INHRUAIBO HNU AH BRU HEL 3 MAN AN NI, HRUAIBO TUTE HRIAT AN LA NILO

April 16-a Lawngtlai District huam chhunga Vaseitlang-II khua ah Village Council member pahnih hruaibo an nih hnu in Mizoram Police te chuan nimin (April 19) chhun khan Bru hel ni-a sawi mi pathum an man a, heng an mi mante lakah hian thubuai siam ni tawh mahsela, VC member hruaibotute tak hi tute nge an nih police te chuan an la hre thei lo thung.

Police atanga thu dawn danin heng mi pathum man tak te hi Bru Democratic Front of Mizoram (BDFM) mi leh sa te an ni a, an vai hian Vaseitlang-II ah man an ni a, an kut atangin AK-47 rifle pahnih leh a mu 39 an man bawk a ni.

Police-in an man te hi Zomdarai, Zoihamrai leh Vanlallawma, Vaseitlang-II khua leh tui te vek an ni a, anni hi Lawngtlai Police Station ah hruai an ni a, an lakah hian Unlawful Activities Prevention (UAP) Act section 20 leh Arms Act Section 25 hnuaiah thubuai siamsak an ni.

UAP hnuaiah hian firfiak pawla tel te chu dam chhung lung in tan thlenga hrem theih an ni a, Arms Act hi dan lova silai kawl te hrem theihna dan a ni bawk.

Heng mi pathum man te zinga pakhat, Zomdarai hi BDFM pawl chhung buaina awm hnu a Mizorama lo tlan ni-a sawi a ni a, a pa chu Vaseitlang-II VC member, tu tih hriat loh in an hruaibo zing ami Otichondro a ni.

Police sawi dan chuan Otichondro hi hel ni ngeia hriat mi 10 bawr vel in April 16 zingkar khan Zomdarai-a silai thuhruk an dil a, chumi hnu chuan Otichondro leh VC member ve tho Mohan Joy (Thangkura ti-a hriat bawk) chu pik-up in an khua atangin an phur chhuak a. Hemi zan vek hian Otichondro hi chhuah leh a ni a, a tukah Mohan Joy zawk hi chhuah leh a ni bawk.

Police te chuan Zomdarai leh a thiante pahnih hi rukbo ah hian an inhnamhnawih ve lem lo na in hel pawl mi leh dan lova silai keng an nih vangin an man niin an sawi a, Zomdarai-a pa rubo tute hi hriatchhuah tumin hmalak mek a ni tiin an sawi bawk.

BDFM hi kumin kum tir lam atang khan pawl chhungah an lo buai deuh tawh a. An hotu lu pahnih chu in surrender tumin Bangladesh atangin Tripura lamah an kal niin thu a thang a, chutih lai chuan an pawl member tho mi pangate chuan in surrender tum ni lem lo an hruaitute zing ami pahnih chu Bangladesh chhungah an that a.

Chutianga an hotutte thattu zingah chuan Zomdarai leh a thiante pahnih, Mizoram Police in an man ve tak te hi an tel ngei niin hriat a ni a. Anni bak mi pahnih dang te hi an hming leh khua te chu hriat ni tawh mahsela, tunah hian an awmna chin hriat a ni hrih lo niin police te chuan an sawi thung.

BDFM hi kum engemawzat kalta-a Mizoram khawthlang lama inrukbona-a inhnamhnawih thin te kha an ni a, khatih lai khan Tripura hel pawl National Liberation Front of Tripura (NLFT) te nena tang hovin tlanna sum (ransom) phutin mi an ru bo thin a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s