CHAMPHAI IN AN DISTRICT MLA 5 TE BANG TURIN PHUT

Champhai MZP in Champhai District Hospital-a thawktu dah belh an phut chungchanga buaina kal zelah Champhaia pawl hrang hrang te chuan Champhai District-a MLA panga (5) te bang turin an phut.

Mipui thinrim kal fawr pawlin Champhaia Circuit House an tih chhiat hnu ah Champhaia pawl hrang hrang – MZP, NGO Coordination Committee, All VC, All Party, Champhai Thalai Pawl – thu khawm chuan resolution pass in, “Champhai District mipuite hian kan MLA te hi kan aiawha ding turin kan ring zo tawh lo a, bang rawh se,” an ti.

Champhai Distict MLA te hi JH Rothuama, TT Zothansanga, H Rohluna, Lalrinliana Sailo leh T Sangkunga te an ni.

Sorkarin hmanhmawh thilthu a doctor an lak thar turah paediatrician (naupang doctor) an awm loh pawha district danga thawk lai Champhaia sawn an nih mai tur thu a sawi chu meeting hian a hnawl bawk a, “Transfer Order hi nep kan ti, Champhai in doctor kan mamawh zat hi karleh chhungin Champhai an rawn thleng ngei tur a ni. Zirlai naupang hliam tuarte hi sorkar in zangnadawmna pe rawh se,” tiin resolution ah hian a inziak.

MZP-te’n sorkar atanga an thu dawn “Doctor lak thar tur 26 zingah naupang doctor an awm a nih chuan Champhaiah dah a ni ang a, dil an awm loh chuan hmun dang ami Champhai ah sawn a ni ang” tih chu lungawi thlakah ngai lovin pungkhawm thinrim thenkhat te chuan Circuit House an suasam a, hetah hian YMA in ban a phar hnu ah boruak a dai zui a ni.

He thu buatsaih lai boruak a dai a, buaina a chhuah chhunzawm hriat a ni lo.

This slideshow requires JavaScript.

Hemi hma hian Champhaia pawl hrang hrang inhmukhawm chuan resolution siamin MZP hmalakna an thlawp thu puangin, “Sorkar-a ngenna kal zel avanga chhiatna nasa zawk khawpui chhungah thleng thei reng dinhmunah kan din avang hian sorkar-in rang taka hma a lak hi kan phut tlat a ni,” an lo ti bawk a.

MZP-te’n Champhaia thawktu indaih lo dah belh an phut chungcangah hian naupang doctor an mamawh thu an au chhuahpui a, Champhai Vengsang-ah chawhnu lam khan khawtlang leh police te an in ep a, sorkar chuan an phut anga doctor an pek theih mai loh thu a sawi thung a ni.

 

Interview kaltlangin District Hospital panga bakah Tlabung leh Chawngte ami tur doctor hmanhmawh in la dawn

Vawiin vek khan Home Minister R Lalzirliana hovin Health Minister Lal Thanzara leh department hrang hrang hotute Aizawlah an thu khawm a.

Meeting chuan a rang thei ang bera doctor lak te, a hmanhmawh thlak avanga interview chauha lak mai te, karleh chhung hian tih tur tul te department in lo ti vek se, MPSC ah a rang thei ang bera la tura ngen ni se tih te leh doctor lak tur te hi a tul dan azirin mamawh zualna hospital – Champhai, Mamit, Kolasib, Siaha, Lawngtlai, Chawngte, Tlabung leh a dang te – ah dah ni rawh se tih te a rel a ni.

He meeting ah hian Minister pahnih te bakah Parliamentary Secretary (Finance) KS Thanga, Health Secretary Lalrinliana Fanai, Finance Secretary Lalmalsawma leh DP&AR, Finance leh Health department-a officer te an tel.

 

Doctor duhkhawp lak harsat chhan chu private aiin sorkar hlawh a tlem daih zawk vang: Zira

Hetih lai hian Home Minister R Lalzirliana chuan Aizawl Congress Bhavan ah chawhma lam khan Champhaia buaina chungchang a sawi a, Congress party thu chhuah chuan, “Champhai mipui ten doctor an mamawh leh an dil belh ang hian keini pawhin Champhai mai ni lovin District Headquarters dangah te pawh indaiha dah kan duh vek a… Chutih laiin doctor te hian Private Hospital leh Clinic atang te hian thla tlem te chhungin sorkar atanga an kum khat hlawh tur hi an thawk chhuak zung zung thei a, sorkar ah an hlawh a sang tha bawk si loh avangin sorkar tan doctor indaih khawp neih a harsa a ni,” a ti niin a tarlang.

“March thla Budget Session Assembly House ah doctor 26 sorkar in a la thar dawn tih an lo sawi tawh avangin tuna Champhai mipui te mamawh pawh hi zawi zawia phuhruk theih a nih a beisei thu a sawi,” tiin sorkar lai party thu chhuah chuan a sawi bawk.

 

Champhai buaina vangin eptu pawl te’n sorkar an bei

Champhai District hospital-a hnathawk duhkhawp loh avanga buaina chhuak chungchangah a tuk, April 21 ah eptu pawl hrang hrang in thu chhuah an siam ve bawk a.

MPC Thalai chuan Champhai DC Complex-ah motor engemawzat a kan thu ah, “Mizoram sawrkar-in Law & Order a kenkawh zawh lohzia a tilang chiang” a ti a. Mahse, Champhai MZP leh pawl dang hrang hrang te’n doctor leh hospital thawktu dang dahbelh an phut chungchangah MPC Thalai hian sawi an nei lo lo thung.

ZNP Thalai pawhin thu chhuah siamin, “Hetiang boruak a thlen laia Champhai District chhunga MLA 5-te an ngawireng mai pawh hi ZNP Thalai chuan demawm a tiin, mipuite’n an aiawha an thlan chhan hi ngaihtuah chiang bawk turin heng MLA 5- te hi thu a rawn tel bawk a ni. Champhai District Hospital hi Champhai khawchhung leh a chhehvel khaw hrang hrang ten an pan ber a ni a, mipui hriselna ngaipawimawh tur leh Champhai mipuite mamawh phuhru vat turin ZNP Thalai chuan Mizoram sorkar a ngen nghal bawk,” a ti a.

BJP Mizoram Pradesh ve thung chuan, “Harsatna leh buaina chinfel nan tharum hi hmanraw chhe berah kan ngai,” a tih rualin, “Buaina a thlen chhanah Mizoram sawrkar inthlahdah” vang a ni a ti a.

Social media-a fiamthu darh hmang remchang niawm takin, “Champhai-ah hian police force tam zawk ni lovin doctor an mamawh ang zat a rang thei ang bera dah nghal vat turin Pu Lal Thanhawla kaihhruai Mizoram sawrkar hi BJP Mizoram Pradesh chuan kan phut tlat a ni,” a ti bawk.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s