Muallungthua hmanlai thlan laih chhuah vangin thil hlui zir mite an phawklek

Vangchhia
Kawtchhuah Ropui, Vangchhia a lungphun ziarang nei tlu tawh pakhat (Thlalatu: Adam Saprinsanga)

Hmanni deuh khan Muallungthu-ah chhungkaw pakhatin an chenna in zauh an tumna lamah thil mak tak mai an lai chhuak nawlh mai a.

An lei laihna hmunah chuan pûk siam chawp, a chhuat, a bang leh a chung te chu lung pheka chilh ngheh a lo inphum ru reng a. Chu pûk chhungah chuan hlum bel pahnih a lo inphum a, chung hlum bel chhungah chuan mihring ruhro a lo inrem thlap a.

Hlum bel te zawkah chuan mihring lu ruh leh mihring taksa-a ruh te deuh, ke ruh te, kut ruh te leh nak ruh te a inrem a. Bel lian zawk ah chuan ruh lian lehzual, mal leh ngal ruh te a lo in rem thung a.

Thil pawimawh leh hlu tak a nih an rin avangin lei laitu Lalmawia te chhungkua leh khawtlang hruaitute chuan mi thiam zawk te hrilhhriat a that ngei ringin, eng tin emaw Mizoram University-a History Department an be fuh a, department aiawh te chuan an en thltithlai vat a, a hnu deuh ah chuan MZU zirtirtute leh chhui mite chu Muallungthu ah chuan an kal ta a.

Hetih lai vel hian Art & Culture Department-a archaeologist Vanlalhuma Singson, kum engemawzat kalta atanga Mizoram khawchhak tlangdung khaw hrang hrang, Vangchhia, Lianpui, Farkawn, Dungtlang leh khaw dang engemaw zata sulhnu hlui te lo zirchiang tawh tu chuan hetianga thlan hlui tawh tak niawm Muallungthu khua-a laih chhuah a nih thu hi a lo hre ve bawk a, ani pawh chuan a ngaihven nghal vat nghe nghe a.

Mi thiamte phawklekna

Mizoram hmun hrang hrangah hetiang inphumna hnuhma ni ngeia hriat hi laih chhuah a lo awm fo tawh thin a, mahse, Muallungthu-a tunhnaia thlan hlui laih chhuah ang ema mi thiamte ti phawklek leh an ngaihtuahna ti thui hi a tam lo hle awm e.

A hmasa ber ah chuan Muallungthu-a hmanlai inphumna hnuhma hi hmun dang ami nen khaikhin in a danglam hret a. Lei hnuaiah ruhro hi phum a ni satliah mai lova, lei hnuaiah hian uluk taka pûk rem a ni a. Tarlan tawh angin he pûk hian chhuat te a nei a, a bang leh a chung te pawh lungpheka rem chhuah vek a ni a. Chumi chhungah chuan hlum bel pahnih, an chhunga ruhro rem a awm.

Mahse, chu chu mi thiamte ti phawklek tu ber chu a la ni chuang lo.

Mi thiam te ti phawklek tu chu hei hi ani: he thlan hlui chhinna lungphek an han phawh hnu hian chu lung phek ziarang chu an han bih chiang a, engemaw lem niawm tak hi inziak/ker ngei niin a lang ta tlat mai. Chalk hmangin an han chhui chian hnu chuan fiah lutuk lem lovin lem chu a lo lang ta a.

This slideshow requires JavaScript.

Thlalak: Muallungthu a thlan hlui chhilhna lung phek, ziarang nei chu; Thlan hlui an lai chhuak lai; Hlum bel chhunga luruh; Thlan hlui ruangam 

Han en mai chuan awmze nei em em in a lang lo.  Mahse, Mizoram khawchhak tlangdunga lungphun danglam, mihring, hmanrua leh ramsa chi hrang hrang lem mawi taka a inziah/ker lo hmu tawha lo zirchiang tawh tu tan chuan hai chi rual a ni lo.

“En chhin mah rawh hei!” tih pahin tunhnai khan Vanlalhuma Singson chuan The Frontier Despatch (TFD) Editor chu a phone-a he lung phek thlalak a dah that kiau chu a hmuh a. “Helai hi a dar, helai hi a kawng, chuan, helai hi a chem pai…” tiin a sawi fiah zar zar a.

Hmun danga lungphun ziarang nei thlalak a hmet chhuak leh a, Muallungthu-a thlan chhilhna lungphek nen chuan a en kawp a, chutia han en kawp chiah chuan a chiang ta uar mai: thlan chhilhna lungphek chu hmun danga lungphun te ang chiah, amaherawhchu, a chung lam leh a hnuai lam bung tawh a ni ngei tih a hriat nghal theih mai.

Tunhnaiah Mizoram khawchhak tlangdunga lungphun ziarang nei, mawi leh mak tak tak mai chuan India rama thilhlui chhui mi thiam ber berte a vawikhat nan Mizoramah a lo ko lut ruih ruih tawh thin a. Mahse, Muallungthu-a inphumna hnuhma laih chhuah hian hetiang lungphun te hi Mizoram khawchhak tlangdung chauh ni lo, hmun hrang hrang ah an awm ngei a, hmuhchhuah an la ni lo mai mai chauh an ni tihna a ni.

Khawthlang lamah pawh lungphun danglam

Thla hnih khat kalta khan Vanlalhuma Singson leh Archaeological Survey of India hnuaia Aizawl Cirlce din thara an puipa ber, Superintending Archaeologist Tejas Garge te chuan Mizoram khawthlang lam an zinchilh a.

Hetianga khawthlang hmun hrang hrang an tlawhna ah hian hmun engemawzat ah thil mak tak tak mai an hmu a. Chung an thil hmuh zinga pakhat chu Marpara khaw kawnga khaw pakhat, Pukzinga lungphun a ni.

Pukzing khawtlang hruaitu pakhat Rotlinga sawi dan chuan he lungphun danglam tak mai hi an hriat theih chhung chu an khaw bul hnai mai ah hian a ding reng tawh thin a. “Lungphunlian” tiin an sawi mai a, patling vantlang aiin a sang a, feet 6-a sang, feet 4 emaw vela hlai niin a sawi a, mahse, eng nge a nih a, tu phun nge chu an hre lo. Chuti chung chuan khawtlangin a humhalh a, tih chhiat a phal hauh lova, tuhnai khan Art & Culture hmalakna hnuaiah an hung nghe nghe a ni.

Lianpui.JPG
Lianpui khua a Lungphunropui hmun a lungphun ziarang nei pakhat  (Thlalatu: Adam Saprinsanga)

Khawthlang leh khawchhak a lungphun te an thuhmun!

Vanlalhuma leh Garge te zin hian he lungphun hi an zirchiang a, a phek hlaia mihring, hmanrua leh ramsa lem ker te chu Vangchhia, Lianpui leh khawchhak tlangdung hmun hrang hranga lungphun ami te ang an ni ngei tih an finfiah ta a ni.

“Pukzinga upate chuan hetiang lungphun hi khua atanga kilometer thum vela hla, thing leh mau in a bawh khup tlang pakhatah pawh a awm ngei niin an sawi a. Chu bakah chuan Bangladesh ah pawh a awm ngei niin an sawi bawk,” Vanlalhuma chuan a ti.

Amaherawhchu, Mizoram khawthlang tawp, Pukzing leh a chhehvel hi khawchhak tlangdung ni lo-a hetiang lungphun ziarang nei awmna a ni chuang hauh lo.

Hetiang lungphun humhalh lama hmala tu ber leh mi thiamte hrilh hre tu pawl, INTACH Mizoram Chapter chuan Saitual hnaiha Ruallung khua-a khawtlangin “Chhura fa rep” tia an sawi, lungphun lian tak, a phek hlai laia milem chuanna chu tuhnai deuh khan an Chapter Convener P Rohmingthanga  hovin a hmunah kalin an lo zirchiang tawh bawk a.

INTACH nena lo thawk ho fo tawh thin Vanlalhuma Singson chuan he lunga milem ziarang te hi Pukzing ami te, Muallungthu-a lungphun phel laih chhuaha milem chuang te leh Vangchhia, Farkawn leh Lianpui khaw bula lungphun tam tak dinga milem te nen a inang tlang ngei niin a sawi nghe nghe a ni.

INTACH Mizoram Chapter hmalakna hnuaiah hian Mizoram chhim lam Sangau khaw bula Pangkhua-a lungphun ziarang te pawh endik a lo ni ve leh zel tawh nghe nghe a.

Pangkhua chhunga lungphun hi khawtlang chuan “Pang lung phun” tiin an sawi a. A zirchiang tu Dr H Vanlalhruaia chuan he lungphun hi feet 6-a sang, feet 4-a hlai niin a sawi a, sorkar humhalh a ni lem lo na in tih chhiat a ni lo thung a ti a. Ani chuan Pangkhua ah hian lungphun dang te pawh a awm niin a sawi bawk.

Pangkhua-a “Pang lung phun” a lemziak chuang hi han en mai chuan hmun danga lungphun ziarang nei te nena inang khat tlang vek a ni a tih theih ve bawk awm e.

Mizoram khawchhak tlangdunga lungphun te leh Mizoram khawthlang tawp Pukzinga lungphun te hi ASI Aizawl Circle Superintending Archaeologist ni thin, tuna Maharashtra-a Archaelogy Department Director ni ta Tejas Garge chuan thuhmun an ni ngei em ti-a TFD zawhna chu, “Definitely! (Ni ngei e!)” tiin a chhang.

“Heng lungphun dintu te hi engemaw hnam te sep zawngin an hrang hret hret chu a ni maithei a. Mahse, a bulpui ber ah chuan Tibeto-Burman hnampui zing ami phun chu an ni ngei mai, an khawsak zia pawh a inang nawlpui bawk ang,” tiin Garge chuan a sawi zau a.

Pangkhua
Sangau bul Pangkhua a Pang Lung Phun tia hriat chu. He khua ah hian lungphun dang te pawh a awm ni a sawi a ni (Thlalatu: Dr Vanlalhruaia/INTACH)

100% Mizo!”

Garge-a sawi dan chuan lungphun zia rang te hi “100% Mizo” (“Za-a za Mizo”) an ni a. India hmarchhaka lungphun chi hrang hrang te nena khaikhin chuan inanna te pawh awm mahse, Mizo lungphun te hian ze hrang an nei a, lungphun dang te nen khaikhin chi an ni lo a ti.

“Khasi rama lungphun te hi chu an lian a, Mizo lungphun te ai chuan lian hle mahse, Mizo lungphun a mawina leh lungphun cheibawl dan uluk taka tih a ni hi chu a danglam khawp mai,” a ti bawk.

Heng lungphun te hi zirchian lai mek an ni a, a bulhnai te pawh mi thiamte’n laiin eng ang taka hlui nge an nih hriat chian an tum zel a. Tuna an hriat theih chinah chuan heng lungphun te hi kum zabi 15-na (1500 AD) vel a phun an ni tih an hrechhuak thei tawh a.

“Mizoram lungphun ah themthiamte hmasawnna a lang”

Hmun hrang hrang, khawchhak lam Vangchhia, Lianpui, Farkawn te, khawthlang lam Pukzing te leh Mizoram hmun laili zawk Ruallung te leh Muallungthu te-a lungphun ziarang nei te a lem chuang te hi ker/ziah an nih dan a inang lo hret hret ni awmin a hriat theih a. Mahse, hei hi Garge-a chuan thil dang vang ni lovin, lungphun phuntu te themthiamna hian hma an sawn ve zel a ni tih ngaihdan a nei a. Ani sawi dan chuan hei hi hmarchhak hmun danga thil awm ve lo niin, a hlutna a ti sang zual sauh a ni. Hetianga a ngaihdan hi a thiamna neih sa atanga a siam a ni ber a, rindan (hypothesis) a nih thu a sawi a.

Hetih lai hian Vanlalhuma Singson chuan thil awm thei pakhat chu heng lungphun phun tu te hi khawchhak tlangdunga an chen laiin ei leh bar lamah an intodelh hle vangin themthiamna bik nei te chuan uluk takin an hna an thawk thei a, chutiang bawk chuan khawthlang lama an chen lai pawhin a dinhmun a tha a ni thei a ti a. Tuna Mizoram lo ni ta hmun laili – Ruallung leh Muallungthu awmna hmun – ah te erawh chuan an khawsak dinhmun a harsa deuh zawk anga, themthiam te pawhin an thiamthil te duh ang tawkin an tilang thei lo a ni thei niin a ngai ve bawk.

map
Mizoram hmun hrang hrang a Lungphun ziarang nei hmuhchhuah tawhna hmun te (Graphics: Lalfamkima)

Mizo hmanrua leh Mizo te ngaihsan ramsate

Mizoram chhungah ngei pawh heng lungphun te ngaihven zingah ngaihdan inang a la awm thei meuh lova: thenkhatin tuna Mizo hnam ni ta thlah tute hnaivai tak phun an nih an ring ngam chiah lova, a then chuan an ring thung a.

Archaeologist Garge chuan an lemziaka thil chuang hrang hrang, ramsa leh hmanraw chi hrang hrang, darbu (gong) leh se lu (bison heads) te en in Mizo hnam phun leh chei a nih ngei a ring thung a. Amaherawhchu, tunlaia Mizorama cheng te chu kum za chuang Kristian an nih tawh avangin pipute nun dan ziarang engkim an hre kim vek thei tawh lo a nih pawhin mawh nachhan tur a awm lova, hun rei tak a lo kal tawh vang a ni mai tiin a sawi bawk.

Mi tu emaw chawimawina leh hriatrenga

Garge chuan heng lungphun ziarang nei te hi uluk taka a zirchian hnu ah thil pahnih a lang niin a sawi bawk a. Pakhatna ah chuan tu emaw hriat rengna leh chawimawina a ni tih a chiang niin a sawi a. A dam laia a thiltih te, a ramsa kah te leh a hausakna te chu hmanrua leh ramsa lem hian a tarlang ngei niin a hria a, “Se lu te hi chhiar theihin a awm thluah a, hetiang lung an phun ni hian an sial talh zat lungah hian an ker/ziak nghal turah ka ngai ani kei chuan,” tiin a sawi.

Tin, thil awm thei pakhat bawk chu, hetianga lung phun ani hi khatiah laia rinna lama tihmakmawh ani thei niin a ngaih theih bawk niin a sawi.

Gupta laram ropui hnuhma

Mahse lungphun ziarang nei te chauh hi mi thiamte’n thiamna ênga a ngaihdan an siam nachhan a ni lem lo.

A hma deuh te pawhin hmun hrang hrang (Mizoram chhim lam tiamin) ah ko pang lungpuia milem ker te chu hmuhchhuaha zirchian lo ni tawh mahsela, kumin tir lam khan Mizoram khawthlang lam, Assam leh Tripura ri na bul hnai ah India ram hmun danga ko panga lungpuia milem ker hi hmuhchhuah thar leh nual a ni a. Hengte hi phai leh tlangram in pelhsawlhna hmun hniam lamah hmuhchhuah an ni tlangpui a, Hindu pathian lem ni ngeia hriat an ni hlawm nghe nghe.

IMG-20170417-WA0011
Lungphunlian, Pukzing khua ami chu (Thlalatu: Vanlalhuma Singson)

Hnam pahnih in tawh na, an in then na

Archaeologist Garge leh Vanlalhuma chuan heng milem ker te hi hmasanga India rama Gupta lal ram ropui tak, Gupta Dynasty chuai tawh hnu deuh, post-Gupta period ti-a mi thiamte’n an sawi ami te nen an inang hle niin an sawi a. Heng milem ker te hi kum zabi 10 leh 11 AD vel ami an ni tihna a nih chu. Mahsela, tuna an hmuh chinah chuan lungphun ziarang nei te leh heng Hindu pathian lem te hi an awmna a inkalthelh lo tlangpui a. Hindu pathian lem ker awmna ah te hian lungphun te hi hmuh tur an awm meuh lova, lungphun awmna lamah hian Hindu pathian lem ker ang chi hi hmuh tur a awm meuh lo bawk.

Heng sulhnu hlui chi hnih te hi siam an nih kum chu inang lovin an inkarah kum zathum emaw, zali emaw tla mahsela, Garge chuan an inkalthelh lo hian kawhhmuh a nei ngeiin a hria a, hetianga thil awm hian tlangram leh phai ram luahtu te hi hnam hrang an ni tih a entir niin a sawi a.

Tin, tlangram ah hnam hran an chen avangin phai ram hnam te chu tlangram ah an lut thuk lova, phai ram ah hnam hran an awm avangin tlangram mite chu phai ah an lut thla thui lo bawk niin a lang a ti a ni.

Isua pian hma kum 1000-ah

Amaherawhchu, kum zabi 10 leh 11 AD bawr vela ker Hindu pathian lem te ni ngeia hriat te leh kum 1500 AD vela lungphun ziarang nei, Tibeto-Burman hnam peng te phun ni ngeia rin te chauh hi Mizorama sulhnu hlui tak tak te hmuhchhuah awm chhun an la ni lo fo.

Aizawla Art & Culture department enkawl museum ah chuan hmanlai hmanrua, lung hriam atanga siam te a awm a. Khawi lai hmun atang chiahin lâkkhawm an nih te chu chhinchhiah ni lem lo mahse, mi thiamte chuan kum 1500 BC leh kum 1000 BC ami te ni ngeiin an hria a. Archaeologist Garge chuan hei hian tuna Mizoram lo ni ta ah hian hmasang atangin mihring cheng an lo awm tawh thin tih a tilang chiang hle niin a sawi a. Chung mite chu eng ang mite nge an nih a, engtin nge an khawsak  tih te erawh chu chhinchhiahna te in a zir loh vangin chhui zui a har hle a. Mahse, mi thiamte en na tlang atang chuan thil dang daih a lang thung.

BC leh AD inkarah tute nge awm ta?

Tuna Mizoram ni ta ah hian kum 1500-1000 BC ah mihring an awm ngei tih lung atanga hriamhrei hmuhchhuah atang hian a chiang a. Kum sanghnih vel a ral hnu ah kum zabi 10-11 AD ah Mizoram khawthlang lamah mihring an cheng ngei a ni tih ko pang lungpuia Hindu pathian lem ker atangin a rin zawn theih bawk a. Chumi hnu chuan kum 1500 AD velah tuna Mizoram ni ta hmun hrang hrang, khawthlang te, khawchhak te leh chhim lam thlengin an cheng tih lungphun ziarang nei te atangin a chiang leh bawk a ni.

Mi thiamte chuan heng hunbi inkarah pawh hian mihring cheng an awm ngei turah an ngai a, tuna chinah hian sulhnu hlui hmuchhuah awm teuh tawh mahsela, hmuhchhuah tur a la tam hle ah an ngai a, chu chuan Mizoram history ah nasa takin belhchhah tur a siam turah an ngai bawk.

A dang a la awm em?

Hetianga lungphun ziarang nei leh sulhnu dang dang te hmuhchhuah thar zel a nih hian tualchhung leh hmun dang mi thiamte zingah phur tharna a chawk chhuak nasa hle a, mahse, duhkhawp lohna a siam ve zel bawk a ni. A chhan bupui ber chu heng lungphun te hi hmuh chhuah awm nual tawh mahsela, hmuh chhuah belh zel an nih angin hmuh chhuah loh tam tak a la awm ngeiin an ring a. Mahse, chutianga hmalak chu a harsa si.

Entirnan, Pukzinga kum upa lam te chuan an khua atanga kilometer 3 emaw vel tlang, ramngaw bawh khup ah lungphun dang a awm tih an hria a, mi thiamte an hrilh ngei bawk a. Amaherawhchu, chutiang hmun pilrila han zawn chiam chu thil harsa a ni thung.

Muallungthu-a tunhnaia lungphun keh tawh an hmuh hnu te pawh khan mi thiamte chuan a bulhnai chu an han en thlithlai vat na in, chuti maia thil hmuh chhuah theih chi a ni lova. Lungphun phel khat a awm takah chuan hmun hla vak lo ah a dang, la pum tha tak te pawh a awm ngei chu an beisei a, mahse, zawn hna thawh nghal chawt chawt chu thil awlai a ni lo thung a. Pukzing ang lo takin a khaw mite phei chuan heng ang lung hi an khaw hnai ah an la hmuh ngai loh thu an sawi bawk a, phek zawn ngai a nih hmel hle lehnghal a ni.

Heng lungphun te hi tam tham taka hmuh chhuah tawhna te hi hmun hla tak tak te an nih thin avang leh fianrial tak tak a awm te an nih avangin zawn chhuah a zirchian an harsa thin viau tawh reng a.

Vangchhia ah te leh Lianpui ah te chuan khaw dai mai ah a sawm-a sawm, a za-a za hmuh mai tur a awm a, zirchian an awl zawk ngei a.

Mahse, Farkawn khaw bulah pawh tlang chhipah heng ang lungphun hi sawmnga chuang a awm ngei tih chu hriat a ni na in, khua atangin ruam lamah kal fe a ngai a, chumi hnu ah lui te kanin kal ngai lo tan chuan darkar fe tlang lawn leh a ngai a. Helai hmun tak hi mi thiamte’n tlawh tawh mahse, thil tih reng harsa a ni thung.

Hmun thenkhat – Dungtlang leh Chawngtlai – ah te chuan khaw mipui te hmalakna in lungphun thenkhat chu ramhnuai atanga lâkkhawm niin khaw hnaih deuhah phun sawn an ni tawh a. Chawngtlai ah phei chuan hetiang lungphun hi an khaw chhungah phun that ni mahsela, lungphun dang chu a chhak tlang, ke-a pan vang vang ngai ah a la awm a, a khaw mite chuan a bul hnai ramhnuai ah pawh a dang a la awm niin an sawi bawk.

Mi thiamte chuan hetianga phun that leh ai chuan a hmun ngeia zirchian hian awmzia a nei zawk an ti lehnghal a, a chhan chu a awmna hmun diktak a awm te atangin chhui chhuah zel a awl ai zawk niin an sawi.

Khawchhak ah sulhnu hlui zawn beihpui

A hmunpuia ngaih deuh a ni bawk a, khawchhak tlangdungah chuan INTACH Mizoram Chapter leh mi thiam thenkhatte’n an hrilhhriat hnu ah khaw hrang hranga khawtlang hruaitute’n hetiang lungphun te leh hmanlai sulhnu reng reng zawn chhuahna kawngah hma an la nasa hle a.

Tupuiral YMA sub-headquarters phei chuan an huam chhunga YMA branch hrang hrang te contract hna tenau hnathawh atanga sum an hmuh te thawhkhawmin Tuipuirala hetiang sulhnu te tarlanna lehkhabu, “Tuipuiral – Zofate Lungkham Ram” tih chu tunhnai khan a chhuah (Publish) nghe nghe a.

He lehkhabu-a thu leh thlalak chuang te hi Khawbunga zirtirtu H Lalnunmawia (Mapuia Hnamte) in kum engemawzat chhung a zirchianna rah bakah khawtlang in an lo chhui ve na h rang hrang phuah khawm an ni a, Mizoramah chuah sulhnu hlui chhinchhiahna bu puitling, mi hrang hrangin an thawh khawm atanga lo piang a ni mai awm e.


3 thoughts on “Muallungthua hmanlai thlan laih chhuah vangin thil hlui zir mite an phawklek

  1. Muallungthu lah khawchhak lam han khaikhin chhin ila, entirnan, Vangchhia ah chuan an lungphun neih te kum 1989 thleng khan lak bo a la ni a. Thlân lungrem leh Tianhrâng thlan ah te an lo hmang nasa thin a ni awm a. Hetianga an tinh na chhan chu a phun tu te an hriat tawh loh vang leh an ngaihhlut tawk loh vang a ni ngei ang.
    Chutiang deuh chu Muallungthu ah pawh hian an tawk ve a ni thei mai angem? An thlan laihchhuah ah khan a chhin nan lungphun ziarâng nei keh them hman a ni a, a hun a la rei hmel lo hle a ni. A hunlai in lung phuntu te kha an hre phak lo tih a hriat reng mai a, chu vanga thlan chhinna atana khatiang lung pawh kha hmang an ni ve ngei ang. Tin a thlalaka lan dan atang chuan hmun danga milem ker te ang em chuan an ker uluk lo deuh ni in a lang.
    Hetiang hian kan mithiamte cho chhuak hram se, pawlho emaw thian ho emaw anga hetiang thil hlu hmuchhuak tura ke pen te hi awm ila. Kan ram leh hnam history hi tun aia chiang hian a hriat theih thuai a beiseiawm khawp mai.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s