SORKAR LEH CYMA HOTUTE THU KHAWM, VISHAL DAWR CHHUI CHIANG TURIN AIZAWL BAWRHSAP RUAT

Central YMA hotute’n tun hnaia Bawngkawna Vishal dawr hawnah thil dik tawk lo a awm ni-a an hriat avangin vawiin khan Home Minister R Lalzirliana leh sorkar mi pawimawhte an kawm a, meeting hian Vishal Mega Mart chhui/zir chiang turin Aizawl Bawrhsap Kannan Gopinathan a ruat a, a thil hmuh te thla thum chhunga sokar-a thehlut turin a ti a ni.

Bawngkawna Vishal dawr hawn chungchangah Central YMA Executive Committee chuan thil dik tawk lo a awm ni-a an hriat thu leh bawhzui ni se an tih angin sorkar ah hian Vishal chungchang hi an thlen a, Central YMA chuan Vishal Mega Mart neitu hi hnam dang niin Mizo hmingin sumdawnna hi an kalpui niin an sawi a, hei hi Central YMA chuan tha lo an tih thu leh vawi tam tak Aizawl khawpui leh khawpui danga hma an lo lak tawhna thin a ni an ti.

Kar kalta lamah Mizoram Mervhants’ Association chuan thuthar lakhawmtute hmaah sorkar lehkha pawimawh engemawzat an tlangzarh a. Chung lehkhaa a lan dan chuan Aizawl Municipal Corporation chuan August 24, 2016 khan Vishal Mega Mart neitu Lalrinmawia hnenah AMC Licensing Regulations hnuaiah phalna a pe a. Taxation Department-ah Airplaza Retail Holdings Private Limited hmingin February 21, 2017 khan MVAT registration ziah luh a ni a. Kar khat a liam hnu ah Lalrinmawia, Ramhlun South chuan Airplaza Retail Holdings Private Limited, Bawngkawn a thawk tur Rajesh Mishra chu kum hnih atan ILP a sponsor thung a, he ILP hi February 28, 2017 ah tihchhuah a ni leh.

Central YMA hruaitute chuan Trading Regulation mumal awm lo chunga Vishal Mega Mart in sumdawn phalna an nei thei chu tha lo an tih thu an sawi a, state pawn atanga rawn luh ngei ngei ngai company te an awm chungin Mizo-te’tih ve theih thilah chuan hnam dang rawn lut lo se an duh thu te an thlen a ni.

Hemi chungchangah hian Information Department chuan thuchhuah siamin, “Home Minister chuan ram hmasawnna atana rahbi pawimawh tak pakhat chu sumdawnna a ni a, ram leilung faten sum leh paia an intodelh theihna tur tithuanawp thei kawnga hmalakna awm thei lakah erawh kan fimkhur tlan a pawimawh a ni, a ti a. Chumi avang chuan sumdawnna kawngah pawh mipui, consumer-te tana man man zawk, ram economy than chhoh zelna atan tha si inkaihhruaina tha zawk siam tura ngaihtuahna sen a tul a ni, a ti” niin a sawi.

Vishal Mega Mart chungchanga thut khawmna ah hian AMC, Home, Taxation, Law & Judicial leh Commerce & Industries department hotute an tel.


2 thoughts on “SORKAR LEH CYMA HOTUTE THU KHAWM, VISHAL DAWR CHHUI CHIANG TURIN AIZAWL BAWRHSAP RUAT

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s