EXCISE MINISTER IN MLPC DAN KHAUH ZAWKA LEKKAWH A TIAM, DRIVER ZU RUITE REPORT THEIHNA NUMBER PEK CHHUAH A NI

Excise Minister R Lalzirliana chuan zu zawrh leh lei chungchangah dan kalh thil engemawzat a awm thin tih report dawn a nih thu tarlangin, “Khauh zawka dan lekkawh tum a ni,” a ti a, hetih lai hian Commissionerate of Excise and Narcotics chuan driver zu rui report theihna phone number a pechhuak bawk.

April ni 15-a Information Department conference hall-a thuthar la khawmtute a kawmna ah Excise Minister chuan zu warehouse te’n zu pek chhuah phalsak an nih bak an pechhuak thin tih te, vendor wineshop te’n permit nei lo hnenah an hralh thin tih te, permit chuang nei an awm tih te, cheng 10 chawia mi dang hnena permit hawh tir an awm tih te, naupang leh school uniform ha te hnenah zu hralh thin a ni tih te report a awm thu a sawi a.

R Lalzirliana chuan heng thil hrang hrang te hi “Dan kalh tlat a ni” a ti a, “Warehouse leh vendor wineshop-a Excise hnathawk duty thin ten an hna dik takin an thawk tur a ni a. Engemaw inhriatthiamna/puanhnuai thil awm anga sawite a awm tur a ni lo a. Hnathawk tha lo hmuhchhuah a nih chuan dan angin an chungah action lak a ni ang,” tiin a sawi bawk.

“Helai tak hi complain-na ka dawn ah chuan a tam khawp mai a. Excise constable te an duty ve reng a, [zu lei turin] card an rawn keng a, card an lek chuan an thlalak nen en mil awm miah lovin zu kha an lo pe char char mai a, an ti a…. Tin, permit nei lo hrim hrim pawh pek an ni a, pek mai ni lovin a case te in an la chhuak thin tih a ni a. Tin, khar tawh hnu ah te thenkhat te phei chu an wineshop atangin an la chhuak a, motor ten hmun dangah te an sem thin tih report te ka dawng,” a ti a. Hetianga dan bawhchhiatna hi warehouse leh vendor ah bik chuan thla thum chhung an license suspend theih a nih bakah, an bawhchhe nawn leh a nih chuan an licence cancel hlen sak theih an nih thu a sawi bawk.

Driver zu rui report theihna number te chu

Office Lens 20170416-213614

Hetianga driver zu rui report theihna number te pek chhuah a nih rual hian R Lalzirliana chuan, “Motor driver te’n kal kawngah zu an in a, an rui a. Kan hreh si a in report te hi, SMS lo kha chuan driver te’n an hre ve dawn si a, khang number ah khan hei kan motor chuanna driver, motor number chumi khami, chumi lam pan chu zu a in a, a rui a, a hlauhawm lutuk tih kha mipui hian report thei sela kan duh a. Chung ah chuan kan theihtawpin police leh excise ten kawngah an lo ti ding anga an lo man dawn a ni,” tiin a sawi.

Dan lek kawh chak loh chhan: Excise mi te hnar hnuaiah dan bawhchhiatna a thlen thin vang

Hetiang thil thleng thin a nih avang hian MLPC dan khauh zawka kenkawh a nih theih nan Excise hnathawk lak belh tumna a awm leh awm loh zawhna chhangin R Lalzirliana chuan, “Enforcement ah kan chak lo ka tih khan, a mihring tih pun lampang kha, tuna kan chak lo ka sawina ah kha chuan a lang vak lova. An duty reng a wineshop ah khan, mahse, dan lovin an lei teuh thei tlat mai a ni. Chuvangin a enforcement kan chakna tur zawk ah chuan rinawmna te, dan pawisakna te, kha lama kha a tha zawk awm mang e aw tihna kha rilru ah chuan ngaihtuahna a awm thui khawp mai a. Khawlaiah rui an tam a an man seng lo a ni tih hi keima mit ah leh ka beng hriat ah hi chuan sawi hi ka hre tlem khawp mai,” a ti thung.

Bar din remtih a nih thin loh vangin khawlaia zu in an tam phah

Hetih lai hian R Lalzirliana chuan vantlang hmunah zu in an awm thin tih chu pha lovin, a chhan ni-a a hriat chu zu in na hmun bar a awm loh vang ni-a a hriat thu a sawi bawk a. “[Zu in mi te’n] an in na hmun tur tak ngial pawh khawtlang leh kohhran te’n kan remtih sak loh vangin bar din duh te engemawzat an awm a, mahse an din thei ta lo a ni…. Zu lei a in duh an awm tho si avangin phal lohna vantlang hmunah an in a, hmu lo tur naupang, nu leh pa, mipui te’n kan hmu a, mawi lo kan ti a, hei hi a in duh te duhdan chu ni bikin a langin ka hre lo a ni keichuan, tin, anni pawhin an duhdan a ni bik lo tih te mi tamtak te hian min hrilh a,” a ti a.

Zu in tam zawk chhungkhata thalai hlawh nei mang lo

“Zu hi a mak khawp mai a. A chhan chu chhungkhat pa ber, eizawngtu pawhin mahni in a … nupui fanau te hmuha han khai luh zan zan hi chu kan chak lo tlang a ni. Chutiang a nih laia nupui fanau te ina in leh ngahl phei chu, chak lo hi a in duh mahni hlawha lei ngei te pawh hi an ni deuh fur mai a. Tin, chumi te ai chuan chhungkhata thalai ho te, hlawh nei mang lo, khatiang kha a in tam zawk an ni a, mahni ina in hi chu a har khawp mai a. Tunah hian in na hmun tur hi an nei tlat lo mai a, helai hi kan buaipui lai tak chu a ni,” tiin a sawi bawk.

Police hmunah chuan bar kan din ngam lovang

Hetianga bar a awm loh thu leh a in duh te’n in na tur an neih loh chungchangah hian thuthar la khawmtu pakhat chuan MLPC hnuaiah police hmunah te zu hi zawrh tan an nih thu leh police hmunah vek hian bar te chu din a ni thei mai lo em ni tiin a zawt a, R Lalzirliana chuan, “Police tualchhunga civil mi te zu luh vak a, a bar em han siam a kha chu… bar atang khan lo ruih chhuah ve theih kha ania, chuvangin kan security kha a tha lovang tih a hlauhawm a. Chuvangin tumna a awm lo. Amaherawhchu, a lei duh te hi chu polythene dumah an khai a, a hmunah tuman an in ngai lova, a pawina a awm in a lang lova, mahse, a bar a kha chu kan ti ngam lovang,” tiin a chhang.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s