JAPAN RAMA ZIRLAI TIRH THU AH ZIRLAITE’N AN ZIRNA SENSO AN SAWI DAN INANG LO

Japan rama Mizo zirlai te tirh chungchangah MNF thalaite’n NLUP sum dik lo taka hman a ni tiin sorkar an puhmawh hnu ah heng zirlai te tirtu North Eastern Education Consultancy (NEEC)-te’n dik takin thil an kalpui thu sawi mahse, zirlaite’n an zirna senso zat an sawi dan a inang lo a, The Frontier Despatch (TFD) in a chhuichianna ah NEEC-in zirlai pakhat tana NLUP sum cheng nuai 11 an puk, zirlai te rulh leh tura tih chu zirlai senso dik tak a nih loh hmel

1_14444
October 2015-ah Kokoro College hotute leh NEEC hotute’n CM Lal Thanhawla an hmu (Photo:DIPR)

Nikum January 26 khan khatih laia Labour Secretary V Lalremthanga chuan NLUP Implementing Board (NIB) Secretary hnenah hmanhmawh taka sum dilna lehkha a ziak a.

Labour Secretary chuan NIB-in Labour Department dil angin cheng vbc 1.65 hun laklawh tak karah puk a phal chu lawmthu a sawi hmasa a, sum chu cheque hmangin Lianzami Khiangte, N-Eastern Education Consultancy (NEEC)-a coordinator hmingin pek vat ni se a ti a. Hetianga mimal hminga sum tam tham tak pek a ngaih nachhan chu Japan rama zirna in pakhat, Kokoro College-in sum a hmuh tlai lohna tur niin a ziak bawk.

V Lalremthanga chuan Labour Dept-in hun hma lamah Kokoro College chu a lo biak tawh thu te, chu inbiakna chu Chief Minister hmalakna leh duhdan a nih thu te leh CM duh dan angin January 31, 2016 hmaa sum chu Kokoro College account-a a luh hman ngei an intiam thu te lehkha ah hian a ziak bawk a ni.

 

MNYF-in college fee leh sorkar sum sen zat a inphu lo ti 

He lehkha copy hi Mizo National Youth Front hotute chuan April 8 (Inrinni) khan Aizawl Press Club-ah thuthar la khawmtute hnenah an sem a.

MNYF President K Vanlalvena chuan NEEC hian Japan rama Mizo zirlai 15 a tirh danah dik lo takin NLUP sum puka hman a ni tiin, zirlai pakhat zirna senso atan hian cheng nuai 11 puk a nih laiin an zirna senso hi mi pakhat tan cheng nuai 5 chuang awrh chauh ni-a a lan thu sawiin cheng nuai 75 vel a bo niin a sawi bawk a, khatih laia Labour Secretary-in a lehkha ziah a CM duhdan anga hmala an ni ti-a a ziah avangin he thila mawhphurtu-ah hian CM a puh a, a inhnamhnawih te chu sorkarin a hrem an phut niin a sawi bawk. .

 

CM remtihna in NLUP sum puk a ni: LE&IT Secretary

NEEC in Japan rama zirlai a tirh hun laia LE&IT Secretary V Lalremthanga chuan NEEC-te’n Japan rama zirlai an tirh dan hi official lam chuan duh lo mah se, zirlai te’n kal tura an in buatsaih laia harsatna an tawh danah thuneitu sang lam an be thiam a ni ang, CM in an harsatna tawh te puih a duh avangin LE&IT Minister Lalrinmawia Ralte chu zirlaite harsatna pui turin tih a ni a ti a. Sorkar thupek a nih chuan an tih hlawhtlin tur a nih avangin an ti hlawhtling ta niin a sawi a, NLUP sum pawh CM thupeka dil an nih thu a sawi.

 

NEEC hotute’n Labour Minister pawh vawi engemaw zat an hmu hmasa

Khatih laia LE&IT Minister Lalrinmawia Ralte chuan TFD zawhna chhangin Lianzami Khiangte hian a pisa leh a in lamah te thlengin he thilah hian a lo hmu tawh thin niin a sawi a, mahse ani chuan a puih theih loh thu in a lo chhang thin a ti.

“Keimah pawh min rawn hmu a. Tih ngaihna kan hre lo a pawisa neih si loh kha chuan. A tawp dan lam kha chu ka hre ve ta lem lo a. [Lianzami] hi chuan sawi chu a rawn sawi thin a, a thian dangte nen an lo leng a, office lamah te pawh a lo kal a, vawi khat mai ni lo, in lamah te pawh remchangah chuan min rawn hmu bawk a, mahse, tih ngaihna a awm lo department tan kha chuan,” tiin Lalrinmawia Ralte chuan a sawi.

 

Zirlai pakhat senso cheng nuai 11 – NEEC Coordinator

Hemi chungchangah hian TFD chuan NEEC Coordinator Lianzami Khiangte chu a bia a, ani chuan zirlaite hi Japanese Language Course kum khat leh a chanve zir tur a tirh an ni a, an fee chawi tur chu cheng nuai 11 a ni tiin hei hi thla thum chhung ei leh in man, thla ruk chhung chenna (hostel) luah man leh an zirlai chhung zawnga health leh accident insurance a huam tel vek niin a sawi.

Lianzami sawi dan chuan Japan sorkar hian an rama kum lama upa te enkawlna hmuna thawk turin mi nuai thum vel a mamawh dawn avangin leh Japan ramah hian an tawnga zirna sang ber a thlen theih avangin an sorkar chuan ram dang zirlaite lak luh a duhna a rei tawh a.

Hei vang hian Japan sorkar in graduation course kum li a tih thin chu tawng lam zirna ah chuan kum hnih chhunga zir zawh theih diploma course a siam ta niin a sawi a, NEEC chu zirlai harsa te zirna sang zawk an zir ve theihna tura hmala tu a ni a ti bawk a.

Hetia Japan ramin ram dang zirlai an rama zir tura a duh avang hian Silver Peak Japan chuan NEEC chu a rawn be ve niin a sawi a, hei hi bawhzuiin CM hnenah kal nghalin ani hmalakna in zirlai te hi tum hnih (a hmasa in zirlai 15 leh a hnuhnungah zirlai 34) Japan-ah hian an tir niin a sawi.

Lianzami Khiangte chuan zirlai te hi harsa ve tak tak leh ti tha lutuk an nih bik loh avangin student loan an la thei lo a, CM-in Mizoram Youth Commission a kawhhmuh chu bawhzui a ni chungin anni (MYC) chuan an thei lo a, hemi hnu hian Labour Employment & Industrial Training (LE&IT) in buaipuiin, Finance Department in NLUP sum puk ni se an tih angin LE&IT Secretary in NLUP sum a puk hmangin zirlaite chu Japan ah hian an kal thei a, sum hi an hmuh har avangin zirlaite hi an kal lo thelh nghe nghe niin a sawi bawk.

 

“Zirlai lungawi lote’n MNYF thalaite thu dik lo an hrilh”

NEEC Coordinator chuan zirlai kal 15 zingah hian an zirna vela lungawi lo 2/3 vel an awm a, heng mite hian MNF thalaite hi thu dik lo an hrilh ni-a a rin thu a sawi a.

Zirlai te hi harsa ve tak tak an nih avangin an senso tur NLUP sum puk hi an rulh leh tur niin an awm chhungin cheng nuai 20 an hlawh hman dawn avangin rulh leh a huphurh awm lo a ti bawk a, sum eirukna a awm loh bakah zirlai te hi an kal hma-a NEEC in a bum anga MNYF in a puhna chu thu dik lo a ni a ti a.

“Zirlai kan tirhte hi tha takin awm se, tha takin zir se chuan an loan lak te hi an rul thei vek dawn a, Japan sorkar in zirlai te chu hna an thawh ve duh pawhin an thawh theih hun chhung a bituk a, chuti chungin zirlai pathum te chu an zirna senso ba chung leh an zirna in leh Japan sorkar hriat lohin an lo haw,” a ti.

“Zirlai awm tha duh lo” te hian aw an chhuah nasat avangin NEEC leh Mizoram sorkar aiawh te chu an zirna hmunhma te endik tura Japan-a zin an tum laiin sorkar aiawh tur chuan chhungkaw rokhawlhna avangin a thulh niin Lianzami chuan a sawi a, NEEC aiawha Japan-a a kal thu leh zirlai te chuan an zirna senso atana sorkar in loan a pek chu an rulh leh tur tih an hria a, an remtihna thlapa loan te chu la an nih thu sawiin, zirlai te hriatpui loha loan lak sak anga puhna chu a pha a ni.

 

Zirna senso zat zirlai te sawi dan inang lo

Tarlan tawh angin, NEEC hian Japan ah Mizo zirlai vawi hnih a tir tawh a, a hmasa zawkah 15 a tir a, anni  chu December 2015 khan an kal a. A thawh hnihna ah kumin khan mi 34 an kal ve leh a ni.

Tuna Japan-a la awm zirlai thenkhat chu TFD in a bia a, an zirna senso hi India pawisa in cheng nuai 11 a tlin thu an sawi laiin thenkhat chuan cheng nuai ruk chuang hret a nih thu an sawi thung a, zirlai rawn haw tawh thenkhat te chuan an zirna senso an hriat pui loh thu leh an College emaw, agent te emaw an zawh pawhin hrilh an nih loh thu an sawi.

Japan-a la awm, an zirna senso cheng nuai 11 a ni ti tute hi TFD chuan an fee pekna receipt a dil a, an dahna an hre tawh lo niin an sawi. Hetihlai hian an zirna senso cheng nuai 11 a tling lo ti tu zirlai te thung chuan receipt chu TFD an hmuh a, chuta a lan dan chuan an zirna senso hi Yen 13,30,000 a ni a, chu chu India pawisa in cheng nuai 7.65 vel a ni a, hetah hian agent fee a tel vek tawh niin an sawi nghe nghe.

Kokoro College website-a a lan dan chuan he zirna inah hian Japanese Language Course hi chi hnih a awm a. Kum hnih course leh kum khat leh a chanve course a awm a. Kum khat leh a chanve course zir man chu Yen 10,90,000 ani a, hei hian entrance fee, tuition fee leh material fee te a huam vek a. India pawisa-a chhut chuan hei hi cheng nuai 6.32 bawr vel ani. Hei bakah hian pre-admission fee neuh neuh a awm a, chung chu health, physical examination leh accident insurance te a ni hlawm a, heng pre-admission fee te hi a vaiin Yen 37,000 ani a, chu chu India pawisa chuan Rs 21,500 bawr vel a ni. Course fee pangngai leh pre-admission fee te hi belhkhawmin India pawisa cheng nuai 6.54 bawr vel tihna a ni.

 

Tlanbo kan ni lo: zirlai lo haw te

Zirlai rawn haw te hi TFD palai nen Aizawlah an inkawm bawk a, an vaiin pali an ni a, tlanbo an nih loh thu leh an zirna in leh Japan sorkar hriatpuina in an rawn haw thu an sawi a. Japan-a an awm laiin harsatna tam tak an tawk niin an sawi bawk a, an kal hma-a an awmdan tur hrilh an nih dan leh a taka an tawn te chu a inang lo hle ni-a sawiin an zir laia nikhata darkar khat emaw darkar hnih emaw an inhlawhna atanga an sum hmuh te chuan an insenso na leh an inluahman te chu a pha chang chang chauh niin an sawi a, chutiang a nih vang chuan an course zawh tawh hnu, kumin March 16 khan thawlhna chuan man sum an neih veleh an lo haw ta mai niin an sawi bawk.

Amaherawhchu, heng zirlai te hian loan lak theih a nih tak loh vanga sorkar sum cheng nuai 11 theuh pung awm lo-a puk tir an nih thu te chu Japan an kal hma in hrilh an ni na a, anmahni emaw an chhungte emaw chuan he thuthlung ti hlawhtling tur hian hmingziahna engmah an nei lo an ti.

 

Zirlai nu leh pate’n CM ah lungawi lohna thlen

NEEC in Japan-a zirlai a tirh danah hian zirlai pariat te nu leh pa aiawhin mi pahnih chuan CM Lal Thanhawla chu a pisa ah hmu in NEEC in a tira a inzawrh dan leh tuna an fate awm dan chu a inperhsan hle tiin an hrilh a, NEEC hian zirlaite hi Nagasaki-a zir a, inhlawhna pawh nei nghal tur anga insawi si in Japan an thlenin Nagasaki ah pasarih leh thingtlang khaw pakhat Sesebo ah zirlai pariat an dah niin an sawi a, Sesebo-a awm te phei hi chuan inhlawhna an hmuh loh avangin ei leh in bakah an in luah man pek theih loh chang an nei fo a, an fate chu NEEC hian mipui sum (NLUP sum) hmanga a hralh ni hiala an hriat thu an sawi.


2 thoughts on “JAPAN RAMA ZIRLAI TIRH THU AH ZIRLAITE’N AN ZIRNA SENSO AN SAWI DAN INANG LO

  1. Japan cu immigration lamah chuan dan felfai tak nei ram an ni a,sawrkar hriatpuina tel lo in duh2 in a chhuah in a luh theih lo,hetiang lamah chuan ram fimkhur tak an ni,sawrkar hriatpuina tel lo chuan student te hi an haw ringot thy a rinawm lem lo.

    Like

  2. Mak teh nuaih ve..fello lai chu a chiang mai e khi..TFD zarah
    Hman kuma Pi Veronica leh sorkar te hmalakna a Singapore Process College(?) a zirlai tirh pawh an buai viau tawh kha…

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s