Assam Rifles leh MFA in football talent hunt buatsaih dawn

 

Assam Rifles leh Mizoram Football Association tangdun chuan May 1 atanga 9 chhung hian Lammual ah mipa leh hmeichhe tan K Kawla U-19 Football Talent Hun Tournament a buatsaih dawn a. He Tournament buatsaih tur chungchangah hian vawiin khan Lammualah 23 Sector Assam Rifles DIG Brig MS Mokha chuan thuthar la khawmtute a kawm a, sorkar laipui Home Ministry hmalakna in Assam Rifles-te’n hmarchhak biala state pali ah inkhel thiam ber ber te thlan chhuah a tum a, chumi atan chuan Tournament an buatsaih dawn a ni a ti a, state pali-a a ti tha ber ber te chu India aiawhin Asia Championship-a tel tir an tum niin a sawi.

Brigadier chuan Tournament chu chhawng thuma buatsaih tur a ni a, a thawh khatna chu state level-a huaihawt tur a ni a, Mizoramah chuan District pariata Football Association tin aiawhte chu May 1 atanga 9 chhungin Lammual ah an inel ang a. A thawh hnihna chu June thla ah Shillong ah huaihawt leh a ni ang a, a thawh thumna chu July thla ah Delhi-a neih a ni leh dawn niin a sawi a, he tournament hming put chhan K Kawla chu Mizo zinga India aiawha football khel hmasa ber a nih avangin a hming chu Tournament hmingah an hmang niin a sawi bawk.

MFA Secretary Lalnghinglova Hmar pawhin thusawiin Mizo thalai te thiamna paw chhuak turin MFA leh Assam Rifles te chuan theihtawp an lo chhuah tawh thin a, Assam Rifles Mizoram football team an champion thu leh player engemaw zat chu sipai a lak an nih dawn thu te a sawi bawk.

Mizote zinga India ram aiawha football khel hmasa ber K Kawla hmingchawia buatsaih tur Talent Hunt Tournament ah hian mipa team 8 leh hmeichhe team 8 te chu Pool hnih ve ve ah then hran an ni a. Mipa Pool ‘A’ ah Serchhip, Siaha, Lunglei leh Kolasib te awmin Pool ‘B’ ah Mamit, Aizawl, Champhai leh Lawngtlai an awm. Hmeichhia Pool ‘A’ ah Mamit, Lawngtlai, Aizawl leh Siaha awmin Pool ‘B’ ah Serchhip, Champhai, Lunglei leh Kolasib te an awm bawk.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s