DELHI HC-IN MIZORAM DIRECT MARKETING LTD CBI CHHUI TURIN THU PE: TOI

Mizo IPS officer suspend nachhan, state sorkar din ni a sawi Mizoram Direct Marketing Limited chungchanga chu Delhi Police-in an chhui chiang ngam lo ni a ngaiin Delhi HC chuan CBI chhui turin thupek a chhuah

Mizoram Direct Marketing Limited (MDML), Mizoram sorkarin sum peipunna atana company a din nia sawi chu Police kut atanga la a CBI chhui turin Delhi High Court chuan thutlukna a siam ta.

Kum 4 zet Delhi Police-te’n an lo chhui tawh he thubuai-ah hian Mizoram sorkar hotu lian tak an inrawlh tih Delhi High Court judge, Justice Vipin Sanghi chuan sawiin Burari Police Station-a he thubuai chhuitu Delhi Police te hian hma an sawn theih loh avangin thubuai kaihhnawih lehkha pawimawh zawng zawng hi CBI kuta hlan turin thupek a siam niin The Times of India (TOI) chuan April 4 khan a ziak.

“He thubuai hi CBI official dinhmun sang tak chelhin a chhui ngai chi niin a lang a, a chhan chu India ram hmun tam tak kaihhnawih pha he thubuai lian tham takah hian IPS Officer tiamin sorkar milian tak tak an inhmanhnawih ni a a lan vang a ni a. Police-in an thil chhui dan an ziah atanga lang chiang tak chu a chhuitu officer hian IPS officer lal tak leh sorkar officer dangte hming ziahlan pawh hi a ngam meuh lova. Chuvangin he thubuai chhui a, thudik tak hmuchhuak tur hi chuan Delhi Police hi an khawr riau a ni tih hi he Court ngaihdan a ni,” tiin Court chuan a thutlukna-ah a ziak tiin TOI chuan a tarlang.

Delhi High Court-ah hian Sanser Pal Singh chuan Public Interest Litigation (PIL) a thehlut a. An thu theh luhah chuan Mizoram sorkara thuneitu lian tak takte’n MDML hi dinin mipui hnen atanga pawisa la-in an bum a, an company din hi sorkar ta ni awm takin an lan tir a. A hnu-ah Mizoram sorkarin MDML nena inlaichinna an neilo tia a puan leh tak avangin pawisa peipun tuma dahtu mipuite chu an buai ta a ni tiin PIL hi a thehlut a ni.

High Court chuan he thubuai hi CBI-in rang takin chhui chhuak sela a chhuitu pawh officer nihna sang tak nei leh felfai tak nise a duh thu a tarlang.

He thubuai chungchangah hian kum 2013 August ni 1 khan khatih laia Principal Secretary for Industries P.C. Lallawmsanga chu a hna atangin an chawlhtir (suspend) a. Sorkar chuan MDML-ah hian Mizoram sorkar a inrawlh lo niin a sawi a, sorkar company anga a lan tir avangin P.C. Lallawmsanga hi a hna atanga chawlhtir a nih thu sorkar chuan a sawi.

He company MDML hi kum 2013 March thla khan company anga ziah luh a ni a. Sorkar company anga lan tir a company dangte nena inremna P.C. Lallawmsanga leh a thawhpuite’n an lo ziak hi sorkar remtihna leh pawmpuina tello a ni tiin sorkar thuchhuah chuan a sawi.

March ni 11, 2013-a Companies Act hnuaia ziahluh nia sawi MDML-ah hian Director chu P.C. Lallawmsanga hi niin ziahlan a ni a, he company hi ZIDCO leh MIFCO kan tihte anga Mizoram sorkar ta a ni tia ziahlan a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s