih laia PHE Chief Engineer chuan heng firm pahnih te hnenah hian kum li chhung zet supply order 184 a pe ta a, a vaiin PHE hnenah chuan GI pipe cheng vbc 67 dawn an supply ta mai a ni.

Tarlan tawh angin, DPAB hian cheng nuai 50 aia man to bungrua lei a phal ngawt thei lo a, chutiang bungrua man to chu SPAB in a phal a ngai zawk a, chu pawh chu sorkarin phalna a pek leh phawt a ngai a ni.

CAG-in hetianga sum hman dikloh a hmuh chhuah hnu hian PHE chu heti hian a insawifiah a: heng firm pahnih te hi Mizoram hnaiha awm an ni a, Mizoram an hnaih avang tak hian an rate hi a tlawm tura ngaih a ni a, chuvang chuan tender pawh chhuah a tul lem lo, tiin. Mahse, CAG chuan he insawifiahna hi a pawm thei lo a, sorkar hian ngaihruat thu maiin thutlukna a siam a, tender chhuah a nih tak loh ah chuan firm dangte rate a tlawm zawk nge a to zawk tih pawh a chiang ta lo a ni a ti nghe nghe.

Eptu MLA K. Sangthuama chairman lai khan PAC chuan he thu hi bawhzuiin PHE hotute chu insawifiah turin a ti a. PHE chuan heng firm pahnih te hi kum tam GI Pipe lo supply tawh thin an ni ti-a sawi nawn in, kum 2007 khan an GI pipe rate te hi siamthat a ngai ta a, chuvang chuan dept leh DPAB chuan supplier te rate sawi ang chu an pawm ta mai a ni a ti a.

PAC chuan nikum March 2016 khan PHE insawifiahna chu pawmin PHE chuan GI Pipe lei na’na sum a hman dik loh chu sorkar hnenah phalsak hnuhnawh turin dil se tiin rawtna a siam ta a. Kumin March thla-a PAC-in chairman thar, eptu MLA Lalruatkima a neih hnu chuan a bawhzui chhunzawm a, a bawhzuina report March 23-a a thehluh ah chuan PHE chuan sorkarah phal hnuhnawhna hi a dil tawh niin a inziak a, PAC chuan phalna a hmuh hunah PHE chuan PAC hriattir turin a ti ta a ni.

Cheng vbc 2.94 hman dik loh dan

Sorkar danah chuan PHE Chief Engineer chuan kum khatah ` 30,000 hmanna hu chu ama thu in a kal tir ve thei a, mahse, kum 2006-11 inkar khan khatih laia PHE CE chuan cheng vbc 2.94 chu ama thu in bungrua chi hrang hrang – stationery te, Xerox khawl te, computer te leh thil dang chiang taka ziah lem loh – leina turin a lo sanction a. He sum hi hmun 64 ah thenin sanction order te hi cheng nuai khat atanga cheng nuai 53 hu an ni hlawm a.

CAG in a chhuichianna ah chuan hemi kum nga chhung hian CE chuan cheng nuai khat leh sing nga (` 1.50 lakh) bak a thu in sanction order a siam theih loh laiin cheng vbc thum (3) dawn a siam tihna a ni a ti a. PHE chuan dan lova sum hman a nihna chhanah chuan kum 2007-a Chief Engineer (M&I) office thar din a nih vang leh kum 2008-a PHE Engineer-in-Chief office din a nih vang niin a sawi a.

PAC chuan hemi chungchang a bawhzuina ah hian PHE chu insawifiah turin a ti a, tu thuneihna in nge hetianga sanction order siam a nih a zawt nghal a. PHE chuan committee zawhna chhangin Chief Engineer, khatih laia department-a thu ber thuneihna in kum 2006 atanga 2008 chhung khan sanction order hi thensawm a nih bakah kum 2008-11 chhung kha chuan Engineer-in-Chief, PHE thuneihna in thensawm a nih thu an sawi a.

Khatih laia eptu MLA K Sangthuama chairman-na hnuaia awm committee chuan PHE hotute chu hmaichhanah kawm in thu a zawtfiah leh a. PHE chuan committee in engvangin nge sum sen zawng zawng zinga cheng vbc 1.50 hman dan hi ziakin a awm loh tia an zawhna chu an chhang thei lova. Committee chuan PHE office te pawh a hmunah a tlawh ngei a, mahse, hetianga sum hman dan ziahna (stock register) hi hmuhzawh a ni ta chuang lo a ni.

Hetianga stock register ziak tura ngaih official te chu tu nge an nih a, an chunga hmalak a ni tur a ni tiin committee chuan rawtna a siam ta a, chu bakah chuan dan lova sanction order cheng vbc hnih leh nuai sawmkua pali (` 2.94 crore) hman a nih dan chu phalsak hnuhnawh turin sorkarah thlen ni se tiin rawtna nikum 2016 March thla khan a siam bawk a ni.

PAC-in chairman thar, eptu MLA Lalruatkima a neih hnu in he thu hi bawhzui chhunzawm zel a ni a, kumin March thla-a committee report Assembly-a pharh ah chuan PHE hian phalna hnuhnawh pe turin sorkar a dil tawh na in, chu chu pawm a nih leh nih loh a la chiang lova, pawm a nih chuan committee chu hrilh hre nghal turin PHE chu thupek a ni a.

PAC rawtna pakhat zawk – stock register lo dahtha lo tu official te chu chhuichhuah a an chunga hremna lek tur – tih chu PHE chuan chhangin, department chuan stock register chu a vawng fel tawh tiin committee a hrilh a. Mahse, PAC chuan he chhanna hi pawm lovin official te chu hriatchhuah ngei a an chungah hremna lek ngei tur a ni tiin thutlukna a siam nawn leh a ni.

Cheng vbc 1.65 hman dik loh dan

Kum 2007 leh 2009 inkar khan CE, PHED chuan tender emaw quotation emaw chhuah hmasa lovin firm pahnih – Excelsior Merchants Pvt Ltd, Kolkata leh TP Enterprise, Aizawl – atangin Ductile Iron (DI) pipe cheng vbc 1.65 man a lei a. Tarlan tawh angin, hetiang man zat bungrua hi chu department in a duhthuin a lei ngawt thei lo a, cheng nuai 50 aia man to chu SPAB phalna lak hmasak a ngai a ni.

CAG-in hetianga DI Pipe lei a nih thu a haichhuah hian PHED hotute chuan pipe te hi Director General of Supplies and Disposal (DGS&D) rate bituk anga lei a ni an ti ngawt na a, CAG chuan PHED hian an sawi ang hian an lei ngei a ni tih eng document mah an phawrh thei lo a ti thung a.

He thu hi PAC chuan a bawhzui a, PHED chu insawifiah turin a ti a. PHED chuan DI Pipe te hi heng firm pahnih te hian DGS&D rate bituk sa in an supply thin ngei na in, department in pipe a lei lai hian firm te rate bituk sa ang chuan an supply thei ta lo thut a, PHED chuan firm te rate bituk thar ang chuan an lei mai a ngai ta ani tiin PAC chu an hrilh a.

PAC in a phut angin DGS&D rate bituk leh firm te rate bituk thar inthlauhna chu committee hnenah an thehlut ngei bawk a. Mahse, chuta a lan dan chuan firm te hian DGS&D rate bituk let tling thelhin (98%) in rate an tisang tih a lang a ni.

Eptu MLA K Sangthuama chairman-na hnuaia thawk PAC chuan kum 2016 March thla khan hetianga sum hman dik loh hi sorkarah phal hnuhnawhna dil turin PHED chu thurawn a pe ta a. Kumin March thla khan PAC chuan eptu MLA Lalruatkima chairman-na hnuaia a bawhzui dan report Assembly ah a pharh leh a, chutah chuan PHED chuan sorkarah hemi sum hman dik loh hi phal hnuhnawhna a dil tawh niin a insawi tih a lang a. PAC chuan chutianga phalna chu hmuh a nih hunah a hnena copy thehlut turin PHED chu a hriattir ta a ni.

Tuhnaiah expost-facto approval a lar nachhan chu NIAS buaina

Expost-facto approval hi tunhnai khan tualchhungah a lar hle a, a lar nachhan ber chu NIAS Kolkata-a Mizo zirlai 32 dan lo-a tirh vanga buaina chhuak ta nena a in kaihhnawih vang a ni.

Mizoram Building and Other Construction Workers’ Welfare Board chuan insakna-a inhlawhfa te hamthatna tur sum cheng vbc 4.55 chu dan lovin thil dang hrang hrang atan a lo hmang a, chung zingah chuan Mizo zirlai engemaw zat phaia lehkha zir tura thawnna te bakah Central YMA hnuaia Mistiri Training huaihawt nan sum hi pawh pen a ni a.

Hetianga sum hman then hi welfare board inrelbawlna dan kalh a ni nachungin, sum hman a nih tawh hnu ah khatih laia Labour Minister Lalrinmawia Ralte hova welfare board meeting chuan expost-facto approval a pe ta mai a ni a. Minister hova meeting in expost-facto approval a pek hi eptu pawl lian ber Mizo National Front chuan meeting minutes nen lam a tlangzarh ta kha a ni a. Hetianga approval petu a nih vang hian Minister hian mawh a phur ve ngei a ni tiin a nihna bansan turin an ngiat ta a nih kha.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s