Champhai MZP thil phût Health Secretariat in hre lo

Champhai District Hospital-a doctor dah belh phuta Total Bandh siamtu Champhai MZP te thil phût chu Health Minister ah thlen ni mahse, Health Department pisa pui (Secretariat) in an lo hre ve lo a. Champhai NGO Coordination Committee-in hetiang thil tho an phûtna chu kim taka an chhân hnu ah leh April thla tawp thleng hun nghak tura an in sawi avangin ngaih tha taka an awm laiin bandh huaihawt a ni ta thut a ni

 

Champhai District Hospital-a doctor leh thawktu dang dah belh phutin Champhai MZP in April 18 (Thawhlehni) leh April 19 (Nilaini) khan Champhai khawpui ah Total Bandh an huaihawt a, bandh hian mipui thlawp a hlawh a, khawlaiah lirthei veivak awm lovin sumdawnna hmun, sorkar pisa leh zirna in te khar vek a ni a. Mahse, Champhai MZP te thil phut hi Health Department pisa pui (Secretariat) lamin an lo hre ve lo a, bandh huaihawt thu chanchinthara a lan atangin an hre ve chauh.

 

Health Department Secretariat in MZP lehkha hmu lo

The Frontier Despatch (TFD) in Champhai MZP te thil phut te hi tih hlawhtlin theih a ni em ti-a Health Secretariat a zawh chuan Secretariat hnathawkte chuan Champhai MZP te thil phut hi an hre lo niin an sawi a, Champhai NGO Coordination Committee te thil phut erawh an hmuh thu leh Champhai Bawrhsap kal tlanga an chhan tawh thu an sawi.

“Champhai MZP te thil phut hi kan hre lo a, Champhai NGO Coordination Committee te chuan Champhai District Hospital-a doctor leh staff indaih loh thu leh thawktu dah belh tura sorkar an dilna lehkha kan hmu a, chu lehkha ah chuan sorkar chu April thla thleng kan nghak dawn an ti a. An lehkha ngaihtuah hian Department hotute chu thu khawmin tun dinhmunah chuan an thil phut zawng zawng tih hlawhtlin a harsat tur thu te kan sawi a. Kan thurel chu Champhai Bawrhsap hrilhin Champhai CMO leh Medical Superintendent te phungbawma sawma Champhai NGO Coordination Committee lo hrilh turin kan ngen,” tiin Health & Family Welfare (H&FW) Joint Secretary Lalringa Sailo chuan TFD a hrilh.

H&FW Joint Secretary chuan Champhai NGO Coordination-te thil phut zing ami zai thiam doctor (surgeon) chu a awmsa chawlh la (leave) in a zawm leh tawh a, naupang doctor an duh erawh tunah chuan dah mai theih a ni lo a, hmun danga mi pawhpen an ngam lo ni-a sawiin, “District Hospital dang ami kan pawhpen chuan kan pawhpen khua te an lungawi loh ve a hlauhawm,” a ti a.

Nurse pathum an duh pawh Khawbung, Sialhawk leh Khawhai CHC leh PHC ami te Champhai District Hospital-a awm tura sawn an ni tawh a, heng nurse pathum te hi an hna zawm nghal tura tih an nih thu a sawi.

 

Health Minister office in MZP lehkha hmu, Directorate in hmu lo

Champhai MZP te thil phut Secretariat lamin an hmuh loh chungchangah hian TFD chuan Health Minister Lal Thanzara a zawtfiah nghal a, Minister chuan Champhai MZP te lehkha, February 24-a ziah chu February 27 khan a hmu tih a sawi a, a tuk February 28 ah H&FW Principal Director hnenah a thawn niin a sawi.

Minister office atanga lehkha thawn chhuah hi Health Department Directorate chuan a hmu lo niin Health &  Principal Director Dr F Lallianhlira chuan TFD an hrilh a, Champhai Bawrhsap Vanlalnghaihsaka’n March 15-a a ziah, Champhai NGO leh MZP te thil phut a rawn ziahna lehkha chu hmuh a ni a, chu chu March 27 khan Secretariat Under Secretariat ah an thawn ni-a sawiin Health Minister pisa atanga MZP lehkha rawn kal chu lo zawn leh an tum thu sawiin, “Kan lo inhai nawn leh dawn nia,” tiin he thu buatsaih lai thleng hi chuan Minister office atanga thawn chhuah Champhai MZP lehkha hi an la hmu lo a ni.

 

Sorkar ngaihtha takin awm, MZP in Total Bandh siam thut!!!

Health Secretariat in Champhai MZP te lehkha an hmuh loh avang hian an thil phut te, an thil phut a hlauhawhtlin loh chuan Total bandh siam an tum thu an ziah te chu an hre lo a.

“Champhai NGO Coordination Committee lehkha kan hmuh chu kan chhang tawh a, sorkar in harsatna a neih te pawh kan hrilh a, an hriatthiam kan ring a, MZP lehkha kan hmuh loh avangin bandh an siam tur thu hi kan hre lo a ni,” tiin H&FW Joint Secretary Lalringa Sailo chuan TFD a hrilh a ni.

Champhaiah hian hmun dang ang lo deuhin NGO Coordination Committee ah hian YMA te, MUP te, MHIP te leh MZP te an tel ve lova, district chhunga sumdawng pawl leh pawl dang chi hrang hrang awmkhawmna zawk a ni a.

Hetih rual hian Champhai Sub Headquarters YMA President Lalbiakzauva chuan heng tlawmngai pawl hrang hrang hian an theih ang tawkin hospital tihchangtlun chu an lo nawr ve tawh thin a, chu vang chuan hospital tihchangtlun nawr tu leh an nawr na chu an thlawp tho niin a sawi bawk ani.

 

Damdawi in hrang hranga doctor awm dan

Mizoram hmun hrang hranga damdawi in, Community Health Centre, Public Health Centre te bakah Sub-Centre ah te doctor, nurse leh thawktu dang indaih tak tak an awm lo a, mipui in damdawi inah awm ngei se an tih – Medicine Doctor, Gynae Doctor, Surgeon leh naupang doctor – te chu Aizawl Civil Hospital, Lunglei Civil Hospital leh Falkawna State Referral Hospital te chauhin an nei kim a.

Mi zai thiam (surgeon) chu Serchhip, Lawngtlai leh Mamit District Hospital in an nei lo a, Medicine doctor chu Siaha leh Lawngtlai in an nei lo a, hmeichhe lam doctor (Obs & Gynae) chu Lawngtlai in an nei lo a, naupang doctor chu Champhai, Kolasib, Serchhip leh Mamit District Hospital-te’n an nei lo a ni.

Aizawl Civil Hospital hotute chuan an damdawi inah doctor tam tak awm mahse, Mizorama damdawi in lian ber leh damlo ngah ber an nih avangin an indaih lo hle tho niin an sawi a, doctor leh nurse an indaih lo nasa zual bik a, doctor awm zawng zawng za-a 30 atanga 40 te chu damlo en lo (laboratory-a thu) niin an sawi a. Hei bakah hian Surgeon leh Obs & Gynae doctor-te’n Ward, OPD leh Theatre an enkawl  bakah zan lama hmanhawha zai ngai an nei thin a, Padiatric doctor-te’n Ward leh OPD bakah nausen damlo na zual leh piang hlim an enkawl a, Medicine pawhin Ward leh OPD an enkawl bawk a, an indaih lo nasa ve hle niin an sawi a, heng bakah hian Aizawl Civil Hospital ah zirlai an tam avangin an indaih lo hle ni-a sawiin District dang nen khaikhin chuan doctor leh nurse tam viau mahse, damlo atanga teh chuan an indaih lo hle niin an sawi.

 

Bandh ti tawp, pisa leh zirna in khar

Champhai MZP-te’n sorkar-a an thil phût nawr nana ni hnih chhung bandh an siamin awmzia a nei lo ni-a an hriat avangin bandh hi April 19 (Nilaini) tlai dar 5:30 khan an ti tawp a, nimin atang khan nan zawka sorkar nawr nan sorkar pisa leh zirna in te an khar a, he thu buatsaih lai (April 19) hian sorkar-a an thil phût a hlawhtlin leh tlin loh hriat hman a ni lo.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s