PWD-IN MIZORAM ASSEMBLY HNUAIA PUBLIC ACCOUNTS COMMITTEE RAWTNA TUM HNIH A HNAWL

Building lian tham tak pathum sak hna chu contractor te’n pung awm lova pawisa an lak lawk theih nan tiin PWD chuan insakna hna kalpuina dan nilovin kawng sialna hna kalpuina dan hmangin contract an sign pui a. Hei vang hian sorkar sum cheng nuai 59.50 chu awmze nei lovin a riral ta ngawt mai tih CAG-in a hmuchhuak a. Hetiang hi ngaimawhin Public Accounts Committee chuan contract reng reng Law Department in vet vek phawt rawh se tih rawtna a siam a. PWD chuan chutianga tih chuan kar engemaw zat in leh thla engemaw zat in hna a timuang ang tih chhuanlamin committee rawtna vawi hnih ngawt a hnawl

 

Kum 2008 tawp lam khan Mizoram PWD chuan Aizawla Rajiv Gandhi Sports Stadium leh Indoor Stadium sa tur leh New Delhi (Chanakyapuri) a Mizoram House sa tha turin hma a la a. Heng building lian tham tak tak pathum sak na’n hian sum cheng vbc 51.39 a awm sa a.

Mahse, hna an thawh tan dawn chuan pung awm lovin mobilization advance cheng vbc 4.43 chu contractor pathum hnenah PWD chuan a pe ta mai a. Insak hna enkawlna dan pangai hnuaiah chuan hetianga sum advance contractor te pek an nih reng rengin 10% in a pung a awm tur tih a ni a, chu chu contractor te’n sorkar an rul leh ngei tur tih ani.

Hetianga pung awm lova mobilization advance contractor te pek an nih thu hi CAG-in kum 2010 khan haichhuakin thil felhlel lian tak a awm tih a hmuchhuak a. Mizoram PWD chuan contractor te pung awm lova sum a puk lawk tir theih nan insakna tura dan duan sa hmang ta lo chuan kawng sialna tura dan duan sa a hmang ta daih a, chuvang chuan pung awm tura ngaih cheng nuai 59.50 chu Mizoram sorkarin a chan bakah chuti zat sum chu contractor te’n dan phal lohin an hlep tihna ani, CAG chuan a ti a.

Hetianga hmalakna awm hi Mizoram Assembly hnuaia Public Accounts Committee chuan ngaimawhin a bawhzui a, PWD hotute chu insawifiah turin a ti a. PWD chuan mobilization advance atanga a pung 10% chu contractor te pe tur a thin chi a nih loh thu sawiin an contract ziah dan in a phal miau loh vang niin an sawi ta a. An contract ziah chu building sak hna kaihruaitu dan nilovin kawng sial hna kaihruaitu zawk anih vangin chutiang dan hnuaiah chuan pung awm a advance pek chu thil theih loh ani an ti a.

Chutih rual chuan sorkar laipui chuan kawngsial hna kaihhruaina dan hnuaia 10% pung rulh ngai lo tih chu tun hnu ah a siamtha leh tawh a, pung awm zela sum puk tir tur ani a ti leh ta thung a.

Chumi awmzia chu, Mizoram PWD-in stadium pahnih leh Mizoram House sak na turin kalphung pangai pel in kawngsial hna kaihruaitu dan a hmang a, chu dan hmang chuan contractor te thuthlung a ziah pui a, chu mai bakah, chu dan hnuaiah chuan pung awm lovin mobilization advance a puk tir bawk a. Mahse, chu kaihhruaina dan chu sorkar laipuiin tha tilo in a siam danglam leh a, pung awm lova contractor te sum puk tir pawh chu a phal ani leh ta lova. Chuvang chuan Mizoram PWD chuan kalphung pangai pel in, dan siamthat hma in, building sak nan kawngsial hna kaihruaitu dan hmangin, chu dan chuan a phal loh hma in contractor te sum tam tham tak pung awm lovin a puk tir tihna a ni.

PAC chuan hetianga hma la tu ber hi PWD hnuaia thawk tu ber nge anih tiin an zawt a. PWD chuan he hmalakna hi khatih laia Chief Engineer hmalakna a ni tiin an chhang a. PWD hotute chuan khatih laia CE chu PWD Engineer pension ta Vanlalduhsaka niin an sawi a, PAC in department hotute thu a zawhfiah naah hian a tel ve lo nghe nghe niin an sawi bawk.

PAC chuan ngun taka a ngaihtuah hnu ah heti hian thutlukna a siam ta a. Contract ziah dan chungchangah hian ziah dan turf el tak duang tu dan a awm lo tiin hei vang hian PWD hotute chuan an duh dan danin contract an ziak thei niin a sawi a. PWD pawh chuan dan awmsa kailekin contractor hlawkna turin hma na la ngei ani a ti bawk a.

Heti anih vang hian PAC chuan Tender chhuah tur reng reng chu Law and Judicial department in vet hmasa vek rawh se tiin kum 2015 March thla a Assembly hmaa a report pharh ah rawtna a siam ta ani.Mahse, PWD chuan he rawtna hi a hnawl a, tender documents tin te Law and Judicial Department vet tir phawt a sorkar phalna lak hmasak zel chu thil tul a ni lo tiin, Law and Judicial Department chuan sorkar lehkha pawimawh vet turin a kar a kart ye, a thla a thla te hun a mamawh thin ni a sawiin tender chhuah ngai chi hna thawh reng reng chu khawtlai phah vek dawn niin a sawi a.

PAC chuan PWD chhanna hi ngaihtuah nawn lehin a pawm duh bik lova, kum 2016 March thla a Assembly hmaa report a pharh leh ah chuan a hma a a rawtna ngai bawk kha a rawt tha leh a.

Mahse PWD chuan PAC rawtna awm nawn chu hnialin a hnawl leh a, a hnawl vawi hnih naah chuan heti hian a ziak ta a. Law and Judicial Department in contract hna te a vet hmasak a ngaih chuan hun a heh dawn a, hna thawh te a khawtlai thei dawn ani tiin, hna thawh tur reng reng contract documents te chu hna thawh na tura sum tumtu (funding agency) te phalna la hmasa lovin a thlak danglam theih lova, Law and Judicial Department in an endik hnu ah thlak danglam tur a awm ti ta sela, thlak danglam tura funding agency te phalna lak leh chuan a kar a kar, a thla a thla a ngai leh dawn niin PAC rawtna chu PWD, Kaladan kawngpui sial kum li a zawh tur kum riat a zo chauh thei maithei leh Bairabi lei dawh kum thuma  zawh tur kum 11 a zawh in beisei chauh tu chuan a vawihnih na atan a hnawl leh ta ani.

PAC-in kumina Assembly hmaa report a pharh ah hian PWD-in a rawtna tum hnih a hnawl chungchangah hian thusawi leh rawtna dang a siam niin a inziak lova. Mahse, tuna PAC Chairman, eptu MLA Lalruatkima chuan, ““Kan en leh anga, kan inhnial leh dawn chu ani. Kan ko a, kan sawi a, a theihloh an tia, theihlohna tur a awm lo, Law a vet hi theihlohna a awm lo kan ti a, in tum loh vang ani kan ti a. PWD hi an inla superior tlat mai ani. Sum bawm anni tih hi an inhre lutuk kan ti ve a committee pawh hian. A buaithlak khawp mai. An luhlul ani. Kan kalpui zel dan tur chu committee in a la thlir ho ang,” tiin a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s