PAWISA LEM CHENG NUAI 9.9 HU MAN

WhatsApp Image 2017-04-12 at 15.25.18

Vawiin (April 10) khan Mizoram Police te chuan cheng 2,000 note lem a tak ni se cheng nuai 9.9 an man a, a neitu a puh Lalrinmawii (w/o H Lalzuala, Mission Vengthlang, Aizawl) an man tel nghal bawk.

Kum 56 mi Lalrinmawii hi Indian Penal Code section 489 B leh C tlawhchhanin thubuai siamsak nghal a ni a, he dan hnuaiah hian court in damchhung thleng lung in a tan tir thei a ni.

Police hnen atanga thu dawn danin Lalrinmawii hi pawisa lem tawlh lamah a “bu pui” deuh a ni a, heng pawisa lem te hi phai atanga chawk lut thin niin mi chhawr pawh a nei nual ni-a sawi a ni.

Police chuan tun hnaiah pawisa lem hi phai lam atangin Mizoram a rawn lut nasa tih sawiin, tun hnai te ah pawh Mizoram chhungah pawisa lem tum nga (5) man a ni tawh a, an man tawh zawng zawng hi cheng nuai 24.31 hu niin cheng 500 leh cheng 2,000 note lem a ni tlangpui bawk.

Thu dawnna pakhat chuan heng pawisa lem te hian a tak a ang thawkhat viau niin a sawi a, khawih chuan a thap deuh na in hriat a harsat deuh thu a sawi a. Chhun ni eng hnuaiah chuan a lem a ni tih hriat mai a harsa a, mahse, zanah te chuan light eng hnuaiah a lem a ni tih a hmuh theih mai niin a sawi bawk.

Thu dawnna chuan pawisa lem te hi a la chhawngtute’n a man chanve angin an lei thin a, Rs. 2,000 note lem chu Rs. 1,000 velin an lei thin tlangpui niin a sawi.

Tun thla tir lam khan Union Minister of State (Home) Kiren Rijiju chuan Rajya Sabha ah pawisa note lian tih thih a nih hnu khan ramchhung hmun hrang hrangah pawisa lem cheng vbc 6.2 aia tlem lo hu man a nih tawh thu a sawi a, a tam ber, cheng vbc 5.5 hu chu Gujarat-a man a ni a ti bawk a.

Hetih rual hian ramchhung chanchinbu thenkhat chuan Mizoram ang bawka Bangladesh ri tu West Bengal ah pawh pawisa lem hi a hluar hle a ni tih an lo ziak fo tawh thin a, heng pawisa lem te hian a tak a ang hle thin a, pawisa note thara security features awm zawng zawng zatve te chu pawisa lem siamtute hian an duplicate thiam niin February thla daih tawh pawh khan an lo ziak tawh a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s