MBOCWWB-IN INHLAWHFA TE HNENA HAMTHATNA A PÊK LÊT 11 AIA TAM AMA INRELBAWL NAN LEH A HNUAI HNATHAWKTE HLAWH AH A HMANG

Sorkar laipui in state hrang hranga Building and Other Construction Workers’ Welfare Board inrelbawl dan tur a duan ah chuan sorkar kum khat chhunga sum tlingkhawm 5% aia tam anmahni inrelbawl nan leh a hnuaia thawk te hlawh atan hman phal a ni lova. Mizoram ah ve thung chuan Welfare Board hian 2015-16 khan 54% chuang a hmang 

MMA

Tualchhung inthlanpui hma kum leh inthlanpui kuma hamthatna sem hnathawk tha em em, insakna-a inhlawhfa te chanvo ngaihtuah saktu tur Mizoram Building and Other Construction Workers’ Welfare Board chu kum 2013 hnu lam khan a kum tel in hamthatna sem lamah a hnufual telh telh a, sorkar kum 2015-16-ah phei kha chuan Welfare Board hian inhlawhfa te hamthatna tura sum tlingkhawm cheng vbc 1.54 chu inhlawhfa te hnenah ni lovin dan kalha board hnathawk tura chhawr data entry operator te, field assistant te, driver te leh peon te hlawh atan a hmang ta zawk a ni.

Sorkar laipuiin state tina Welfare Board te inrelbawl dan tur a duan ah chuan inhlawhfa te hamthatna tur sum tlingkhawm 5% bak chu board hnuaia hnathawk te hlawh atan hman tur a ni lo a ti a. Mizorama Welfare Board ve thung chuan he sum tlingkhawm 54.42% chu kum 2015-16 khan hnathawk te hlawh ah a lo hmang a, chumi awmzia chu, sorkar laipui phal bak lêt sawm (10) dawn board hnuaia hnathawk te hlawh atan a hmang tihna a ni. Hei hi kumin March thlaa Assembly Session neih zawh taka Comptroller and Auditor General of India (CAG) in Mizoram sum leh pai dinhmun a chhûtna report pharh ah khan a inziak.

Chu chauh pawh a la ni lo, tun Assembly Session ah vek khan eptu MLA Lalruatkima zawhna ziaka chhangin, tuna Labour Department enkawltu Chief Minister Lal Thanhawla chuan Welfare Board hian kum 2015-16 chhung khan a enkawl tur inhlawhfa te hnenah hamthatna cheng nuai 13.21 a pe chhuak a ti a. Chuti a nih chuan hemi kum hian Welfare Board chuan a enkawl ber inhlawhfa te hnenah hamthatna a pekchhuah lêt 11 aia tam mah a hnuaia hnathawk te hlawh ah a seng tihna a ni.

The Frontier Despatch (TFD) in a lo tarlan tawh angin, March 16 khan Labour Secretary Benjamina hnuaia Welfare Board member thu khawm chuan board hnuaia hnathawk 36 te chu thla hnih notice peka ban vek turin thutlukna a siam a, board hnathawkte hi a thar rawih chu phal mahse, hnathawk 11 aia tam lo ni se tih leh sorkar dan ang ngeia rawih ni tawh se tiin thutlukna a siam bawk a ni.

Welfare Board member te zingah hian board hnuaia hnathawk te an tel ve lova, board member te hi chu sorkar aiawh official hrang hrang te, inhlawhfa te hamthatna sum thawhkhawm tu lian works department hotute leh inhlawhfa te aiawh union hruaitute an ni a. He thu ziah thleng hian March 16-a board member te thutlukna chu Labour Department enkawl tu Chief Minister-in a approve thu hriat a la ni lo.

He thuziak tir lama tarlan tawh angin, Welfare Board hi Mizoram tualchhung inthlanpui kum leh a hmalam khan inhlawhfa te hamthatna sem lamah a taima hle a. Assembly-a zawhna chhanna-a a lan dan chuan kum 2012-13 khan mi 2,409 hnenah an chanvo hamthatna cheng nuai 59 chuang a pechhuak a. Tualchhung inthlanpui kum, 2013-14 khan hamthatna pek chhuah hi a sang filawr hle a, mi 13,402 hnenah cheng vbc 4.51 pek chhuah a ni a. Inthlan a zo a, kum 2014-15 kha chuan mi 657 hnenah cheng nuai 34.75 chauh pêk a ni ta a. Kum 2015-16 phei chuan hei hi nasa taka tlahniam leh in mi 146 hnenah cheng nuai 13.21 chauh pêkchhuah a ni ta a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s