COMPANY LEH SORKAR CHU DAN HNUAI AH THIL HRANG ANNI: GAUHATI HC

Mizoram sorkarin thiah tura thutlukna a siam tak Mizoram Agriculture Marketing Corporation Ltd. (MAMCO) leh Mizoram Handloom and Handicrafts Development Corporation (ZOHANDCO) a thawk thenkhat, Group ‘A’ Officer-te’n sorkar hnuaia Group ‘A’ officer vek hna a thun tura High Court an ngenna chu Gauhati High Court, Aizawl Bench chuan tunhnai khan a hnawl

 

Kum 2015 tawp lam khan MAMCO leh ZOHANDCO te hi titawp turin sorkarin thutlukna a siam a. He a thutlukna siam chhan hi hlawkna nei tur leh sumdawng tura Mizoram sorkarin a din company-te zir chiang tura ruat Deloitte & Touche Consulting India Private Limited rawtna vang a ni.

Sorkar hnuaia company te hian hlawkna neih chu sawiloh sorkar sum tam tak a hloh reng a, chuvangin a then siam that a, a then mimal kuta pek a, a then chu thiah turin rawtna a siam a. Chu rawtna ang chuan sorkar hian thutlukna a siam ta a ni.

MAMCO leh ZOHANDCO a thawkte hi an thawhna company thiah a nih dawn takah hian duhthlan tur pahnih pek an ni a. Pakhatna chu sorkar hna a an luh theihna tur – “Appointment into Government Service Scheme” a ni a, pahnihna chu hlawkna engemaw zat tel chunga anmahni thu-a a hun hma a an hna an chawlhsan theihna tur dan tesep ‘Mizoram State Public Sector Enterprises’ Early Retirement Rules, 2015, ‘ERR’ tia an sawi mai thin chu a ni.

Appointment into Government Service Scheme ruahman ang chuan heng company/corporation pahniha thawkte hian sorkara luh an thlan chuan Group ‘B’, ‘C’ leh ‘D’ ah an lut thei ang tih a ni a. Group ‘A’ a luh theihna tur ruahmanna siam a ni lo.

Sorkara lut duh lote tan chuan ERR hi ruahman a ni a, he’ng ruahmanna pahnih zinga pakhat zawk zawk pawh thlanglote chu ERR hmanga an hna atanga chawlhtir tur an nih thu Finance Commission-in ni 30.09.2015 a Office Memorandum (OM) an tihchhuahah chuan tarlan a ni.

MAMCO leh ZOHANDCO hnathawk thenkhat-te hian Mizoram sorkar hi Gauhati High Court Aizawl Bench-ah khingin Group ‘A’ officer-te chu an hlawh humhalh sak bakah an dinhmun ang pangngaia dah turin an ngen a. Heng sorkar company 2-a thawk Group ‘A’ officer-te hi sorkar department hrang hrangah Group ‘C’ a dah an ni chu a diklo tiin a hma a an thawhna company-te hi sorkar din leh sorkar sum hmanga enkawl an nih tho avangin sorkara an luh pawhin an dinhmun pangngai Group ‘A’ ah an lut tur a ni a ti a. Ni 30.09.2015 a sorkar OM tih chhuah hi paih turin Court an ngen a ni.

Sorkar ukil erawh chuan heng company hnuaia thawkte hi registered company a thawk an ni a, sorkar nen inlaichinna neilo leh nihna hrang hlauh a ni a ti a. An thawhna Company-te hi sorkar din ni mahsela sorkar department a ni lova, sorkar hnathawkte anga sorkar sumbawm (consolidated fund of the state) atanga hlawh pek an ni lova, sorkar hnathawkte angin CCS (CCA) Rules chu an chungah lek theih a ni heklo niin a sawi a. He’ng company-a thawkte hi chu an company puala dan leh kaihhruaina siam Memorandum/Articles of Association-in a phuar thung a ni a ti.

Hetianga sorkarin an company a thiah tak avanga sorkara an luh theihna a hawn sak a, duhthlan tur ruahmanna pahnih lai a siam sak chu anmahni tanpuina atan a ni a, chuvangin sorkar chu dan kalha che-ah puh theih a ni lova, Group A officer a luh hi an chanvo anga an hauh theih a nilo tiin sorkar ukil chuan tan a khawh a ni.

Gauhati High Court Aizawl Bench chuan April ni 4, 2017 khan thutlukna siamin Company pahniha Group ‘A’ Officer ni thin, an company thiah a nih tak avanga sorkara Group ‘A’ officer bawka hnimphum leh ngiat tute ngenna chu a hnawl a.

Court chuan an thawh thinna company thiah a nih dawnah hian duhlohna emaw lungawilohna emaw ziaka thehluh an nei lova, chubakah sorkarin an hna tura a pekah an zawm vek tawh bawk a ni a ti a. Sorkar enkawl company-a Group ‘A’ officer a lo thawk an nih avanga sorkar hna a an luh hnu-a Group ‘A’ khera dah an nih lehna chhan tur an chanvo engmah sawi tur an nei heklo tiin court chuan a sawi bawk a, Company Director-te sorkar officer an nih avang maiin company-te kha sorkar a ni tihna a nilo tia ngaihdan siamin Court chuan an dilna hi a hnawl ta a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s