TRUCK THA MI!?!

Sawi hlawh company Mizo Carbon Products bungrua phur thin truck, Taxation Check Gate ni khata vawi sarih, vawi li, vawi thum leh vawi hnih te pal tlang thei chu

Truck.jpg

Bungrua phur leh bungrua phur lem lo lirthei khalh thang te chuan lirthei chak tak chu a “fit” an ti thin a, he tawngkam hian lirthei tlan chak leh bungrua phur hnem thei leh thui tak tlan thei a kawk tlangpui.

Assembly Session neih zawh taka Taxation Minister Lalsawta’n eptu MLA Dr K Beichhua zawhna ziaka a chhanna-a a lan dan chuan, tunhnaia company sawi hlawh tak pakhat, Mizo Carbon Products tih hming pu chuan bungrua phur lirthei “fit” tak tak lungalhthei phur turin a ruai nual.

Tarlan tawh thin angin, Mizo Carbon Products hi Central YMA te, Aizawla pa hriathlawh rual te leh eptu pawl MNF te’n a hmunhma tlawhin eng hna mah an thawk lo ni-a an hriat a an puanzar a ni a. Chuti chung chuan he company hian kum 2014-15 khan Central Transport Subsidy cheng vbc 2.47 leh Central Investment Subsidy cheng nuai 93.90 a hmu a, he sum hi company hian a bungrua chah luh dan lehkha pawimawh te state sorkar hriatpuia sorkar laipui hnena a thehluh vanga hmu a ni.

Central YMA in a lo tarlan tawh thin angin, Mizo Carbon Products hian Mizoram-ah chuan Aizawl Lungmuala Industrial Growth Centre-ah hmunpui a nei a, a thawhpui company pakhat Central Lime Industry chu Lengpui-ah a inbun bawk a. Lungalhthei hi a khur tamna hmun leh hmasang atanga leilung hausakna ngah tawh thin khua, Khliehriat (Meghalaya) ami truck hmangin phurh luh a ni thin a. Chu lungalhthei chu Lungmual leh Lengpui-ah te hian siam danglamin he company hian a sumdawn pui ta thin a ni.

The Frontier Despatch (TFD) in Taxation Minister-in Assembly zawhna a chhan dan a zirchianna ah chuan Mizo Carbon Products tana bungrua phur lirthei fit tak tak sawm paruk (16) aia tlem lo a hmuchhuak a.

Heng zinga pakhat, vehicle registration number AS-11 AC 4903 chuan kum 2011 July 26, furpui lai khan lungalhthei atanga brick siam (Coal Bricks) 30,500 zet, cheng nuai 1.4 man chu phur in Taxation Check Gate-ah ni khat chhungin vawi sarih lai a tlan tlang pui a nih chu!

Khliehriat leh Aizawl inkar hi km 300 bawr vel a ni a, a zatve emaw vel chu tlang kawng, chhuk leh chho a ni a, National Highway pahnih – NH6 leh NH 306 – a paltlang nghe nghe. Lirthei te chi, bungrua phur ni lo tan chuan he kawng zawh chhung hi darkar riat emaw darkar kua emaw a ni tlangpui a, he kawng tlan tlang tawh chuan bungrua phur lirthei truck za tel tlan pelh nguah nguah tum te pawh an nei tawh awm e.

Hetianga truck “fit” hi AS-11 AC 4903 chauh hi a ni lo a, a dang engemaw zat an awm nghe nghe. Amaherawhchu, AS-11 AC 4903 ai hian an “fit” lo vek emaw tih tur a ni: a then chuan Taxation check gate hi ni khatah vawi li chauh te bungrua phurin an tlan tlang pui thei a, a then phei chu an “fit” dan a hniam leh deuh a, nikhatah vawi thum emaw vawi hnih chauh an tlan tlang thei thung.

Mahse, tlan muan deuh leh tlan chak deuh ringawt hi a pawimawh ber chuangin a lang lo. Entirnan, truck pakhat AS-01 CC 0176 chuan July 26, 2011 khan Taxation check-gate vawi thum (3) chauh a tlan tlang hman a. Heti chung hian bungrua cheng nuai 95.77 lai a phur tlang tho mai. A aia hemi ni veka Taxation Check Gate pal tlang ngun AS-11 AC 4901 (vawi li pal tlang tu) hian bungrua cheng nuai 1.45 man chauh a phur thung.

Truck pahnih dang phei chu an “fit” lo lehzual: kum 2012 January 24 khan vawi khat chauh ve ve Taxation Check Gate hi an tlan tlang zo a, mahse zan an han riah hnu ah a tuk chiah, January 25 chuan vawikhat dang an tlan tlang leh thei hram.

Mizo carbon.jpg

 

Mizo Carbon Products issue a lar thar leh, Assembly chhungah leh pawnah eptu te’n sawi nasa

Phek hmasa lama tarlan tak, March 27-a eptu MLA Dr K Beichhua-a zawhna leh Taxation Minister Lalsawta’n a chhan dan hi ziaka chhan chi, unstarred question a ni a, Assembly chhunga tawngka-a sawi zui a ni lem lo.

Mahse, March 30 khan eptu MLA Lalruatkima starred question chu Question Hour ah a chhuak a, chu zawhna chu chhangin Taxation Minister Lalsawta’n M/s Mizo Carbon Products in lungalhthei truck trip 2,368 (29,046.2 MT) Mizoramah a rawn phur lut tawh a, a neitu chu Margaret Varte niin House a hrilh.

Lalsawta chuan Mizo Carbon Products hi Mizoram Value Added Tax (VAT), 2005 hnuaia register a ni a, Indian Partnership Act, 1932 hnuaiah register a ni bawk a, a registration number chu RF/MZ-94 of 2011-2012 : dt. 16.8.2011 a ni a ti a, mahse, hemi hnu hian ni 13.7.2012 ah Proprietorship ah thlak a ni a, a chhan chu partner Ravi Gulgulia a inhnuhdawh vang a ni a ti.

Taxation Minister sawi dan chuan M/s Mizo Carbon Products hian January 4, 2011 atanga July 10, 2014 inkarah bungrua an la lut a, a hlut zawng ni-a record chu cheng vbc. 11.33 (` 11,33,93,394) a ni a, he company in VAT a pek zat chu cheng nuai 40 (` 40,00,403) niin a sawi bawk.

Zawhna neitu Lalruatkima chuan Mizo Carbon Products hi DIC Aizawl ah partnership chu Ravi Gulgulia hminga dah a ni a, Minister chhanna ah Ravi Gulgulia inhnukdawk tih a ni si a, “Tu nge a neitu zawk?” a ti a, Industries Department chhan dan chuan he company neitu hi Dr Margaret M Varte tih a ni a, Minister chhanna ah Margaret Varte tih a ni bawk a, mi thuhmun an nih leh nih loh thu a zawt bawk a.

Tin, Lalruatkima chuan Minister chhanna ah Truck trip 2,368 a rawn lut tawh tih a nih laiin Dr K Beichhua-a unstarred question chhanna ah way bill 2,207 pek chhuah tawh a inti thung a, chuti a nih chuan way bill pe lo truck 161 a awm tihna a ni a, engvangin nge way bill pe lo in check gate an rawn pal tlang theih tiin a zawt bawk a.

Unstarred question chhanna ah hian Meghalaya atanga Aizawl thleng in truck pakhatin ni khatah lungalhthei vawi 6 te a rawn dah thei angin a lang a, hei hi eng nge a chhan, thil dik lo a ni nge record ah thil dik lo a awm zawk tih zawt in, registration buaipui lai hian a neitu te chhungkhat laina hnai tak a enkawltu department ah thlak thut a ni hi eng nge a chhan a ti bawk a.

Taxation Minister Lalsawta chuan Industries Department chu department dang a nih vangin Industries chhinchhiahna nena a danglamna chungchang chu a chhan theih lo thu in a chhang a. Mizo Carbon Products hi ACB in a chhui mek a, an chhuina atangin thil a chiang dawn a, chuvang chuan zawhna thenkhat te kha chhui mek atanga hriat tur a ni a, document department kutah a awm lo tiin a chhan theih loh thu a sawi.

 

Mizo Carbon chungchangah hian MNF party in Zodintluanga a ban an phût

Assembly session a zawh hnu, April 1 khan MNF Legal Board Chairman J Lalremruata Hmar chuan Aizawl Press Club-a thuthar la khawmtute kawmin Mizo Carbon Products in transaction a khawih laia Taxation Minister Zodintluanga chu he firm neitu Dr Margaret M Varte laizawnnu pasal a nih avangin thu dik lo hmanga sum siamna ah Zodintluanga chu a inrawlh thûk hle ah MNF party chuan a ngai tiin Minister atanga a ban an phût tih a sawi a, a bang ngam lo a nih pawhin Chief Minister Lal Thanhawla’n ban se an duh niin a sawi.

MNF Legal Board Chairman chuan lungalhthei phurtu motor lian te tlan dan Way Bill atanga a lan dan chu thil mak tak a ni a ti a, km 300 chuang, Meghalaya Khleiriat atangin truck pakhatin ni khatah Aizawl thleng lungalhthei vawi 6 lai rawn dah thei te an awm niin a sawi a, hetianga Way Bill lem hi thuneitu sang tak nawrna lo chuan Taxation department siam mai a nih a rinawm loh a, Vairengte Check Gate atanga pek ni lovin Aizawla Taxation Commissionarate atanga siam ni-a a lan thu a sawi.

Tualchhung chanchinbu thenkhat chuan hemi press conference ah hian chanchinbumite zawhna chhangin J Lalremruata Hmar chuan Minister Zodintluanga chu Mizo Carbon Products chungchangah hian a inrawlh ngei tih finfiahna (evidence) an nei lem lo niin a sawi tiin an ziak a ni.

Central YMA-in kum 2014-a Mizo Carbon Products sumdawn dan a dem hnu leh eptu pawl te’n sorkar beih nana an hman chhunzawm hnu hian Minister Zodintluanga hian thuchhuah emaw mipui hriata sawi emaw a la nei lo a ni.

 

Mizo Carbon Products, Silchar-a sumdawng chhungkua Gulgulia leh Venus Bamboo

Ministry of Corporate Affairs chhinchhiah dan chuan Mizoram Carbon Producs neitute zing ami Ravi Kumar Gulgulia hi Yash Infrastructural Engineers Director pathum zinga pakhat a ni a, a Director dang pahnihte chu Biswajit Chanda leh Jitenda Sirohia te an ni a.

Ravi Kumar Gulgulia hi Yash Infrastructural Engineers bakah Ocean Entrade tih hming pu company ah Director a ni bawk a, he Company hian Guwahati ah hmunpui neiin he company ah hian Director dang pahnih – Ram Lal Gulgulia leh Bharati Devi Gulgulia – an awm bawk.

Tin, Ram Lal Gulgulia hi Bijoy Singh Lodha nen Kolkata-a Shivratri Commodities Private Limited leh Howrah-a inbun Thirdwave Suppliers Private Limited leh Silchar-a inbun Gulgulia Trade Private Limited ah Director an ni dun a ni.

Bijoy Singh Lodha hi Silchar-a inbun United Impex Limited ah Director a ni bawk a, he company hian Director dang pathum – Gulgulia tih hming pu vek, Navin Gulgulia, Usha Devi Gulgulia, Poonam Chand Gulgulia te a nei bawk a ni.

Navin Gulgulia leh Usha Devi Gulgulia hi company dangah Director nihna an nei lem lova, mahse,  Poonam Chand Gulgulia hi Mizram Venus Bamboo Products Private Limited ah Director a ni bawk a, Mizram Venus Bamboo Products Private Limited ah hian Rosiama Vanchhong, Lalrinawma Dova Ralte leh Zothankhuma te chu kum 2006 leh 2011 inkar khan Director an ni ve bawk.

Ministry of Corporate Affairs ah hian “Mizoram” Venus Bamboo Products Private Limited tih hming inziaklut chu a awm lo nangin, hawrawp pakhat leka spelling hrang “Mizram” Venus Bamboo Products Private Limited tih chu a inziak lut thung a.

Enga pawh chu nise, tualchhunga hriat hlawh leh sawi fo thin Mizoram Venus Bamboo Products Private Limited hi Comptroller and Auditor General of India (CAG) in vawi hnih lai a lo chhui tawh a. March 2008-a a chhuina report-a a ziah dan chuan he company hian dan lovin BAFFACOS pawisa cheng vbc 2.80 lai a dawng a. A hnu a CAG-in a chhui leh chuan Industries Department-in he sum hi lak let emaw, interest chawi tur awm te emaw rul turin Mizoram Venus Bamboo Products Private Limited hi a lo nawr ngai miah lo tih a hmuchhuak a ni.

A hrim hrim in, “Mizram” Venus Bamboo Products Private Limited-a Director Poonam Chand Gulgulia hi “Mizoram” Venus Bamboo Products Private Limited ah Managing Director a ni a, he company-ah hian sorkar hnuaia awm Bamboo Development Agency chuan kawng hrang hranga neitu nihna chi khat “equity shares” cheng vbc 1.60 man a lo lei tawh bawk a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s